લગભગ વીસ વર્ષ સુધી બિહારના મુખ્ય મંત્રીપદ પર ચીટકી રહ્યા પછી નીતીશકુમારે રાજીનામું આપ્યું તેનું કારણ પડદા પાછળ બની ગયેલી કેટલીક ઘટનાઓ હોવાનું માનવામાં આવી રહ્યું છે. બિહારના નિવૃત્ત આઈપીએસ અધિકારી અમિતાભ દાસે ગંભીર આરોપ લગાવ્યો છે કે નીતીશકુમારના પુત્ર નિશાંત કુમાર પટનામાં NEET ની પરીક્ષા આપી રહેલી વિદ્યાર્થિનીના કથિત બળાત્કાર અને અપમૃત્યુ કેસમાં સંડોવાયા હોવાને કારણે નીતીશકુમારને રાજીનામું આપવાની ફરજ પાડવામાં આવી હતી.
મેડિકલ પ્રવેશ પરીક્ષાની તૈયારી કરી રહેલી NEET ની વિદ્યાર્થિની જાન્યુઆરી મહિનાની શરૂઆતમાં પટનાના ચિત્રગુપ્ત નગરમાં એક ખાનગી કન્યા છાત્રાલયમાં તેના રૂમમાં બેભાન અવસ્થામાં મળી આવી હતી. તે પરીક્ષા માટે કોચિંગ મેળવવા માટે ત્યાં રહી હતી. ઘણા દિવસો સુધી કોમામાં રહ્યા બાદ ૧૧ જાન્યુઆરીના રોજ એક ખાનગી હોસ્પિટલમાં તેનું મૃત્યુ થયું હતું. છોકરીના પરિવારે આરોપ લગાવ્યો કે તેના પર જાતીય હુમલો કરવામાં આવ્યો હતો અને અધિકારીઓ આ મામલો દબાવવાનો પ્રયાસ કરી રહ્યા હતા. શોકગ્રસ્ત માતા-પિતા, પરિવારના અન્ય ઘણા સભ્યો સાથે DGP ને મળવા ગયા હતા, પરંતુ ફક્ત માતાપિતાને જ તેમને મળવા દેવામાં આવ્યાં હતાં.
બિહાર સરકારે વિદ્યાર્થિનીના જાતીય શોષણના આરોપો બાદ થયેલા મૃત્યુની CBI તપાસની ભલામણ કરી છે. રાજ્યના ગૃહ વિભાગે દિલ્હી સ્પેશ્યલ પોલીસ એસ્ટાબ્લિશમેન્ટ (DSPE) એક્ટ હેઠળ CBI તપાસની ભલામણ કરતું એક જાહેરનામું બહાર પાડ્યું છે. કેન્દ્ર સરકારનો કર્મચારી અને તાલીમ વિભાગ (DoPT) એક જાહેરનામું બહાર પાડશે, જે CBI માટે રાજ્ય સંબંધિત કેસોની તપાસ કરવાનું ફરજિયાત છે. એજન્સીના અધિકારીઓ રાજ્ય પોલીસ દ્વારા મેળવેલા તમામ પુરાવા એકત્રિત કરશે અને શંકાસ્પદો, ધરપકડ કરાયેલ વ્યક્તિ, હોસ્પિટલ સ્ટાફ, પરિવારનાં સભ્યો અને પોલીસકર્મીઓનાં નિવેદનો પણ રેકોર્ડ કરશે, જેમણે શરૂઆતમાં કેસની તપાસ કરી હતી અને તેને આત્મહત્યાનો કેસ ગણાવ્યો હતો.
બિહારની રાજધાની પટનામાં હેડલાઇન્સમાં રહેલા એક કેસમાં શુક્રવારે સાંજે નવો વળાંક આવ્યો, જ્યારે પટના પોલીસે ભૂતપૂર્વ IPS અધિકારી અમિતાભ કુમાર દાસની ધરપકડ કરી હતી. પટનામાં NEET ના વિદ્યાર્થીના મૃત્યુ અંગે તેમણે અનેક વિવાદાસ્પદ અને ભડકાઉ નિવેદનો આપ્યા બાદ આ કાર્યવાહી કરવામાં આવી, જેની સામે પોલીસે ચિત્રગુપ્ત નગર પોલીસ સ્ટેશનમાં ફરિયાદ નોંધાવી હતી અને કેસ નોંધ્યો હતો. પોલીસે અમિતાભ દાસના નિવાસસ્થાને પણ મોટો દરોડો પાડ્યો હતો, જેમાં અનેક દસ્તાવેજો અને સામગ્રી જપ્ત કરવામાં આવી હતી.
