જેટિંગ મશીન દ્વારા ડિવાઈડરની સફાઈ, વૃક્ષોનું ટ્રિમિંગ અને દબાણ હટાવવાની કામગીરી તેજ કરાઈ
વડોદરા: મહાનગરપાલિકા દ્વારા શહેરના દક્ષિણ વિસ્તારમાં આવેલા માંજલપુરને વધુ સ્વચ્છ અને સુઘડ બનાવવા માટે વિશેષ ઝુંબેશનો પ્રારંભ કરવામાં આવ્યો છે. માંજલપુરના મસિયા તળાવથી લઈને તુલસીધામ ચાર રસ્તા સુધીના વ્યસ્ત મુખ્ય માર્ગ પર પાલિકા દ્વારા અત્યાધુનિક જેટિંગ મશીન ઉતારીને ડિવાઈડરોની સફાઈ કરવાની કામગીરી હાથ ધરવામાં આવી છે. લાંબા સમયથી જમા થયેલી ધૂળ અને ગંદકીને હાઈ-પ્રેશર વોટર જેટિંગ દ્વારા દૂર કરવામાં આવી રહી છે, જેનાથી રોડની સુંદરતામાં વધારો થયો છે.
મળતી માહિતી મુજબ, આ કામગીરી માત્ર એક જ માર્ગ પૂરતી સીમિત રહેશે નહીં. પાલિકા પ્રશાસન દ્વારા વોર્ડ નંબર 16, 17, 18 અને 19 એમ ચારેય વોર્ડમાં એક પછી એક તમામ મુખ્ય અને આંતરિક માર્ગો પર આવેલા ડિવાઈડરોની સ્થિતિ તપાસી તેને સાફ કરવાનું આયોજન કરાયું છે. તંત્ર દ્વારા લેવાયેલા આ આક્રમક વલણને પગલે વિસ્તારના રહીશોમાં પણ સંતોષની લાગણી જોવા મળી રહી છે.
સફાઈની સાથે સાથે ટ્રાફિક અને સલામતીને ધ્યાનમાં રાખીને રોડ-રસ્તા પર નડતરરૂપ બનતી ઝાડની ડાળીઓનું કટિંગ પણ કરવામાં આવી રહ્યું છે. વાહનચાલકોને ડિવાઈડર કે સામેથી આવતા વાહનો જોવામાં તકલીફ ન પડે તે હેતુથી આ કામગીરી વેગીલી બનાવાઈ છે. વધુમાં, માર્ગો પર ગેરકાયદેસર રીતે ખડકાયેલા દબાણો અને લારી-ગલ્લાઓને કારણે સર્જાતી ટ્રાફિક જામની સમસ્યા નિવારવા માટે દબાણ શાખા દ્વારા કડક હાથે કામગીરી કરી રસ્તાઓ ખુલ્લા કરવામાં આવી રહ્યા છે.
આગામી દિવસોમાં પણ આ ઝુંબેશ ચાલુ રહેશે અને તમામ વોર્ડના મુખ્ય જંક્શનો પર રાત્રિ દરમિયાન અથવા ટ્રાફિક ઓછો હોય તેવા સમયે આ પ્રક્રિયા પૂર્ણ કરવામાં આવશે. પાલિકાની આ સઘન કામગીરીથી માંજલપુર વિસ્તારના મુખ્ય માર્ગો હવે વધુ પહોળા અને આકર્ષક દેખાશે.
