ઇઝરાઇલ–ઈરાન યુદ્ધની અસર વડોદરામાં પણ
હજારો મેડિકલ વિદ્યાર્થીઓના જમવાના પ્રશ્નો ઊભા
(પ્રતિનિધિ) વડોદરા:
ઇઝરાઇલ–ઈરાન યુદ્ધની વૈશ્વિક અસર હવે વડોદરામાં પણ જોવા મળી રહી છે. શહેરની બરોડા મેડિકલ કોલેજની મેસમાં કોમર્શિયલ ગેસના બોટલો ખલાસ થઈ જતા આજથી મેસ બંધ કરવાની ફરજ પડી છે. જેના કારણે મેડિકલમાં અભ્યાસ કરતા હજારો વિદ્યાર્થીઓના જમવાના પ્રશ્નો ઊભા થયા છે.
Lમળતી માહિતી મુજબ, મેસમાં ઉપયોગમાં લેવાતા કોમર્શિયલ ગેસના બોટલોનો પુરવઠો ખૂટી પડતા કેન્ટીન સંચાલકો માટે રસોઈ બનાવવી મુશ્કેલ બની ગઈ છે. પરિણામે આજથી કેન્ટીન અને મેસની સેવાઓ બંધ રાખવાનો નિર્ણય લેવામાં આવ્યો છે.
સંચાલક દ્વારા જણાવાયું છે કે આજ સાંજથી રસોઈ બનાવવાનું સંપૂર્ણપણે બંધ કરવામાં આવશે. મેસ બંધ થતાં મેડિકલ કોલેજમાં અભ્યાસ કરતા અનેક વિદ્યાર્થીઓને બહારથી જમવાનું મેળવવું પડશે, જેના કારણે વિદ્યાર્થીઓમાં ચિંતા જોવા મળી રહી છે.
