આણંદ : આણંદ જિલ્લાના સંવેદનશીલ પેટલાદમાં અશાંતધારો લાગુ કરવા માગણી ઉઠી છે. પશ્ચિમ અને દક્ષિણ દિશામાં મુસ્લિમ વિસ્તારથી ઘેરાયેલા આંજણાવાડમાં છેલ્લા કેટલાક સમયથી રહિશો વિધર્મીઓની પેશકદમીથી રહિશો ફફડી રહ્યાં છે અને અહીં તાત્કાલિક અશાંતધારો લાગુ કરવા માગણી કરવામાં આવી છે. ખાસ કરી લાડવાડા વિસ્તારની આગળ સ્થિતિ વધુ ગંભીર બની રહી છે. આ અંગે ચીફ ઓફિસરને રજુઆત કરી અશાંતધારો લાગુ કરવા માગણી કરવામાં આવી છે. પેટલાદના આંજણાવાડ વિસ્તારની કુલ વસતી 575ની છે, લગભગ દોઢ સો વર્ષથી આ વિસ્તારમાં આંજણા પટેલ, ચૌધરી સમાજના પરિવારો રહે છે. આ વિસ્તારને અડીને મુસ્લિમ વિસ્તાર આવેલો છે. આથી, આ વિસ્તારમાં અશાંતધારો લાગુ કરવા જરૂરિયાત ઉભી થઇ છે.
આંજણાવાડ વિસ્તારમાં 1970-71થી કોમી તોફાન, કોમી રમખાણો, હુલ્લડ થતા આવ્યાં છે. આ બાબતે કોઇ સમાધાન થયું નથી. આથી, આંજણાવાડના સભ્ય સમાજના સભ્યો ઘરબાર વેચવા મજબૂર બન્યાં છે. આથી, વિધર્મી આડકતરી રીતે હેરાન પરેશાન કરી રહ્યાં છે. જેથી કરી તેઓ આંજણાવાડ વિસ્તાર પર કબજો કરી શકે છે. પેટલાદના આંજણાવાડમાં કોમી તોફાન, રમખાણોમાં પોલીસ સ્ટેશન, કોર્ટ કચેરીના ધક્કા રહિશો ખાઇ રહ્યાં છે. આ વિસ્તારના અનેક યુવાનો સામેલ ન હોવા છતાં તેઓ ભોગ બન્યા છે અને તેમનું જીવન અંધકારમય બની ગયું છે. જે પરિસ્થિતિઓનો સામનો આવનારી પેઢીને ન કરવો પડે તે હેતુને ધ્યાને રાખી રજુઆત કરવામાં આવી છે.
આ રજુઆતમાં આંજણાવાડના રહિશોએ જણાવ્યું હતું કે, કેટલાક ઘર પર વિધર્મી સંપ્રદાયના સમુહ દ્વારા હેરાન પરેશાન, જબરજસ્તી કરી, પજવણી કરી આડકતરી રીતે વેચવા માટે મજબૂર કરી ખરીદી કરી ચૂક્યા છે, અમારા સભ્ય સમાજના લોકો હેરાન પરેસાન થઇ વેચી ચુક્યા છે. જેઓના સંપ્રદાયનો પગપેસારો ઘુષણખોરી આવનારા સમયમાં આ વિસ્તારમાં ન થાય તેવા જનહીતને ધ્યાને રાખી રજુઆત કરવામાં આવી છે. આવનારા સમયમાં આ વિસ્તારને મધ્યે આવેલા કુળદેવી બહુચર માતાના પ્રાચીન મંદિર પર તથા ચોતરફે આવેલા સીમા ઉપર ઘાતક હુમલો વિધર્મી દ્વારા થાય તેવી ભરપુર શક્યતાઓ છે. આ બાબતના અનુસંધાને હિન્દુ સમાજની લાગણી ન દુભાય તથા હિન્દુ સમાજના રક્ષણ માટે તાત્કાલિક આ વિસ્તારમાં અશાંતધારો લાગુ કરવા માગણી કરવામાં આવી છે.