ભૂતપૂર્વ IPS અધિકારી અમિતાભ દાસે ખુલ્લેઆમ આરોપ લગાવ્યો હતો કે વિધાનસભાના નેતા અને મુખ્ય મંત્રી નીતીશકુમારના પુત્ર નિશાંતકુમાર આ કેસમાં સંડોવાયેલા હોઈ શકે છે અને સત્યને ઉજાગર કરવા માટે તેમનો DNA ટેસ્ટ જરૂરી છે. આ આરોપે રાજકીય અને ન્યાયિક બંને રીતે નોંધપાત્ર વિવાદ અને પ્રતિક્રિયાઓ ઊભી કરી હતી. પોલીસે તેમના નિવેદનને ઉશ્કેરણીજનક અને તપાસને પ્રભાવિત કરનાર તરીકે ફગાવી દીધું હતું અને ત્યાર બાદ તેમની સામે FIR દાખલ કરી હતી.
નીતીશકુમારનાં રાજીનામાં પછી આખા દેશની નજર આ કેસની ગતિવિધિ ઉપર મંડાણી છે. પોલીસના જણાવ્યા અનુસાર, વિદ્યાર્થિની ૫ જાન્યુઆરીએ જહાનાબાદથી મુન્નાચક સ્થિત હોસ્ટેલમાં રહેવા આવી હતી. ૬ જાન્યુઆરીએ તે તેની રૂમમાં બેભાન હાલતમાં મળી આવી હતી અને ત્યાર બાદ તેને કદમકુઆન પોલીસ સ્ટેશન વિસ્તારની એક હોસ્પિટલમાં દાખલ કરવામાં આવી હતી.
જ્યારે તેની હાલત વધુ ખરાબ થઈ ગઈ, ત્યારે તેને કાંકરબાગની બીજી હોસ્પિટલમાં દાખલ કરવામાં આવી હતી, જ્યાં તે કોમામાં સરી પડી હતી અને તેનું મૃત્યુ થયું હતું. વિદ્યાર્થિનીના પિતાએ પોલીસ સ્ટેશનમાં ફરિયાદ નોંધાવી હતી, જેમાં આરોપ લગાવવામાં આવ્યો હતો કે તેની પુત્રી પર બળાત્કાર કરવામાં આવ્યો છે. પટનાના ચિત્રગુપ્ત નગર પોલીસ સ્ટેશન વિસ્તારમાં આવેલી ગર્લ્સ હોસ્ટેલમાં NEET ની પરીક્ષા આપતી એક વિદ્યાર્થિનીના મૃત્યુનો મામલો મંગળવારે ત્યારે વધુ ઉગ્ર બન્યો જ્યારે પરિવારના સભ્યોએ કારગિલ ચોક પર તેના મૃતદેહ સાથે વિરોધ પ્રદર્શન કર્યું હતું.
પરિવારનો આરોપ છે કે વિદ્યાર્થીની પર બળાત્કાર અને મારપીટ કરવામાં આવી હતી, જેના કારણે તેનું મોત નીપજ્યું હતું. વિરોધને કારણે કારગિલ ચોક પર ટ્રાફિક સંપૂર્ણપણે ઠપ્પ થઈ ગયો હતો અને વાહનોની લાંબી કતારો લાગી ગઈ હતી. માહિતી મળતાં વરિષ્ઠ પોલીસ અધિકારીઓ ઘટનાસ્થળે પહોંચ્યા હતા અને તેમણે પરિવારનાં સભ્યોને શાંત પાડવાનો પ્રયાસ કર્યો, પરંતુ તેઓ આરોપીઓની તાત્કાલિક ધરપકડની માંગણી પર અડગ રહ્યા હતા. પરિસ્થિતિને પહોંચી વળવા માટે વધારાના પોલીસ દળો તૈનાત કરવામાં આવ્યાં હતાં.
પટનામાં એક હોસ્ટેલમાં હત્યા કરાયેલી ૧૮ વર્ષની NEET વિદ્યાર્થીનીના પોસ્ટમોર્ટમ રિપોર્ટમાં બળાત્કારની પુષ્ટિ થઈ છે. તેમાં એ પણ ઉલ્લેખ કરવામાં આવ્યો છે કે તેણીને મૃત્યુ પહેલાં તેના આખા શરીર પર ઈજાનાં નિશાન જોવા મળ્યાં હતાં અને તેનું મૃત્યુ કુદરતી નહોતું. પોલીસે જણાવ્યું હતું કે તેણીના ગુપ્ત ભાગોમાં ઈજાઓ થઈ હતી. તેના શરીર અને ગળા પર ઉઝરડા હતા અને તેના પર ભારે દબાણ હોવાનાં નિશાન હતાં, એમ ઓટોપ્સી રિપોર્ટમાં જણાવાયું છે.
