18-19 માર્ચે ગુજરાતના 16 જિલ્લાઓમાં વરસાદની શક્યતા, ખેડૂતો ચિંતિત
ગુજરાતમાં છેલ્લા કેટલાક દિવસોથી ઉનાળાની તીવ્ર ગરમી લોકોનો કંટાળો વધારી રહી છે. પરંતુ આ વચ્ચે હવામાનમાં અચાનક મોટો ફેરફાર જોવા મળી શકે છે. હવામાન વિભાગની તાજી આગાહી મુજબ 18 અને 19 માર્ચે રાજ્યના અનેક વિસ્તારોમાં કમોસમી માવઠાની શક્યતા વ્યક્ત કરવામાં આવી છે. આ પરિસ્થિતિનું મુખ્ય કારણ પશ્ચિમી વિક્ષેપ માનવામાં આવી રહ્યું છે, જેના કારણે આકાશમાં વાદળછાયું વાતાવરણ સાથે કેટલાક વિસ્તારોમાં હળવો વરસાદ અને ગાજવીજ જોવા મળી શકે છે.
હવામાન વિભાગ મુજબ 18 માર્ચના રોજ ઉત્તર ગુજરાત અને કચ્છના કેટલાક વિસ્તારોમાં છૂટાછવાયા વરસાદની શક્યતા છે. ખાસ કરીને કચ્છ, બનાસકાંઠા અને પાટણ જિલ્લામાં વાદળછાયું વાતાવરણ સાથે હળવા છાંટા પડી શકે છે. દિવસ દરમિયાન ગરમી યથાવત રહેશે પરંતુ સાંજ પછી હવામાનમાં થોડી ઠંડક અનુભવાઈ શકે છે.
જ્યારે 19 માર્ચે વરસાદનું ક્ષેત્ર વધુ વિસ્તરવાની સંભાવના વ્યક્ત કરવામાં આવી છે. ઉત્તર ગુજરાત ઉપરાંત સૌરાષ્ટ્ર અને દક્ષિણ ગુજરાતના અનેક જિલ્લાઓમાં માવઠાની અસર જોવા મળી શકે છે. સૌરાષ્ટ્ર વિસ્તારમાં સુરેન્દ્રનગર, રાજકોટ, બોટાદ, ભાવનગર, અમરેલી, ગીર સોમનાથ અને મોરબીમાં છૂટાછવાયા વરસાદની શક્યતા છે. જ્યારે દક્ષિણ ગુજરાતમાં છોટાઉદેપુર, ભરૂચ, નર્મદા, સુરત અને તાપી સહિતના વિસ્તારોમાં હળવા વરસાદ સાથે ગાજવીજની આગાહી કરવામાં આવી છે.
હવામાન નિષ્ણાતોનું માનવું છે કે આ માવઠું 18થી 25 માર્ચ વચ્ચે અલગ અલગ વિસ્તારોમાં અસર કરી શકે છે. ખાસ કરીને ઉત્તર ગુજરાત અને કચ્છ વિસ્તારમાં તેની અસર વધુ જોવા મળી શકે છે.
આ પરિસ્થિતિ ખેડૂતો માટે ચિંતા ઉભી કરી શકે છે. હાલ રવી પાક કાપણીના તબક્કામાં હોવાથી ઘઉં, ચણા અને અન્ય પાકને નુકસાન થવાની શક્યતા છે. બીજી તરફ સામાન્ય લોકોને ગરમીમાંથી થોડી રાહત મળી શકે છે, પરંતુ ગાજવીજ અને વીજળી પડવાની શક્યતા હોવાથી સાવચેતી રાખવાની સલાહ આપવામાં આવી રહી છે.
