ચોમાસાનો વરસાદ હવે દેશના અનેક રાજ્યોમાં લોકો માટે મોટી મુશ્કેલી બની ગયો છે. ઉત્તર પ્રદેશ, ઉત્તરાખંડ, આસામ, બિહાર, રાજસ્થાન સહિતના અનેક વિસ્તારોમાં ભારે વરસાદના કારણે પૂર, ભૂસ્ખલન અને મકાનો ધરાશાયી થવાની ઘટનાઓ સામે આવી રહી છે. અનેક નદીઓ ભયજનક સપાટીએ વહી રહી છે, જેના કારણે હજારો લોકો પ્રભાવિત થયા છે. હવામાન વિભાગે આગામી બે દિવસ માટે પણ અનેક રાજ્યોમાં ભારે વરસાદ, વાવાઝોડા અને વીજળી પડવાની ચેતવણી જાહેર કરી છે.
ઉત્તર પ્રદેશમાં સતત વરસી રહેલા વરસાદથી અનેક જિલ્લાઓમાં પૂરની સ્થિતિ સર્જાઈ છે. ફર્રુખાબાદ જિલ્લામાં ગંગા નદીના વધેલા જળસ્તરના કારણે 33 ગામોમાં પાણી ઘૂસી ગયું છે. માત્ર ગામો જ નહીં પરંતુ 40 સરકારી શાળાઓમાં પણ પાણી ભરાઈ જતાં વિદ્યાર્થીઓના અભ્યાસ પર અસર પડી છે. સ્થાનિક પ્રશાસન દ્વારા અસરગ્રસ્ત વિસ્તારો પર સતત નજર રાખવામાં આવી રહી છે અને જરૂરિયાત મુજબ લોકોને સુરક્ષિત સ્થળે ખસેડવાની કામગીરી હાથ ધરવામાં આવી રહી છે.
બલિયા જિલ્લામાં સરયૂ નદીના ધસમસતા પ્રવાહને કારણે છેલ્લા એક અઠવાડિયામાં 27 મકાનો નદીમાં ધોવાઈ ગયા છે. નદીકાંઠાના વિસ્તારોમાં રહેતા લોકોમાં ભયનો માહોલ છે. ઘણા પરિવારોને પોતાના ઘર છોડીને સુરક્ષિત સ્થળોએ આશરો લેવો પડ્યો છે. વારાણસીમાં પણ ગંગા નદીનું પાણી વધતા શહેરના 40થી 50 નાના મંદિરોમાં પાણી ઘૂસી ગયું છે. અનેક ઘાટો પાણીમાં ગરકાવ થતાં ધાર્મિક પ્રવૃત્તિઓ પણ પ્રભાવિત થઈ છે. પ્રતાપગઢ જિલ્લામાં વરસાદે કરુણ ઘટના સર્જી છે. સતત વરસાદના કારણે લગભગ 100 વર્ષ જૂનું એક મકાન ધરાશાયી થતાં એક જ પરિવારના 6 લોકોના મોત થયા છે. બચાવ કામગીરી દરમિયાન સ્થાનિક લોકો અને પ્રશાસને ભારે જહેમત ઉઠાવી હતી. આ ઘટનાએ સમગ્ર વિસ્તારમાં શોકનું મોજું ફરી વળ્યું છે.
ઉત્તરાખંડમાં પણ ભારે વરસાદના કારણે સ્થિતિ ચિંતાજનક બની છે. દેહરાદૂન, ચમોલી, બાગેશ્વર, રુદ્રપ્રયાગ અને પૌડી ગઢવાલ જિલ્લામાં ભારે વરસાદની આગાહીને ધ્યાનમાં રાખીને આંગણવાડી કેન્દ્રો તેમજ ધોરણ 12 સુધીની તમામ શાળાઓ બંધ રાખવાનો નિર્ણય લેવામાં આવ્યો છે. વિદ્યાર્થીઓની સુરક્ષાને પ્રાથમિકતા આપતા પ્રશાસને લોકોને પણ બિનજરૂરી મુસાફરી ટાળવાની અપીલ કરી છે.
રુદ્રપ્રયાગ જિલ્લામાં તિલવાડા નજીક કેદારનાથ હાઈવે પર ભારે વરસાદ બાદ પહાડ પરથી કાટમાળ અને પાણી રસ્તા પર આવી ગયું હતું. આ ઘટનામાં અનેક વાહનો કાદવ અને પથ્થરોના કાટમાળમાં દટાઈ ગયા. માર્ગ સંપૂર્ણપણે અવરોધાઈ જતા યાત્રીઓ અને સ્થાનિક લોકોને ભારે મુશ્કેલીનો સામનો કરવો પડ્યો હતો. રસ્તો ખુલ્લો કરવા માટે મશીનો દ્વારા કાટમાળ હટાવવાની કામગીરી શરૂ કરવામાં આવી છે.
