રશિયા અને યુક્રેન વચ્ચેનું યુદ્ધ ભયાનક બની રહ્યું છે. રશિયા યુક્રેન પર એક પછી એક ઘાતક હુમલાઓ સતત કરી રહ્યું છે. રશિયા અને યુક્રેન વચ્ચેનું યુદ્ધ ત્રણ વર્ષથી વધુ સમયથી ચાલી રહ્યું છે. આ ત્રણ વર્ષના યુદ્ધમાં રશિયાએ શુક્રવારે રાત્રે યુક્રેનની રાજધાની કિવ પર સૌથી મોટો હવાઈ હુમલો કર્યો છે. રશિયા દ્વારા કરવામાં આવેલા હુમલાઓમાં 23 લોકો ઘાયલ થયા છે અને રાજધાનીના ઘણા જિલ્લાઓમાં ભારે નુકસાન થયું છે.
રશિયન વાયુસેનાના જણાવ્યા અનુસાર તેણે રાત્રે યુક્રેન પર 550 ડ્રોન અને મિસાઇલ હુમલા કર્યા હતા. મોટાભાગના હુમલા શાહિદ ડ્રોનથી કરવામાં આવ્યા હતા જ્યારે 11 મિસાઇલોનો પણ ઉપયોગ કરવામાં આવ્યો હતો. કિવમાં તૈનાત એપી સંવાદદાતાઓના જણાવ્યા અનુસાર આખી રાત ડ્રોનની ગર્જના, વિસ્ફોટ અને મશીનગન ફાયરિંગનો અવાજ સંભળાયો હતો.
કિવના મેયર વિટાલી ક્લિત્સ્કોએ જણાવ્યું હતું કે રશિયન સેનાએ ખાસ કરીને રાજધાની પર નિશાન સાધ્યું હતું. તેમણે કહ્યું કે આ હુમલાઓમાં ઓછામાં ઓછા 23 લોકો ઘાયલ થયા છે જેમાંથી 14 હોસ્પિટલમાં દાખલ છે. યુક્રેનના હવાઈ સંરક્ષણ વિભાગે દાવો કર્યો છે કે તેણે બે ક્રુઝ મિસાઇલ સહિત 270 લક્ષ્યોને તોડી પાડ્યા છે. તેના અનુસાર અન્ય 208 લક્ષ્યો રડાર પરથી ગાયબ થઈ ગયા હતા અને એવું માનવામાં આવે છે કે તે જામ થઈ ગયા છે.
ટ્રમ્પ અને પુતિનની વાતચીત પછી હુમલો થયો
રશિયાની 9 મિસાઇલો અને 63 ડ્રોન 8 સ્થળોએ તેમના લક્ષ્યોને નિશાન બનાવવામાં સફળ રહ્યા. અટકાવવામાં આવેલા ડ્રોનનો કાટમાળ ઓછામાં ઓછો 33 સ્થળોએ પડ્યો. આ હુમલો યુએસ રાષ્ટ્રપતિ ડોનાલ્ડ ટ્રમ્પ અને રશિયન રાષ્ટ્રપતિ વ્લાદિમીર પુતિન વચ્ચેની વાતચીતના થોડા કલાકો પછી થયો હતો.
રશિયા અને યુક્રેન વચ્ચેના યુદ્ધમાં રશિયાને મોટો ફટકો પડ્યો છે. યુક્રેનિયન સરહદ નજીક કુર્સ્ક ક્ષેત્રમાં એક ટોચના રશિયન જનરલનું મોત થયું છે. રશિયન નૌકાદળના ડેપ્યુટી ચીફ મેજર જનરલ મિખાઇલ ગુડકોવનું મૃત્યુ યુક્રેનના સુમી ક્ષેત્રની સરહદે આવેલા પશ્ચિમી કુર્સ્ક ક્ષેત્રમાં થયું હતું. રશિયન સંરક્ષણ મંત્રાલયે કહ્યું કે જનરલ મિખાઇલનું મૃત્યુ ‘લશ્કરી કાર્યવાહી’ દરમિયાન થયું હતું. જોકે તેણે ઓપરેશન વિશે કોઈ વિગતો શેર કરી નથી.
