દિલ્હી હાઈકોર્ટે ન્યાયિક વહીવટમાં મહત્વપૂર્ણ ફેરફાર કરતાં દિલ્હી હાયર જ્યુડિશિયલ સર્વિસ (DHJS) હેઠળ કાર્યરત ટ્રાયલ કોર્ટોના કુલ 138 જજોની બદલી કરવાનો આદેશ જાહેર કર્યો છે. તાજેતરના વર્ષોમાં સૌથી મોટા વહીવટી ફેરબદલોમાંનો એક માનવામાં આવી રહ્યો છે. આ નિર્ણયનો મુખ્ય હેતુ વિશેષ અદાલતોમાં પડતર કેસોના ઝડપી નિકાલ, ન્યાયિક સંસાધનોનો વધુ અસરકારક ઉપયોગ અને કોર્ટોની કામગીરીને વધુ કાર્યક્ષમ બનાવવાનો છે.
NEET-UG પેપર લીક કેસની સુનાવણીમાં મોટો ફેરફાર
આ વહીવટી આદેશ હેઠળ NEET-UG પેપર લીક કેસોની સુનાવણી કરી રહેલા વિશેષ જજનું ટ્રાન્સફર કરવામાં આવ્યું છે. અત્યાર સુધી આ કેસોની સુનાવણી વિશેષ જજ અનુ ગ્રોવર બાલીગા કરી રહ્યા હતા. હવે આ વિશેષ ફાસ્ટ-ટ્રેક કોર્ટની જવાબદારી સ્પેશિયલ CBI જજ અજય ગુપ્તાને સોંપવામાં આવી છે. હવે આગળથી NEET-UG પેપર લીક કેસોની તમામ સુનાવણી જજ અજય ગુપ્તાની અદાલતમાં થશે.
તમામ જજોને તાત્કાલિક નવી જવાબદારી સંભાળવાના આદેશ
દિલ્હી હાઈકોર્ટના આદેશ બાદ ટ્રાન્સફર કરાયેલા તમામ જજોને શક્ય તેટલી વહેલી તકે પોતાના નવા કાર્યસ્થળે હાજર થઈ નવી જવાબદારીઓ સંભાળવા સૂચના આપવામાં આવી છે. હાઈકોર્ટનું માનવું છે કે આ પ્રકારનું પુનર્ગઠન ન્યાયિક પ્રક્રિયાને વધુ ગતિશીલ બનાવશે અને વિશેષ અદાલતોમાં પડતર કેસોના ઝડપી નિકાલમાં મદદરૂપ થશે.
રાઉઝ એવન્યુ કોર્ટમાં 13 નવા જજોની નિમણૂક
આ ફેરબદલના ભાગરૂપે દિલ્હીની રાઉઝ એવન્યુ કોર્ટમાં પણ મહત્વપૂર્ણ ફેરફારો કરવામાં આવ્યા છે. અહીં ભ્રષ્ટાચાર, સંવેદનશીલ ગુનાઓ અને અન્ય વિશેષ કેસોની સુનાવણી માટે 13 નવા જજોની નિમણૂક કરવામાં આવી છે. આ જજો ભવિષ્યમાં વિવિધ મહત્વપૂર્ણ કેસોની સુનાવણી કરશે, જેથી વિશેષ અદાલતો પરનો ભાર ઓછો થઈ શકે.
NIA, UAPA, NDPS અને MCOCA કેસો માટે અલગ વ્યવસ્થા
દિલ્હી હાઈકોર્ટના આદેશ અનુસાર હવે UAPA, NIA, NDPS અને MCOCA જેવા ગંભીર ગુનાઓ સંબંધિત કેસોની સુનાવણી માટે વિશેષ વ્યવસ્થા કરવામાં આવી છે.અન્ય જિલ્લા અદાલતોમાં આવેલી NIA કોર્ટમાંથી 6 જજોને ટ્રાન્સફર કરીને રાઉઝ એવન્યુ સ્થિત નવી સ્પેશિયલ એક્સક્લૂઝિવ NIA કોર્ટમાં નિયુક્ત કરવામાં આવ્યા છે. આ તમામ જજો 4 ઓગસ્ટથી નવી જવાબદારી સંભાળશે.સાથે જ MCOCA અને NDPS સંબંધિત કોર્ટોને પણ વિવિધ જિલ્લા અદાલતોમાંથી ખસેડીને રાઉઝ એવન્યુ કોર્ટ કોમ્પ્લેક્સમાં કેન્દ્રિત કરવામાં આવી છે. જ્યારે અગાઉ પટિયાલા હાઉસમાં આવેલી NIA કોર્ટ પણ હવે રાઉઝ એવન્યુમાં કાર્યરત રહેશે.
