અયોધ્યા રામ મંદિરના ચઢાવા વિવાદ પર અભિનેત્રીનો સરકાર પર સવાલ; ‘શ્રેય લેતા બધા આગળ આવે છે, પરંતુ ગેરરીતિ થાય ત્યારે જવાબદારી કોણ લેશે?’ કહી વ્યક્ત કર્યો આક્રોશ
અયોધ્યાના રામ મંદિરના ચઢાવા અને દાનમાં થયેલી કથિત ગેરરીતિના મામલે દેશભરમાં ચર્ચા ચાલી રહી છે. આ મુદ્દે રાજકીય પક્ષો ઉપરાંત હવે ફિલ્મ અને ટેલિવિઝન જગતની હસ્તીઓ પણ પોતાની પ્રતિક્રિયા આપી રહી છે. ટીવી અભિનેત્રી દેવોલીના ભટ્ટાચાર્યએ સોશિયલ મીડિયા પર લાંબી પોસ્ટ શેર કરીને સમગ્ર મામલે ગંભીર સવાલો ઉઠાવ્યા છે. તેમણે કહ્યું કે જ્યારે રામ મંદિરના નિર્માણનો શ્રેય લેવાની વાત આવે છે ત્યારે દરેક રાજકીય નેતા આગળ રહે છે, પરંતુ જ્યારે ચોરી, ગેરરીતિ અથવા ભ્રષ્ટાચારના આરોપો સામે આવે છે ત્યારે જવાબદારી લેવા કોઈ તૈયાર દેખાતું નથી.
દેવોલીનાએ પોતાની પોસ્ટમાં લખ્યું કે રામ મંદિરના નિર્માણને લઈને અનેક રાજકીય પક્ષોએ ચૂંટણી દરમિયાન તેને મોટો મુદ્દો બનાવ્યો હતો. મંદિરના નિર્માણનો શ્રેય પણ જાહેરમાં લેવામાં આવ્યો હતો અને કરોડો શ્રદ્ધાળુઓની આસ્થાને રાજકીય રીતે પણ રજૂ કરવામાં આવી હતી. પરંતુ હવે જ્યારે ચઢાવા અને દાનમાં ગેરરીતિના આરોપો સામે આવ્યા છે ,જવાબદારી કોણ લેશે તે સૌથી મોટો પ્રશ્ન છે.
અભિનેત્રીએ આગળ લખ્યું કે, “શું માત્ર સારા કામનો જ શ્રેય લેવો છે? જ્યારે કોઈ ભૂલ, ગેરરીતિ કે ચોરીનો આરોપ લાગે ત્યારે જવાબદારી ક્યાં ગાયબ થઈ જાય છે?” તેમણે જણાવ્યું કે રાજકારણમાં માત્ર સિદ્ધિઓનો જ પ્રચાર ન થવો જોઈએ, પરંતુ જો કોઈ ખામી સામે આવે તો તેની પણ પારદર્શક રીતે જવાબદારી સ્વીકારવી જોઈએ.દેવોલીનાએ ખાસ ભાર મૂક્યો કે રામ મંદિર માત્ર એક ઇમારત નથી પરંતુ કરોડો હિન્દુઓની આસ્થા અને શ્રદ્ધાનું કેન્દ્ર છે. લાખો-કરોડો ભક્તોએ ભગવાન શ્રીરામ પ્રત્યેની ભક્તિ અને વિશ્વાસથી દાન આપ્યું છે. તેથી આ વિશ્વાસની સંપૂર્ણ સુરક્ષા થવી જોઈએ અને દરેક દાનનો પારદર્શક હિસાબ જનતા સમક્ષ હોવો જોઈએ. .
વધુમાં તેમણે લખ્યું કે શ્રદ્ધાળુઓના વિશ્વાસ સાથે કોઈપણ પ્રકારની ગેરરીતિ અત્યંત ગંભીર બાબત છે.તેમણે પોતાની પોસ્ટમાં એ પણ જણાવ્યું કે આજકાલ એક જ પ્રકારની પરંપરા જોવા મળે છે.સફળતા મળે ત્યારે દરેક તેનો શ્રેય લેવા તૈયાર હોય છે, પરંતુ જ્યારે સવાલો પૂછવામાં આવે ત્યારે જવાબદારીથી દૂર ભાગવાનો પ્રયાસ કરવામાં આવે છે. દેવોલીનાના મત મુજબ આ વલણ બદલાવું જરૂરી છે અને જાહેર જીવનમાં રહેલા દરેક વ્યક્તિએ પારદર્શિતા તથા જવાબદારીનું પાલન કરવું જોઈએ.