આસામમાં પણ પૂરની સ્થિતિ હજુ ગંભીર છે. છેલ્લા 24 કલાકમાં વધુ 6 લોકોના મોત થતાં આ ચોમાસામાં રાજ્યમાં મૃત્યુઆંક વધીને 95 થયો છે. ધાનસિરી નદી ભયજનક સપાટીથી ઉપર વહી રહી હોવાથી 14 જિલ્લાઓમાં હાઈ એલર્ટ જાહેર કરવામાં આવ્યું છે. રાજ્યના 563 ગામોના 1.6 લાખથી વધુ લોકો પૂરથી પ્રભાવિત થયા છે. અનેક વિસ્તારોમાં રસ્તાઓ, ખેતી અને રહેણાંક વિસ્તારો પાણીમાં ગરકાવ થઈ ગયા છે. રાહત અને બચાવ કામગીરી માટે રાજ્ય સરકાર અને એનડીઆરએફની ટીમો સતત કામગીરી કરી રહી છે.
બિહારના રક્સૌલ વિસ્તારમાં ભારે વરસાદના કારણે ભેલાહી-ઘોડાસહન નહેરનો માર્ગ ધોવાઈ ગયો છે. જેના કારણે લગભગ 15 ગામોના લોકોના સંપર્કમાં મુશ્કેલી ઊભી થઈ છે. માર્ગ વ્યવહાર ખોરવાતા દૈનિક જીવન પણ પ્રભાવિત થયું છે. પંજાબમાં પહાડી વિસ્તારોમાં ભારે વરસાદને કારણે રણજીત સાગર ડેમનું જળસ્તર ઝડપથી વધ્યું છે. પરિસ્થિતિને ધ્યાનમાં રાખીને ડેમમાંથી લગભગ 8,000 ક્યુસેક પાણી છોડવામાં આવ્યું છે. નદીકાંઠાના વિસ્તારોમાં રહેતા લોકોને સાવચેત રહેવા સૂચના આપવામાં આવી છે.
રાજસ્થાનના અલવરમાં પણ બુધવારે સાંજે અડધા કલાકના ભારે વરસાદે શહેરના અનેક વિસ્તારોને પાણીમાં ગરકાવ કરી દીધા હતા. મુખ્ય બજારો અને રસ્તાઓ પર પાણી ભરાતા વાહનવ્યવહાર પ્રભાવિત થયો હતો. લોકોને અવરજવર કરવામાં ભારે મુશ્કેલી પડી હતી. હવામાન વિભાગના જણાવ્યા મુજબ આગામી બે દિવસ દરમિયાન દેશના અનેક રાજ્યોમાં ભારે વરસાદ ચાલુ રહેવાની શક્યતા છે. 7 ઓગસ્ટે રાજસ્થાન, કેરળ અને મધ્ય પ્રદેશમાં અતિ ભારે વરસાદની ચેતવણી આપવામાં આવી છે. જ્યારે બિહાર, ઝારખંડ, હિમાચલ પ્રદેશ, ઉત્તરાખંડ, ઓડિશા, પશ્ચિમ બંગાળ, સિક્કિમ, આસામ, મેઘાલય અને છત્તીસગઢમાં ભારે વરસાદની આગાહી કરવામાં આવી છે. ઉપરાંત અનેક રાજ્યોમાં 30થી 50 કિલોમીટર પ્રતિ કલાકની ઝડપે પવન ફૂંકાવા અને વીજળી પડવાની શક્યતા પણ વ્યક્ત કરવામાં આવી છે.
8 ઓગસ્ટે પણ રાજસ્થાનમાં અતિ ભારે વરસાદની આગાહી કરવામાં આવી છે. બિહાર, ઝારખંડ, હિમાચલ પ્રદેશ, ઉત્તરાખંડ, ઓડિશા, મધ્ય પ્રદેશ, આસામ, મેઘાલય અને અન્ય રાજ્યોમાં ભારે વરસાદ ચાલુ રહી શકે છે. આ સાથે 30થી 60 કિલોમીટર પ્રતિ કલાકની ઝડપે પવન અને ગાજવીજ સાથે વરસાદની સંભાવના હોવાથી લોકોને સાવચેત રહેવા સૂચના આપવામાં આવી છે.
હવામાન વિભાગે ખાસ કરીને નદીકાંઠાના વિસ્તારોમાં રહેતા લોકો, પહાડી વિસ્તારોમાં મુસાફરી કરતા યાત્રીઓ અને નીચાણવાળા વિસ્તારોના રહેવાસીઓને સતર્ક રહેવા અપીલ કરી છે. ભારે વરસાદને કારણે ભૂસ્ખલન, પૂર અને પાણી ભરાવાની સ્થિતિ વધુ ગંભીર બની શકે છે. સ્થાનિક પ્રશાસન દ્વારા જારી કરવામાં આવતી સૂચનાઓનું પાલન કરવા અને બિનજરૂરી મુસાફરી ટાળવા પણ લોકોને સલાહ આપવામાં આવી છે.
