સેફ્ટીના સાધનો વિના કામ કરાવતા રાજસ્થાની શ્રમિકે જીવ ગુમાવ્યો: તંત્ર અને કોન્ટ્રાક્ટરની ગંભીર બેદરકારી સામે રોષ
વડોદરા: શહેરના વડસર રોડ પર આવેલી વલ્લભ વાટિકા સોસાયટીમાં ગેસ લાઇનની કામગીરી દરમિયાન એક મોટી દુર્ઘટના સર્જાઈ છે. વડોદરા ગેસ લિમિટેડ દ્વારા સોંપવામાં આવેલા કામ દરમિયાન સુરક્ષાના સાધનોના અભાવે 35 વર્ષીય શ્રમિકનું ઘટનાસ્થળે જ કરુણ મોત નીપજ્યું હતું. આ ઘટનાને પગલે સ્થાનિકોમાં ભારે રોષ જોવા મળી રહ્યો છે અને સુરક્ષા વ્યવસ્થા સામે ગંભીર સવાલો ઉભા થયા છે.
મળતી માહિતી મુજબ, વડસર રોડ પર આવેલી વલ્લભ વાટિકા સોસાયટીના રહીશોએ ગેસ લાઇનના કામ માટે વડોદરા ગેસ લિમિટેડને રજૂઆત કરી હતી. VGL દ્વારા આ કામનો કોન્ટ્રાક્ટ ખાનગી એજન્સીને આપવામાં આવ્યો હતો. આજે જ્યારે ગેસ લાઇન માટે ખોદકામ અને ફિટિંગની કામગીરી ચાલી રહી હતી, ત્યારે અચાનક સર્જાયેલી દુર્ઘટનામાં હરિયાભાઈ (ઉંમર 35 વર્ષ) નામનો શ્રમિક ગંભીર રીતે ઇજાગ્રસ્ત થયો હતો અને તેનું ટૂંકી જ વારમાં મોત નીપજ્યું હતું.
બનાવની જાણ થતા જ આસપાસના લોકો દોડી આવ્યા હતા. ગરીબ શ્રમિકના મોતને પગલે સોસાયટીના રહીશોએ તંત્ર પ્રત્યે નારાજગી વ્યક્ત કરી હતી. લોકોએ સવાલ ઉઠાવ્યો હતો કે, “શું એક ગરીબ મજૂરના જીવની કોઈ કિંમત નથી?” કોઈપણ સુરક્ષા વગર કામ કરાવનારા કોન્ટ્રાક્ટર સામે કડક કાયદેસરની કાર્યવાહી કરવાની માંગ ઉઠી છે.
હાલમાં પોલીસે આ મામલે અકસ્માતે મોતનો ગુનો નોંધી આગળની તપાસ હાથ ધરી છે. શ્રમિકના મૃતદેહને પોસ્ટમોર્ટમ અર્થે ખસેડવામાં આવ્યો છે અને તેના પરિવારને જાણ કરવાની તજવીજ હાથ ધરાઈ છે.
કોણ છે જવાબદાર?
મૃતક હરિયાભાઈ મૂળ રાજસ્થાનના વતની હતા અને હાલ વડસર ગામમાં રહીને મજૂરીકામ કરી પરિવારનું ગુજરાન ચલાવતા હતા. સ્થાનિકોના આક્ષેપ મુજબ:
*સુરક્ષાનો અભાવ: મજૂરોને હેલ્મેટ, જેકેટ કે અન્ય કોઈપણ પ્રકારના સેફ્ટી ઇક્વિપમેન્ટ વગર જોખમી કામમાં ઉતારવામાં આવ્યા હતા.
*કોન્ટ્રાક્ટરની લાપરવાહી: નિયમ મુજબ કામના સ્થળે સુરક્ષા સુપરવાઇઝર હોવો જોઈએ, જેની ગેરહાજરી વર્તાતી હતી.
*VGLની નબળી દેખરેખ: સરકારી સંસ્થા હોવા છતાં કોન્ટ્રાક્ટર દ્વારા થતા કામનું યોગ્ય નિરીક્ષણ કરવામાં VGL નિષ્ફળ રહ્યું હોવાનું ચર્ચાઈ રહ્યું છે.