ઈજાઓના પ્રકારને જોતાં વિદ્યાર્થીએ સખત લડત આપી હતી અને શક્ય તેટલા બધા રીતે હુમલાનો પ્રતિકાર કર્યો હતો. પોસ્ટમોર્ટમ રિપોર્ટમાં મૃત્યુનું કારણ ગળું દબાવવાથી અથવા ગૂંગળામણથી દર્શાવવામાં આવ્યું હતું, જે તેણીની હત્યાના આરોપને સમર્થન આપે છે. સૌથી મોટો પુરાવો ફોરેન્સિક રિપોર્ટમાંથી આવ્યો હતો, જેમાં તેના કપડાં પર શુક્રાણુના નમૂના મળ્યા હતા. ડીએનએ પરીક્ષણમાં જાતીય હુમલાની પુષ્ટિ થઈ છે. જે રૂમમાંથી તેનો મૃતદેહ મળ્યો હતો ત્યાંથી વીર્ય અને લોહીના નમૂના પણ મળી આવ્યા હતા. રૂમમાંથી તેનાં ફાટેલાં કપડાં મળી આવ્યાં હતાં.
આ નમૂનાનો ઉપયોગ ધરપકડ કરાયેલા આરોપીના ડીએનએ તેમજ ખાસ તપાસ ટીમ દ્વારા ઓળખાયેલા શંકાસ્પદો સાથે મેચ કરવા માટે કરવામાં આવશે. ફોરેન્સિક રિપોર્ટ આવ્યા બાદ બિહાર સરકાર હરકતમાં આવી ગઈ હતી. ગૃહમંત્રી સમ્રાટ ચૌધરીએ પોલીસ વડા અને અન્ય વરિષ્ઠ અધિકારીઓ સાથે વાત કરી હતી અને તેમને વિદ્યાર્થિની પર બળાત્કાર અને હત્યા પાછળનાં લોકોની ધરપકડ કરવા સૂચના આપી હતી. સરકારે કહ્યું કે તે ખાતરી કરશે કે પોલીસ આ કેસને ટૂંક સમયમાં ઉકેલી નાખે. રવિવારે બે પોલીસ અધિકારીઓ રોશની કુમારી અને હેમંત ઝાને વિલંબિત કાર્યવાહી અને સમયસર ગુપ્ત માહિતી એકત્રિત કરવામાં નિષ્ફળતા બદલ દોષિત ઠેરવવામાં આવ્યા બાદ સસ્પેન્ડ કરવામાં આવ્યા હતા. કેન્દ્રીય મંત્રી જીતન રામ માંઝીએ કહ્યું છે કે બિહાર સરકાર આ કેસમાં ન્યાય સુનિશ્ચિત કરવા માટે તમામ પગલાં લઈ રહી છે.
SIT ઉપરાંત, CBI એ આ કેસ પોતાના હાથમાં લઈ લીધો છે. જન સુરાજના સ્થાપક પ્રશાંત કિશોરે કહ્યું છે કે તેમની પાર્ટી હત્યા કરાયેલી વિદ્યાર્થીનીના પરિવારના સભ્યોને તમામ કાનૂની સહાય પૂરી પાડશે. તે પટનાના ચિત્રગુપ્ત નગરમાં એક ગર્લ્સ હોસ્ટેલમાં રહેતી હતી અને મેડિકલ પ્રવેશ પરીક્ષાની તૈયારી કરી રહી હતી. શહેરની એક હોસ્પિટલમાં ઘણા દિવસો સુધી કોમામાં રહ્યા બાદ ૧૧ જાન્યુઆરીએ તેનું અવસાન થયું હતું. તેણીના મૃત્યુના પગલે પટનામાં ભારે વિરોધ પ્રદર્શન થયા હતા, જેના પગલે પટનાની પોલીસે ગર્લ્સ હોસ્ટેલના માલિકની ધરપકડ કરી હતી. વિદ્યાર્થીનીનાં માતાપિતા દ્વારા આરોપ લગાડવામાં આવ્યો હતો કે પોલીસ કેસને રફેદફે કરવાની કોશિષ કરી રહી છે.
– આ લેખમાં પ્રગટ થયેલાં વિચારો લેખકનાં પોતાના છે.