અનુ ગ્રોવર બાલીગા સહિત અનેક જજોની નવી નિમણૂક
આ ફેરબદલમાં વિશેષ જજ અનુ ગ્રોવર બાલીગા ઉપરાંત અન્ય અનેક જજોને નવી જવાબદારીઓ સોંપવામાં આવી છે.
રાઉઝ એવન્યુમાં સ્થાપિત નવી સ્પેશિયલ NIA કોર્ટમાં નીચેના જજોને મહત્વપૂર્ણ જવાબદારીઓ આપવામાં આવી છે:
અનુ ગ્રોવર બાલીગા,વિકાસ ઢુલ,પ્રશાંત શર્મા,અમિત બંસલ,કિરણ બંસલ,પુલસ્ત્ય પ્રમાચલ આ તમામ જજો આતંકવાદ, રાષ્ટ્રીય સુરક્ષા અને અન્ય ગંભીર ગુનાઓ સંબંધિત વિશેષ કેસોની સુનાવણી કરશે.
NEET પેપર લીક કેસ શા માટે મહત્વનો છે?
NEET-UG 2026 પેપર લીક કેસ દેશના સૌથી ચર્ચાસ્પદ કેસોમાંનો એક છે. પરીક્ષામાં ગેરરીતિના આક્ષેપો બાદ CBIએ તપાસ હાથ ધરી હતી અને અત્યાર સુધી અનેક આરોપીઓની ધરપકડ કરી છે. કેસમાં હજારો પાનાની ચાર્જશીટ દાખલ કરવામાં આવી છે અને તેની ઝડપી સુનાવણી માટે વિશેષ ફાસ્ટ-ટ્રેક કોર્ટની રચના કરવામાં આવી હતી. તાજેતરમાં કોર્ટે CBIને ચાર્જશીટ સંબંધિત તમામ દસ્તાવેજો રજૂ કરવા વધારાનો સમય પણ આપ્યો હતો.
ન્યાયિક વ્યવસ્થાને વધુ કાર્યક્ષમ બનાવવાનો પ્રયાસ
કાનૂની નિષ્ણાતોના મતે દિલ્હી હાઈકોર્ટ દ્વારા એકસાથે 138 જજોની બદલી કરવાનો નિર્ણય માત્ર નિયમિત વહીવટી પ્રક્રિયા નથી,પરંતુ વિશેષ અદાલતોમાં કેસોના ઝડપી નિકાલ, ન્યાયિક ભાર ઘટાડવા, સંવેદનશીલ કેસોની અસરકારક સુનાવણી સુનિશ્ચિત કરવાનો પ્રયાસ છે.ખાસ કરીને ભ્રષ્ટાચાર, આતંકવાદ, સંગઠિત ગુના, ડ્રગ્સ, પરીક્ષા ગેરરીતિ જેવા કેસો માટે વિશેષ જજોની અલગ વ્યવસ્થા કરવાથી સુનાવણી વધુ ઝડપથી આગળ વધવાની શક્યતા વ્યક્ત કરવામાં આવી રહી છે. દિલ્હી હાઈકોર્ટના આદેશ બાદ આગામી દિવસોમાં તમામ ટ્રાન્સફર થયેલા જજો પોતાના નવા હોદ્દા પર કાર્યભાર સંભાળશે. NEET-UG પેપર લીક કેસ સહિત અનેક હાઈ-પ્રોફાઇલ કેસોની સુનાવણી હવે નવી અદાલતોમાં નવા જજોની અધ્યક્ષતામાં આગળ વધશે. કોર્ટ પ્રશાસનનું માનવું છે કે આ ફેરબદલથી ન્યાયિક પ્રક્રિયામાં વધુ ઝડપ આવશે અને મહત્વપૂર્ણ કેસોના વહેલા નિકાલનો માર્ગ મોકળો બનશે.
