અમેરિકાના રાષ્ટ્રપતિ Donald Trumpએ ઈરાન સાથે ચાલતાં યુદ્ધ પર મહત્વપૂર્ણ નિવેદન આપ્યું છે. તેમણે કહ્યું કે આ લશ્કરી સંઘર્ષ આગામી ચાર અઠવાડિયા સુધી ચાલી શકે છે. “અમે અંદાજ લગાવ્યો હતો કે તે ચાર અઠવાડિયા કે તેથી ઓછા સમય માટે રહેશે,” ટ્રમ્પે ડેઇલી મેઇલ સાથેના ઈન્ટરવ્યૂમાં જણાવ્યું. ટ્રમ્પે યુદ્ધમાં મૃત્યુ પામેલા ત્રણ યુએસ સૈનિકોને શ્રદ્ધાંજલિ આપી, તેમના પરિવાર સાથે સંપર્ક કરવા અને વ્યક્તિગત મુલાકાત કરવા પણ જણાવ્યું. તેમણે જણાવ્યું કે આ તેમના કાર્યકાળ દરમિયાન અમેરિકન સૈનિકોની પ્રથમ જાનહાનિ છે, અને તે દુઃખદ ઘટના છે. ઉલ્લેખનીય છે કે યુદ્ધમાં અમેરિકી લશ્કરી કામગીરી શિડ્યૂલ મુજબ ચાલી રહી છે. ટ્રમ્પે કહ્યું કે “અમે ઈરાનના નેતૃત્વને શક્ય તેટલું નષ્ટ કરી દીધું છે” અને ઓપરેશનમાં 43 ઈરાની સૈનિકોની હત્યા થઈ છે. ઈરાન સાથે ભવિષ્યમાં વાતચીતની શક્યતા અંગે ટ્રમ્પે કહ્યું કે તેઓ તેના માટે તૈયાર છે. તેમણે કહ્યું કે ઈરાની પક્ષ વાત કરવા માંગે છે, પરંતુ તેમનું માનવું છે કે તેઓએ ગયા અઠવાડિયે આ પ્રયાસ કરવો જોઈતો હતો. હાલમાં તેઓ જનરલો સાથે બેઠક કરી રહ્યા છે અને અપડેટ્સ મેળવી રહ્યા છે.
ટ્રમ્પે એમ પણ કહ્યું કે સાઉદી અરેબિયા પણ યુદ્ધમાં જોડાઈ રહ્યું છે કારણ કે તેને પણ નિશાન બનાવવામાં આવ્યું હતું. તેમણે બહેરીન, કતાર અને જોર્ડન જેવા મિત્ર દેશોના નેતાઓ સાથે પણ ચર્ચા કરી છે. રાષ્ટ્રપતિએ આશા વ્યક્ત કરી કે અમેરિકા અને ઇઝરાયલી હુમલાઓ પછી ઈરાનમાં લોકશાહી આવી શકે છે. તેમણે કહ્યું કે ઘણી સકારાત્મક બાબતો હોઈ શકે છે જે જોવા માટે રસપ્રદ રહેશે. હાલમાં મધ્ય પૂર્વમાં અમેરિકન લશ્કરી અભિયાન સંપૂર્ણ તાકાતથી ચાલુ છે. ટ્રમ્પે આશા વ્યક્ત કરી કે યુદ્ધ પછી ઈરાનમાં લોકશાહી તરફ પગલાં થઈ શકે છે અને શક્ય સકારાત્મક પરિણામો આવી શકે છે.
