Latest News

હોર્મુઝ જળસંધિ ફરી બંધ

મિડલ ઈસ્ટમાં અમેરિકા અને ઈરાન વચ્ચે ચાલી રહેલા તણાવ વચ્ચે મહત્વપૂર્ણ વિકાસ સામે આવ્યો છે. ઈરાને જણાવ્યું છે કે અમેરિકાની સાથે ચાલી રહેલી ચર્ચાઓમાં થોડી પ્રગતિ થઈ છે, પરંતુ અંતિમ સમજૂતી હજુ દૂર છે અને ઘણા મહત્વપૂર્ણ મુદ્દાઓ પર મતભેદ યથાવત છે. આ વચ્ચે ઈરાને ફરી એકવાર હોર્મુઝ જળસંધિ પર પ્રતિબંધ કડક બનાવ્યો છે, જેના કારણે વૈશ્વિક સ્તરે ચિંતા વધી છે.

ઈરાનના અધિકારીઓએ જણાવ્યું કે હાલ ચાલી રહેલો બે અઠવાડિયાનો યુદ્ધવિરામ સમયસમાપ્ત થવાના આરે છે, પરંતુ બંને દેશો વચ્ચેના મતભેદ હજુ સમાપ્ત થયા નથી. ઈરાનનું કહેવું છે કે અંતિમ કરાર સુધી પહોંચવા માટે હજુ લાંબી પ્રક્રિયા બાકી છે અને કેટલાક મુખ્ય મુદ્દાઓ પર સહમતી બનવી જરૂરી છે.

હોર્મુઝ જળસંધિ ફરીથી બંધ
પરિસ્થિતિ વધુ ગંભીર બની ત્યારે ઈરાને ફરી એકવાર હોર્મુઝ જળસંધિ પર નિયંત્રણ કડક બનાવ્યું અને અમેરિકાની નૌકાબંધીનો આરોપ લગાવ્યો. ઈરાનનું કહેવું છે કે અમેરિકાએ કરારની શરતોનું પાલન કર્યું નથી, જેના કારણે જળસંધિ ફરી બંધ કરવાનો નિર્ણય લેવાયો છે.

હોર્મુઝ જળસંધિ વિશ્વના સૌથી મહત્વપૂર્ણ સમુદ્રી માર્ગોમાંથી એક છે, જ્યાંથી દુનિયાના કુલ તેલ પુરવઠાનો લગભગ 20 ટકા ભાગ પસાર થાય છે. આ માર્ગ બંધ થવાથી વૈશ્વિક બજારોમાં તેલના ભાવ પર સીધી અસર પડી શકે છે અને ઊર્જા પુરવઠા અંગે અનિશ્ચિતતા વધી શકે છે.

યુદ્ધવિરામ છતાં તણાવ યથાવત
અમેરિકા અને ઈરાન વચ્ચે યુદ્ધવિરામ લાગુ કરવામાં આવ્યો હતો, પરંતુ જમીન સ્તરે પરિસ્થિતિ સંપૂર્ણ રીતે સામાન્ય બની નથી. ઘણા દેશોએ જળસંધિમાં જહાજોની અવરજવર ફરી શરૂ કરવાની અપીલ કરી છે. બ્રિટન સહિત અનેક દેશોએ વૈશ્વિક વેપાર માટે આ માર્ગને સુરક્ષિત બનાવવાની જરૂરિયાત પર ભાર મૂક્યો છે.

ઈરાન તરફથી સ્પષ્ટ સંકેત આપવામાં આવ્યા છે કે જો અમેરિકાની નૌકાબંધી દૂર નહીં કરવામાં આવે તો જળસંધિ પર નિયંત્રણ યથાવત રાખવામાં આવશે. આથી આગામી દિવસોમાં મિડલ ઈસ્ટ વિસ્તારમાં તણાવ વધુ વધી શકે તેવી શક્યતા વ્યક્ત કરવામાં આવી રહી છે.હાલની પરિસ્થિતિને ધ્યાનમાં રાખીને વિશ્વના ઘણા દેશો પરિસ્થિતિ પર નજીકથી નજર રાખી રહ્યા છે, કારણ કે હોર્મુઝ જળસંધિમાં અવરોધ ઊભો થવાથી વૈશ્વિક અર્થતંત્ર ,ઊર્જા સપ્લાય પર મોટો પ્રભાવ પડી શકે છે.