મુંબઈ: બોલિવૂડ (Bollywood) એક્ટર સલમાન ખાનના (Salman Khan) ઘરની બહાર ફાયરિંગ કેસમાં મુંબઈ ક્રાઈમ બ્રાન્ચને (Mumbai Crime Branch) મોટી સફળતા મળી છે. પોલીસે ફાયરિંગના બંને આરોપીઓની ગુજરાતના (Gujarat) ભુજમાંથી ધરપકડ કરી હતી. બંને આરોપીઓને મુંબઈ (Mumbai) લાવવામાં આવશે. તેમજ મુંબઇ ક્રાઈમ બ્રાન્ચની ટીમ મુંબઈમાં આગળની કાર્યવાહી હાથ ધરશે.
ક્રાઈમ બ્રાન્ચના સૂત્રોના જણાવ્યા અનુસાર ધરપકડ કરાયેલા બે આરોપીઓના નામ વિકી ગુપ્તા (24) અને સાગર પાલ (21) છે. બંને આરોપી શૂટર બિહારના પશ્ચિમ ચંપારણના મસીહના રહેવાસી છે. આ બંને સામે અગાઉ પણ ચોરી, ચેઈન સ્નેચિંગ જેવા ગુના નોંધાયેલા છે. તેમજ સલમાન ખાનના ઘરની બહાર ફાયરિંગ કરવાના કેસમાં મુંબઈ પોલીસની ટીમે ગુજરાત જઈને બંને આરોપીઓની ધરપકડ કરી હતી.
પનવેલમાંથી પણ 2 લોકોની અટકાયત કરવામાં આવી હતી
આ કેસમાં મુંબઈ પોલીસે પનવેલમાંથી બે લોકોની અટકાયત પણ કરી હતી. આ બંનેએ સલમાનના ઘરે ગોળીબાર કરનારા શૂટરોને સેકન્ડ હેન્ડ બાઇક વેચી દીધી હતી. સલમાન ખાનનું ફાર્મહાઉસ પનવેલમાં જ છે, તેથી હવે પોલીસ એ પણ શોધી રહી છે કે શું શૂટિંગ સલમાનના ફાર્મહાઉસને પણ નિશાન બનાવવા માટે કરવામાં આવ્યું હતું?
પ્રાપ્ત વિગતો મુજબ મુંબઈ પોલીસની ટીમ 5 રાજ્યોમાં શૂટરોને શોધી રહી હતી. ગુજરાતના ભુજમાં ગઈકાલે રાત્રે આ બંને આરોપીઓની પ્રથમ ધરપકડ કરવામાં આવી હતી. તેમજ તેમને મુંબઈ લાવવાની તૈયારી કરવામાં આવી હતી, મુંબઈમાં તેમની પૂછપરછ કરવામાં આવશે.
સલમાનના ઘરે ફાયરિંગમાં રોહિત ગોદારા ગેંગનું નામ
રવિવારે બોલિવૂડ અભિનેતા સલમાન ખાનના ઘરની બહાર બાઇક સવાર બે લોકોએ ગોળીબાર કર્યો હતો, જેમાં ગેંગસ્ટર લોરેન્સ વિશ્નોઈ સાથે જોડાયેલા લોકોના નામ પણ સામે આવ્યા હતા. તેમજ એવો દાવો કરવામાં આવી રહ્યો છે કે સલમાનના ઘર પર ફાયરિંગ પાછળ લોરેન્સ બિશ્નોઈ ગેંગના રોહિત ગોદારાનો હાથ છે.
રાજસ્થાનનો કુખ્યાત ગેંગસ્ટર રોહિત ગોદારા અમેરિકામાં રહે છે. તેણે અમેરિકામાં બેસીને શૂટર્સનું પ્લાનિંગ અને ગોઠવણ કરી હતી. તેમને હથિયારો આપ્યા અને સલમાન ખાનના ઘર અને ફાર્મ હાઉસની રેકી કરવામાં મદદ કરી. રોહિત ગોદારાનું નામ સુખદેવ સિંહ ગોગામેડી અને સિદ્ધુ મૂસેવાલા હત્યા કેસમાં પણ સામે આવ્યું હતું.
રોહિત ગોદારાનો શૂટર કાલુ સીસીટીવીમાં દેખાયો
રોહિત ગોદારા લોરેન્સ બિશ્નોઈ ગેંગનો ખાસ સભ્ય છે. તે શૂટર્સ અને હથિયાર ગોઠવનારાનું સૌથી મોટું નેટવર્ક ચલાવે છે. પોલીસના જણાવ્યા અનુસાર લોરેન્સના ભાઈ અનમોલ બિશ્નોઈએ સલમાનના ઘરે ફાયરિંગની જવાબદારી રોહિત ગોદારાને આપી હતી. રોહિત ગોદારાએ વિશાલ ઉર્ફે કાલુ નામના શૂટરને આ કામ સોંપ્યું હતું. લોરેન્સ બિશ્નોઈ અને તેની ગેંગ ઘણા વર્ષોથી સલમાન ખાનને ધમકી આપી રહી છે. પરંતુ આ ધમકીઓની બોલિવૂડના ભાઇજાન ઉપર કોઇ ખાસ અસર થઇ ન હતી.
