નવી દિલ્હી: ઈન્ડિયન પ્રીમિયર લીગ (IPL) 2023ની તૈયારીઓ શરૂ થઈ ગઈ છે. BCCI દ્વારા 23 ડિસેમ્બરે મિની ઓક્શનનું આયોજન કરવામાં આવ્યું છે, એટલે કે હવે એ સ્પષ્ટ થઈ ગયું છે કે કયો ખેલાડી કઈ ટીમ માટે રમતા જોવા મળશે. તમામ ટીમોએ પોતાની ટીમ તૈયાર કરી છે. આ સાથે, ટીમો હવે તેમના સપોર્ટ સ્ટાફને તૈયાર કરવામાં વ્યસ્ત છે કારણ કે આઈપીએલમાં માત્ર ત્રણ મહિના બાકી છે. દરમિયાન હવે સમાચાર આવી રહ્યા છે કે ભારતીય ટીમના પૂર્વ કેપ્ટન અને બીસીસીઆઈના પૂર્વ અધ્યક્ષ (BCCI Former President ) સૌરવ ગાંગુલી (Sourav Ganguly) ફરીથી IPLમાં પરત ફરી રહ્યા છે. પરંતુ આ વખતે તે નવા રોલમાં જોવા મળશે. IPL ટીમ સાથે જોડાઈને તે ટીમની રણનીતિ બનાવશે અને ટીમને IPL ચેમ્પિયન બનવામાં પણ મદદ કરશે.
સૌરવ ગાંગુલી આ ટીમના ક્રિકેટ ડિરેક્ટર બનશે
મળતી માહિતી અનુસાર બીસીસીઆઈના પૂર્વ અધ્યક્ષ સૌરવ ગાંગુલી આઈપીએલ ટીમ દિલ્હી કેપિટલ્સમાં (Delhi Capitals) ડિરેક્ટર ઓફ ક્રિકેટ (Director of Cricket) તરીકે જોડાઈ શકે છે. સૌરવ ગાંગુલીએ ગયા વર્ષે ઓક્ટોબરમાં બીસીસીઆઈના અધ્યક્ષ પદ પરથી રાજીનામું આપી દીધું હતું અને તે પછી રોજન બિન્ની નવા પ્રમુખ બન્યા હતા. તે સમયે એવા અહેવાલો પણ આવ્યા હતા કે સૌરવ ગાંગુલીને આઈપીએલના અધ્યક્ષ પદની ઓફર કરવામાં આવી છે, પરંતુ તેણે પોતે આ પદ લેવાનો ઈન્કાર કરી દીધો હતો કારણ કે તે અગાઉ બીસીસીઆઈ અધ્યક્ષ હતા. ત્યારથી એવી અટકળો લગાવવામાં આવી રહી હતી કે સૌરવ ગાંગુલીનો ભાવિ પ્લાન શું હશે.
શું તે ટીમ ઈન્ડિયા સાથે કોઈ ક્ષમતામાં જોડાયેલ હશે કે પછી તે આઈપીએલમાં કોઈ ટીમ સાથે કામ કરશે. ત્યારે હવે સૌરવ ગાંગુલી માત્ર દિલ્હી કેપિટલ્સમાં જ નહીં, પરંતુ બાકીની લીગમાં દિલ્હીની ટીમ દ્વારા ખરીદેલી ટીમોમાં પણ ભૂમિકા ભજવશે. દિલ્હી કેપિટલ્સ ILTeamમાં દુબઈ કેપિટલ્સ અને દક્ષિણ આફ્રિકા લીગમાં પ્રિટોરિયા કેપિટલ્સનું કામ પણ જોશે.
સૌરવ ગાંગુલી અને રિકી પોન્ટિંગ દિલ્હી કેપિટલ્સમાં સાથે કામ કરશે
દિલ્હી કેપિટલ્સના એક અધિકારીએ જણાવ્યું કે સૌરવ આ વર્ષે દિલ્હી કેપિટલ્સ સાથે પરત ફરશે. અધિકારીએ કહ્યું છે કે સૌરવ ગાંગુલી અગાઉ પણ દિલ્હી કેપિટલ્સ સાથે કામ કરી ચૂક્યો છે. ટીમના માલિકો સાથે તેના સારા સંબંધો છે. આ પહેલા પણ તે વર્ષ 2019માં દિલ્હી કેપિટલ્સના મેન્ટર હતા. હવે દિલ્હી કેપિટલ્સને વિશ્વના બે દિગ્ગજ કેપ્ટન મળ્યા છે, એક સૌરવ ગાંગુલી અને બીજા છે ઓસ્ટ્રેલિયાના વિશ્વ વિજેતા કેપ્ટન રિકી પોન્ટિંગ. જોકે દિલ્હી કેપિટલ્સ એક એવી ટીમ છે, જે સારા ખેલાડીઓ હોવા છતાં એક પણ વખત આઈપીએલ ટાઈટલ જીતવામાં સફળ રહી નથી.
ટીમનું નામ પહેલા દિલ્હી ડેરડેવિલ્સ હતું, પરંતુ બાદમાં જ્યારે ટીમનું પ્રદર્શન સારું ન રહ્યું તો તેનું નામ બદલીને દિલ્હી કેપિટલ્સ કરવામાં આવ્યું, પરંતુ ટીમ હજુ પણ ટ્રોફીથી દૂર છે. આ વખતે માનવામાં આવી રહ્યું છે કે ટીમના કેપ્ટન ઋષભ પંત પણ IPL રમી શકશે નહીં. કારણ કે 31 ડિસેમ્બરે જ તેમનો કાર અકસ્માત થયો હતો, જેમાં તેઓ ગંભીર રીતે ઘાયલ થયા હતા. ત્યારે જોવાનું રહેશે કે પંત ફિટ છે કે નહીં. જો નહીં, કે ટીમે પોતાનો નવો કેપ્ટન પણ પસંદ કરવો પડશે.
