શિનોર |
વડોદરા જિલ્લા કલેક્ટર દ્વારા માલસર–અસા નર્મદા બ્રિજની ડાબી બાજુના રોડ પર ભારે વાહનો પર પ્રતિબંધ મૂકતું જાહેરનામું બહાર પાડતા વિસ્તારના ખેડૂતો મુશ્કેલીમાં મુકાયા છે.
નર્મદા નદી પર આવેલો લગભગ 3 કિલોમીટર લાંબો માલસર–અસા બ્રિજ માલસર અને અસા ગામોને જોડે છે. આ માર્ગ પરથી કેળાં સહિત વિવિધ કૃષિ ઉપજની રોજબરોજ મોટી માત્રામાં હેરફેર કરવામાં આવે છે.
કલેક્ટરના જાહેરનામા અનુસાર બ્રિજની ડાબી બાજુના રોડ પર ભારે વાહનો માટે પ્રતિબંધ મુકાતા ખેડૂતોને તૈયાર પાક માર્કેટ સુધી પહોંચાડવામાં અડચણો ઊભી થવાની સ્થિતિ સર્જાઈ છે.
ખેડૂતોનું કહેવું છે કે તંત્રએ સ્થળ પરિસ્થિતિની સમીક્ષા કર્યા વિના માત્ર ઓફિસમાંથી જ જાહેરનામું બહાર પાડ્યું છે, જેના કારણે ખેતી આધારિત વિસ્તારને ગંભીર અસર પડી રહી છે.
ખેડૂતોની રજૂઆત બાદ નાયબ કલેક્ટર, DYSP, શિનોર મામલતદાર તથા પોલીસ કાફલો માલસર પહોંચ્યો હતો. સ્થળ પર નિરીક્ષણ કરીને અહેવાલ જિલ્લા કલેક્ટરને સુપ્રત કરવાની ખાતરી આપવામાં આવી છે.
અધિકારીઓએ ખેડૂતોને આશ્વાસન આપ્યું કે પરિસ્થિતિને ધ્યાનમાં લઈ વહેલી તકે યોગ્ય નિર્ણય લેવામાં આવશે.
રિપોર્ટ ર ,: અમિત સોની
