અટલ બ્રિજ પાસેથી પીસીબીએ દારૂ ભરેલી કાર પકડી
દારૂ, કાર અને મોબાઇલ સહિત રૂ.15.07 લાખનો મુદ્દામાલ જપ્ત
વડોદરા, તા. 13
હરિયાણાથી કારમાં વિદેશી દારૂનો જથ્થો ભરી લાવનાર બુટલેગરને પીસીબીની ટીમે ઝડપી પાડયો છે. પોલીસે આરોપી પાસેથી 368 બોટલ વિદેશી દારૂ, કાર અને મોબાઇલ સહિત રૂ.15.07 લાખનો મુદ્દામાલ કબજે કર્યો છે.
PCB પોલીસની ટીમ વિસ્તારમા પેટ્રોલિંગમા ફરી રહી હતી તે દરમિયાન બાતમી મળી હતી કે રાવપુરા વિસ્તારનો શાહરૂખ શેખ કારમાં દારૂનો જથ્થો લઈને અટલ બ્રિજ નીચે આવેલા આંબેડકર સર્કલ પાસેથી પસાર થવાનો છે. બાતમીના આધારે PCBની ટીમે અકોટા પોલીસ સ્ટેશન વિસ્તારમાં વોચ ગોઠવી હતી.
દરમિયાન બાતમી મુજબની કાર આવતા તેને રોકી તપાસ કરતાં કારમાંથી વિદેશી દારૂનો મોટો જથ્થો મળી આવ્યો હતો. પોલીસે કાર ચાલક અને બુટલેગર શાહરૂખ જફર શેખ ( રહે. મહંમદ મંઝિલ, સરદાર ભુવનનો ખાંચો, રાવપુરા રોડ)ને સ્થળ પરથી ઝડપી પાડ્યો હતો.
આરોપી સામે અગાઉ પ્રોહિબિશન તેમજ અન્ય 17 ગુનાઓ નોંધાયેલા છે. ઉપરાંત તેની સામે ત્રણ વખત પાસા હેઠળ અટકાયતના હુકમો પણ જારી કરવામાં આવ્યા હતા.
પોલીસે આરોપી પાસેથી રૂ.4.67 લાખનો વિદેશી દારૂ, રૂ.10 લાખની કાર અને રૂ.40 હજારનો મોબાઇલ મળી રૂ.15.07 લાખનો મુદ્દામાલ જપ્ત કર્યો છે. સમગ્ર મામલે અકોટા પોલીસ સ્ટેશનમાં ગુનો નોંધાવી વધુ તપાસ હાથ ધરવામાં આવી છે.
