નાગરવાડા વિસ્તારમાં ભાજપની વોટર સ્લીપો બિનવારસી હાલતમાં મળતા સ્થાનિકોમાં ભારે રોષ
વડોદરા શહેરમાં સ્થાનિક સ્વરાજ્યની ચૂંટણીનો માહોલ ચરમસીમાએ છે ત્યારે શહેરના વોર્ડ નંબર 7 માં એક ચોંકાવનારી ઘટના સામે આવી છે. ભારતીય જનતા પાર્ટી દ્વારા ‘ભરોસાની સરકાર’ ના નારા સાથે જોરશોરથી પ્રચાર કરવામાં આવી રહ્યો છે, પરંતુ આ જ પક્ષના કાર્યકરોએ પક્ષ અને મતદારોના વિશ્વાસ પર પાણી ફેરવી દીધું હોય તેવા દ્રશ્યો જોવા મળ્યા છે. વોર્ડ નંબર 7 ના ભાજપના ઉમેદવારોની પ્રચાર સ્લીપો મતદારોના ઘર સુધી પહોંચાડવાને બદલે નાગરવાડા વિસ્તારમાં રસ્તા પર રઝળતી અને કચરાપેટીમાં ફેંકાયેલી હાલતમાં મળી આવતા રાજકીય ગરમાવો વ્યાપી ગયો છે.
ચૂંટણીમાં દરેક મત કિંમતી હોય છે અને મતદારો સુધી માહિતી પહોંચાડવા માટે વોટર સ્લીપ એક મહત્વનું માધ્યમ છે. પક્ષ દ્વારા જે કાર્યકરોને વિશ્વાસ સાથે આ સ્લીપો ઘરે-ઘરે વહેંચવાની જવાબદારી સોંપવામાં આવી હતી, તેમની ઘોર આળસ અને નિષ્કાળજીને કારણે આજે લોકશાહીની મજાક ઊડી રહી હોય તેવો ઘાટ સર્જાયો છે. સ્થાનિક રહીશોમાં આ બાબતે ભારે રોષ જોવા મળી રહ્યો છે. લોકોનું કહેવું છે કે જો સ્લીપો જ સમયસર નહીં મળે તો અનેક મતદારો માહિતીના અભાવે મતદાનથી વંચિત રહી શકે છે.
એક તરફ ભાજપ કેડર-બેઝ્ડ પાર્ટી હોવાનો દાવો કરે છે, ત્યારે બીજી તરફ કાર્યકરોની આવી ગંભીર બેદરકારીએ પક્ષની છબી ખરડી છે. ‘ભરોસાની સરકાર’ ના સૂત્ર વચ્ચે કાર્યકરોએ જ કરેલો આ ‘વિશ્વાસઘાત’ હવે પક્ષ માટે ચર્ચાનો વિષય બન્યો છે. આ ઘટના સાબિત કરે છે કે પ્રચારના પાયાના કામમાં ક્યાંક ગંભીરતાનો અભાવ છે. જો આ જ રીતે બેદરકારી ચાલુ રહેશે તો તેની સીધી અસર ચૂંટણીના પરિણામો પર પડી શકે છે તેવી શક્યતાઓ પણ રાજકીય વિશ્લેષકો સેવી રહ્યા છે. હાલ તો આ રઝળતી સ્લીપોએ સમગ્ર વિસ્તારમાં ચર્ચા જગાવી છે અને પક્ષના મોવડી મંડળ સામે પણ સવાલો ઊભા કર્યા છે.
