વર્ષ 2024 T20 વર્લ્ડ કપ (T20 World Cup) માટે ખૂબ જ મહત્વપૂર્ણ છે. આ જ કારણ છે કે લગભગ તમામ ટીમો T20 ક્રિકેટ (Cricket) તરફ વળ્યા છે. મેન્સ ટી20 વર્લ્ડ કપ વેસ્ટ ઈન્ડિઝ અને યુએસએમાં રમાવાનો છે. મહિલા T20 વર્લ્ડ કપ બાંગ્લાદેશમાં રમાશે. ICCએ પુરુષોના T20 વર્લ્ડ કપનું શેડ્યૂલ પણ બહાર પાડ્યું છે પરંતુ મહિલા શેડ્યૂલ હજુ આવવાનું બાકી છે. દરમિયાન વેસ્ટ ઈન્ડિઝના ચાર વર્લ્ડ ચેમ્પિયન ખેલાડીઓએ અચાનક નિવૃત્તિની જાહેરાત કરીને તેમની ટીમને મોટો ઝટકો આપ્યો છે. આ ચાર ખેલાડીઓએ વર્ષ 2016માં વર્લ્ડ કપ પણ જીત્યો હતો.
આ ચાર ખેલાડીઓ નિવૃત્ત થયા
તમને જણાવી દઈએ કે વેસ્ટ ઈન્ડિઝની ચાર મહિલા ખેલાડીઓએ સંન્યાસ લેવાની જાહેરાત કરી છે. તેમાં અનીસા મોહમ્મદ, શકેરા સેલમેન, કિસિયા અને કિશોના નાઈટના નામ સામેલ છે. આ ખેલાડીઓએ આ સાથે જ આંતરરાષ્ટ્રીય ક્રિકેટમાંથી નિવૃત્તિની જાહેરાત કરી દીધી છે. આ તમામ 2016માં T20 વર્લ્ડ કપ જીતનાર ટીમનો ભાગ હતી. મહિલા ટી20 વર્લ્ડ કપ આ વર્ષના અંતમાં સપ્ટેમ્બર-ઓક્ટોબરમાં રમાશે.
ઑફ-સ્પિનર અનીસા મોહમ્મદે 2003માં 15 વર્ષની ઉંમરે આંતરરાષ્ટ્રીય ક્રિકેટમાં પદાર્પણ કર્યું હતું અને 21 વર્ષ પછી ODI અને T20I બંનેમાં વેસ્ટ ઈન્ડિઝ માટે અગ્રણી વિકેટ લેનાર તરીકે નિવૃત્ત થઈ હતી. T20 ઇન્ટરનેશનલમાં 100 વિકેટ પૂરી કરનાર કેરેબિયન ટાપુઓમાંથી તે પ્રથમ પુરુષ અથવા મહિલા ક્રિકેટર છે. તે હેટ્રિક લેનારી વેસ્ટ ઈન્ડિઝની પ્રથમ મહિલા ક્રિકેટર પણ હતી. નિવૃત્તિ અંગે મોહમ્મદે કહ્યું કે છેલ્લા 20 વર્ષ ખરેખર અદ્ભુત રહ્યા છે, મેં તેની એક-એક મિનિટનો આનંદ માણ્યો છે. હું માનું છું કે હવે સમય આવી ગયો છે કે હું રમતથી દૂર થઈ જઈએ અને યુવા ખેલાડીઓને મારા જેવા તેમના સપનાઓ જીવવા દઈએ. મને મારી કારકિર્દીમાં 258 વખત મરૂન કલર પહેરીને મેદાનમાં ઉતરવાનું સૌભાગ્ય મળ્યું છે.
મધ્યમ ગતિની બોલર શકીરા સેલમેને તેની આંતરરાષ્ટ્રીય કારકિર્દી 2008માં શરૂ કરી હતી અને તેણે 100 ODI અને 96 T20 મેચ રમી હતી, જેમાં તેણે અનુક્રમે 82 અને 51 વિકેટ લીધી હતી. બીજી તરફ જોડિયા બહેનો કિસિયા અને કિશોના નાઈટ આવતા મહિને 32 વર્ષની થશે. બંને ખેલાડીઓએ આટલી નાની ઉંમરે નિવૃત્તિની જાહેરાત કરી હતી. કિસિયાએ 2011માં અને કિશોના નાઈટ 2013માં આંતરરાષ્ટ્રીય ક્રિકેટમાં ડેબ્યૂ કર્યું હતું અને વેસ્ટ ઈન્ડિઝ માટે ઘણી મેચ રમી હતી. વિકેટકીપર બેટ્સમેન કિસિયા નાઈટ 87 ODI અને 70 T20I રમી છે, તેની જોડિયા બહેને 51 ODI અને 55 T20I રમી છે. આ ચાર ખેલાડીઓની નિવૃત્તિથી ક્રિકેટ ચાહકો ચોંકી ગયા છે.
