સોમાલિયા: સોમાલિયાની (Somalia) રાજધાની મોગાદિશુમાં (Mogadishu) મુંબઈ (Mumbai) જેવો હુમલો (Attack) કરવામાં આવ્યો છે, જ્યાં આતંકવાદી જૂથ અલ-શબાબના (Al-Shabaab) બંદૂકધારીઓએ હોટેલ હયાત (Hotel Hayat) પર ગોળીબાર (Firing) કર્યો હતો. આ હુમલામાં આઠ લોકોના મોત થયા છે અને 20થી વધુ લોકો ઘાયલ થયા છે. સૌથી પહેલા હયાત હોટલની બહાર ઊભેલી 2 કારમાં બ્લાસ્ટ થયો હતો. અને ત્યાર બાદ આતંકવાદીઓ હોટલમાં ઘૂસી ગયા અને લોકો પર ફાયરિંગ શરૂ કર્યું હતું.
સુરક્ષા સૂત્રો અને પ્રત્યક્ષદર્શીઓએ જણાવ્યું હતું કે અલ-શબાબના આતંકીઓએ શુક્રવારે સોમાલી રાજધાની મોગાદિશુમાં હયાત હોટલ પર ગોળીબાર કર્યો હતો, જેમાં આઠ લોકો માર્યા ગયા હતા. કહેવામાં આવી રહ્યું છે કે આતંકીઓએ હોટલ હયાત પર કબજો કરી લીધો છે.
ઈન્ટેલિજન્સ ચીફ સહિત બે સુરક્ષા અધિકારીઓ ઘાયલ
સોમાલી પોલીસના પ્રવક્તા અબ્દીફાતાહ અદેન હસને જણાવ્યું હતું કે એક આત્મઘાતી બોમ્બર શરૂઆતમાં હોટલમાં ઘૂસી ગયો હતો અને ગોળીબાર કર્યો હતો, જેના પરિણામે સુરક્ષા દળો અને જેહાદી જૂથના બંદૂકધારીઓ વચ્ચે ભીષણ ગોળીબાર થયો હતો. આ ઘટનામાં આઠ લોકોના મોત થયા હતા. તેમણે પુષ્ટિ કરી કે કેટલાક બંદૂકધારી હજુ પણ હોટલમાં છે. વધુમાં, તેમણે સુનિશ્ચિત કર્યું કે સુરક્ષા અધિકારીઓ પરિસ્થિતિનો સામનો કરી રહ્યા છે અને કહ્યું કે આતંકવાદીઓને ટૂંક સમયમાં ખતમ કરી દેવામાં આવશે.
સોમાલિયામાં ‘ડર’નું બીજું નામ શું બની ગયું છે, અલ-શબાબ?
અલ-શબાબ એ વિશ્વના વિવિધ ભાગોમાં આતંકવાદી સંગઠન અલ-કાયદાના જૂથોમાંથી એક છે. મુખ્યત્વે સોમાલિયામાં સ્થિત, આ સંગઠનનું પૂરું નામ હરકત અલ-શબાબ અલ-મુજાહિદ્દીન છે અને તે કેન્યા સાથેની દેશની દક્ષિણ સરહદમાં મજબૂત હાજરી ધરાવે છે. અલ-શબાબનો એકમાત્ર હેતુ સોમાલી સરકારને ઉથલાવી પાડવાનો છે. અલ-શબાબ સાઉદી અરેબિયાના વહાબી ઇસ્લામને અનુસરે છે, જે ઇસ્લામનું સૌથી કટ્ટરપંથી સ્વરૂપ છે.
સોમાલિયા સરકાર વિરુદ્ધ લાંબા સમયથી યુદ્ધ લડી રહેલા આ આતંકવાદી સંગઠનનો આ પહેલો હુમલો નથી. અલ શબાબે ભૂતકાળમાં મોગાદિશુ શહેરમાં અનેક ભયાનક વિસ્ફોટો કર્યા છે. આતંકવાદી સંગઠન અલ-શબાબની સ્થાપના 2006માં થઈ હતી. તે સમયે મોગાદિશુ શહેર યુનિયન ઓફ ઇસ્લામિક કોર્ટના નિયંત્રણ હેઠળ હતું, જે શરિયા અદાલતોની સંસ્થા છે. તેના વડા શરીફ શેખ અહમદ હતા. આ સંગઠનને 2006માં ઇથોપિયન સેનાએ પરાસ્ત કર્યું અને અલ-શબાબનો જન્મ થયો.અલ-શબાબ એ યુનિયન ઓફ ઇસ્લામિક કોર્ટની કટ્ટરપંથી શાખા છે.