અયોધ્યા રામ મંદિરના ચઢાવા વિવાદને લઈને છેલ્લા કેટલાક દિવસોમાં દેશભરમાં રાજકીય અને સામાજિક ચર્ચા ચાલી રહી છે. કથિત ગેરરીતિના મામલે તપાસ એજન્સીઓ કાર્યવાહી કરી રહી છે અને અનેક લોકોની ધરપકડ પણ કરવામાં આવી છે. તપાસ દરમિયાન કથિત રીતે લાખો રૂપિયાની રકમ પણ જપ્ત કરવામાં આવી હોવાનું અધિકારીઓએ જણાવ્યું છે.
આ સમગ્ર મામલાને લઈને વિવિધ રાજકીય પક્ષોએ પણ સરકાર સામે સવાલો ઉઠાવ્યા છે. જ્યારે કેટલાક વિરોધ પક્ષોના નેતાઓએ આ ઘટનાને કરોડો શ્રદ્ધાળુઓની લાગણીઓ સાથે જોડાયેલો મુદ્દો ગણાવ્યો છે અને નિષ્પક્ષ તપાસની માંગ કરી છે. બીજી તરફ સત્તાપક્ષ તરફથી તપાસ ચાલુ હોવાનું જણાવવામાં આવ્યું છે અને દોષિતો સામે કડક કાર્યવાહી કરવાની ખાતરી આપવામાં આવી છે.
આ વિવાદ વચ્ચે કેટલીક મહત્વપૂર્ણ વહીવટી ઘટનાઓ પણ બની છે. શ્રી રામ જન્મભૂમિ તીર્થ ક્ષેત્ર ટ્રસ્ટના મહાસચિવ ચંપત રાયે નૈતિક જવાબદારી સ્વીકારીને રાજીનામું આપ્યું છે. ટ્રસ્ટી અનિલ મિશ્રાએ પણ પોતાના પદ પરથી રાજીનામું આપ્યું છે. આ રાજીનામાઓ બાદ સમગ્ર મામલો વધુ ચર્ચામાં આવ્યો છે અને ટ્રસ્ટના વહીવટ અંગે પણ પ્રશ્નો ઉઠી રહ્યા છે.
બીજી તરફ, આ સમગ્ર મામલે સુપ્રીમ કોર્ટમાં સીબીઆઈ તપાસની માંગ કરતી અરજી પણ કરવામાં આવી હતી. જોકે સર્વોચ્ચ અદાલતે તાત્કાલિક સુનાવણી આપવાનો ઇનકાર કરતાં જણાવ્યું હતું કે નિયમિત પ્રક્રિયા મુજબ મામલો આગળ વધશે અને ઉતાવળમાં નિર્ણય લેવાની જરૂર નથી.
દેવોલીના ભટ્ટાચાર્યની પોસ્ટ સોશિયલ મીડિયા પર ઝડપથી વાયરલ થઈ રહી છે. અનેક લોકોએ તેમની વાતને સમર્થન આપ્યું છે અને કહ્યું છે કે ધાર્મિક સ્થળો પર મળતા દાન અને ચઢાવાના ઉપયોગમાં સંપૂર્ણ પારદર્શિતા હોવી જોઈએ. જ્યારે કેટલાક લોકોએ તેમના નિવેદનને રાજકીય ગણાવીને અસહમતિ પણ વ્યક્ત કરી છે. તેમ છતાં તેમની પોસ્ટે સમગ્ર ચર્ચાને વધુ વેગ આપ્યો છે.રામ મંદિર દેશના કરોડો લોકોની આસ્થા સાથે જોડાયેલું પ્રતિક છે. તેથી ચઢાવા અને દાનને લઈને ઊભા થયેલા વિવાદે સામાન્ય ભક્તોથી લઈને રાજકીય નેતાઓ અને મનોરંજન જગતની હસ્તીઓ સુધી સૌનું ધ્યાન ખેંચ્યું છે. હવે તપાસ એજન્સીઓની કાર્યવાહી, કોર્ટની પ્રક્રિયા અને સરકારના આગામી પગલાં પર સૌની નજર ટકેલી છે.
દેવોલીનાના નિવેદને એક મહત્વનો સવાલ ફરી ચર્ચામાં લાવ્યો છે,ધાર્મિક આસ્થા સાથે જોડાયેલા દાનમાં જો ગેરરીતિના આરોપો લાગે તો માત્ર તપાસ પૂરતી છે કે પછી જવાબદારી પણ નક્કી થવી જોઈએ? આ પ્રશ્નનો જવાબ હવે તપાસ અને કાયદાકીય પ્રક્રિયા પૂર્ણ થયા બાદ જ સ્પષ્ટ થઈ શકશે.
