સુરતમાં આયોજિત ‘વાઇબ્રન્ટ ગુજરાત રિજનલ કોન્ફરન્સ’ આ વર્ષે માત્ર ઉદ્યોગ અને રોકાણ પૂરતી સીમિત ન રહેતા, કૃષિ અને ખાદ્ય ક્ષેત્રમાં પણ એક નવી ઓળખ બનાવી રહી છે. આ કોન્ફરન્સનું એક ખાસ આકર્ષણ એટલે ‘મેંગો ફેસ્ટિવલ’. જ્યાં દેશભરની જાણીતી કેરીઓનો જમાવડો જોવા મળી રહ્યો છે. ખાસ કરીને આફૂસ (Alphonso) અને કેસર કેરી માટે લોકોમાં ભારે ઉત્સાહ જોવા મળી રહ્યો છે. આ મેંગો ફેસ્ટિવલનો મુખ્ય હેતુ દક્ષિણ ગુજરાતના ખેડૂતોને એક સીધો મંચ આપવાનો છે, જ્યાં તેઓ પોતાની ઉપજ ગ્રાહકો સુધી સીધી પહોંચાડી શકે. સામાન્ય રીતે ખેડૂતોને પોતાની ઉપજ વેચવા માટે વચેટિયાઓ પર નિર્ભર રહેવું પડે છે, જેના કારણે તેમને યોગ્ય ભાવ મળતો નથી. પરંતુ અહીં ‘ફાર્મ ટુ ફોર્ક’ મોડલ દ્વારા ખેડૂતો સીધા ગ્રાહકો સાથે જોડાઈ રહ્યા છે, જેના કારણે બંનેને ફાયદો થઈ રહ્યો છે.
ફેસ્ટિવલમાં વલસાડ, નવસારી અને ડાંગ જિલ્લાના ખેડૂતો ખાસ ભાગ લઈ રહ્યા છે. તેઓ પોતાની વાડીઓમાં પકવેલી કેરીઓ અહીં વેચાણ માટે લાવ્યા છે. આ કેરીઓની ખાસ વાત એ છે કે તે કેમિકલ વગર, સંપૂર્ણપણે ઓર્ગેનિક રીતે ઉગાડવામાં આવી છે. આજકાલ બજારમાં ઘણીવાર કાર્બાઇડ વડે પકવેલી કેરીઓ મળતી હોય છે, જે સ્વાસ્થ્ય માટે હાનિકારક બની શકે છે. પરંતુ આ ફેસ્ટિવલમાં એવી કેરીઓને પ્રાથમિકતા આપવામાં આવી છે જે કુદરતી રીતે પકવવામાં આવી છે. મુલાકાતીઓ માટે આ ફેસ્ટિવલ માત્ર ખરીદીનો જ નહીં, પરંતુ શીખવાનો પણ એક સારો મોકો છે. અહીં લોકો ખેડૂતો સાથે સીધો સંવાદ કરી રહ્યા છે અને ઓર્ગેનિક ખેતી કેવી રીતે થાય છે તે અંગે માહિતી મેળવી રહ્યા છે. ઘણા લોકો માટે આ અનુભવ નવો અને રસપ્રદ બની રહ્યો છે.
વિવિધ જાતોની વાત કરીએ તો, આફૂસ અને કેસર ઉપરાંત રાજાપુરી, તોતાપુરી અને લંગડો જેવી અનેક પ્રકારની કેરીઓ અહીં ઉપલબ્ધ છે. દરેક કેરીનો પોતાનો અલગ સ્વાદ અને સુગંધ છે, જે મુલાકાતીઓને આકર્ષે છે. ખાસ કરીને કેસર અને આફૂસ કેરી માટે લોકોમાં ખાસ માંગ જોવા મળી રહી છે. આ ફેસ્ટિવલ ખેડૂતો માટે આવક વધારવાનો એક સારો અવસર બની રહ્યો છે. તેમને પોતાની મહેનતનું યોગ્ય મૂલ્ય મળી રહ્યું છે, જ્યારે ગ્રાહકોને તાજી, સ્વાદિષ્ટ અને કેમિકલ મુક્ત કેરીઓ મળી રહી છે. આ પ્રકારની પહેલથી લોકોમાં સ્વસ્થ ખોરાક પ્રત્યે જાગૃતિ પણ વધે છે. સુરતનો આ મેંગો ફેસ્ટિવલ ખેતી, આરોગ્ય અને સીધી ખરીદી વચ્ચેનો એક સુંદર જોડાણ બની રહ્યો છે. આ પહેલ ભવિષ્યમાં અન્ય શહેરો માટે પણ એક પ્રેરણા બની શકે છે.
