ઉત્તર ભારતમાં ગરમીનો ત્રાહિમામ!,IMDએ આપી મોટી ચેતવણી,આગામી દિવસોમાં વધુ વધશે તાપમાન; 45 ડિગ્રી સુધી પહોંચી શકે પારો, બીજી તરફ દક્ષિણ ભારતમાં મોન્સૂન આગળ વધી રહ્યું છે
દેશના ઉત્તર અને મધ્ય ભારતના અનેક રાજ્યોમાં ભયાનક ગરમી અને હીટવેવની સ્થિતિ સર્જાઈ રહી છે. ભારતીય હવામાન વિભાગ (IMD)એ પંજાબ, હરિયાણા, દિલ્હી, ઉત્તર પ્રદેશ, રાજસ્થાન અને મધ્ય પ્રદેશ સહિતના વિસ્તારો માટે હીટવેવ એલર્ટ જાહેર કર્યું છે. આગામી કેટલાક દિવસોમાં તાપમાનમાં વધુ વધારો થવાની શક્યતા વ્યક્ત કરવામાં આવી છે અને અનેક વિસ્તારોમાં પારો 45 ડિગ્રી સેલ્સિયસ સુધી પહોંચી શકે છે. બીજી તરફ દક્ષિણ ભારતમાં દક્ષિણ-પશ્ચિમ મોન્સૂન આગળ વધવા માટે અનુકૂળ પરિસ્થિતિ સર્જાઈ રહી છે.
IMDના તાજા હવામાન બુલેટિન અનુસાર ઉત્તર ભારતના રાજ્યોમાં 18 મેથી 23 મે દરમિયાન ગંભીર હીટવેવ જેવી સ્થિતિ રહી શકે છે. ખાસ કરીને પંજાબ, હરિયાણા, ચંડીગઢ અને દિલ્હીમાં સતત પાંચ દિવસ સુધી ભારે ગરમી રહેવાની આગાહી કરવામાં આવી છે. હવામાન વિભાગે જણાવ્યું છે કે ગરમ અને સૂકા પવનના કારણે દિવસ દરમિયાન લોકોને ભારે મુશ્કેલી પડી શકે છે. ઉત્તર પ્રદેશમાં પરિસ્થિતિ ગંભીર બનતી જઈ રહી છે. IMDએ ચેતવણી આપી છે કે રાજ્યના અનેક વિસ્તારોમાં 19થી 23 મે વચ્ચે “સીવિયર હીટવેવ” જેવી સ્થિતિ સર્જાઈ શકે છે. કાનપુર ડિવિઝન માટે યેલો એલર્ટ જાહેર કરવામાં આવ્યું છે અને લોકોને બપોર દરમિયાન બહાર ન નીકળવાની સલાહ આપવામાં આવી છે.
દિલ્હી-NCRમાં પણ ભારે ગરમીનો પ્રકોપ યથાવત્ છે. IMD અનુસાર દિલ્હીમાં મહત્તમ તાપમાન 41 થી 43 ડિગ્રી વચ્ચે રહી શકે છે, જ્યારે કેટલાક વિસ્તારોમાં તે 45 ડિગ્રી સુધી પહોંચવાની શક્યતા છે. બપોરના સમયે ગરમ પવનો અને વધતી ભેજને કારણે હીટસ્ટ્રોકનો ખતરો પણ વધી રહ્યો છે.હવામાન વિભાગે જણાવ્યું છે કે ઉત્તર પશ્ચિમ ભારતમાં 21 મે સુધી તાપમાનમાં 3 થી 5 ડિગ્રીનો વધારો થઈ શકે છે. રાજસ્થાનમાં 18થી 23 મે દરમિયાન હીટવેવની સ્થિતિ વધુ ગંભીર બની શકે છે. મધ્ય પ્રદેશ, વિદર્ભ અને છત્તીસગઢમાં પણ ભારે ગરમીની ચેતવણી આપવામાં આવી છે.
પંજાબ અને હરિયાણામાં તાજેતરમાં થોડો વરસાદ અને વાવાઝોડા જેવી સ્થિતિ સર્જાતા લોકોને થોડી રાહત મળી હતી, પરંતુ હવે ફરી ગરમીમાં તેજી આવી રહી છે. IMD અનુસાર આ વિસ્તારોમાં તાપમાન 42 થી 45 ડિગ્રી વચ્ચે રહી શકે છે. લોકોને પૂરતું પાણી પીવું, સીધી ધુપથી બચવું અને બિનજરૂરી બહાર ન નીકળવાની સલાહ આપવામાં આવી છે.બીજી તરફ દક્ષિણ ભારત અને ઉત્તર-પૂર્વીય રાજ્યોમાં મોન્સૂન સક્રિય થવાની પ્રક્રિયા શરૂ થઈ ગઈ છે. IMDએ જણાવ્યું છે કે દક્ષિણ-પશ્ચિમ મોન્સૂન 26 મે આસપાસ કેરળ પહોંચે તેવી શક્યતા છે. હાલ દક્ષિણ બંગાળની ખાડી, અરબી સમુદ્ર અને આંદામાન સમુદ્ર વિસ્તારમાં મોન્સૂન આગળ વધવા માટે અનુકૂળ પરિસ્થિતિ બની રહી છે.
કેરળ, તમિલનાડુ, કર્ણાટક અને ઉત્તર-પૂર્વીય રાજ્યોમાં ભારે વરસાદ, ગાજવીજ અને તેજ પવનની આગાહી કરવામાં આવી છે. આસામ, મેઘાલય, અરુણાચલ પ્રદેશ અને સબ-હિમાલયન પશ્ચિમ બંગાળમાં ભારે વરસાદને લઈને એલર્ટ જાહેર કરવામાં આવ્યું છે. કેટલીક જગ્યાએ 40થી 50 કિમી પ્રતિ કલાકની ઝડપે પવન ફૂંકાઈ શકે છે.હવામાન નિષ્ણાતોનું કહેવું છે કે હાલ દેશમાં બે વિપરીત હવામાન પરિસ્થિતિ એકસાથે જોવા મળી રહી છે. એક તરફ ઉત્તર ભારત ગરમીથી ત્રાહિમામ પોકારી રહ્યું છે, જ્યારે બીજી તરફ દક્ષિણ અને ઉત્તર-પૂર્વ ભારત મોન્સૂન પૂર્વ વરસાદનો સામનો કરી રહ્યું છે.
આ બદલાતી પરિસ્થિતિઓ પાછળ એલ નીનો અસર અને વૈશ્વિક તાપમાન વધારાને પણ મહત્વપૂર્ણ કારણ માનવામાં આવી રહ્યું છે.ડોક્ટરો અને આરોગ્ય નિષ્ણાતોએ ખાસ કરીને બાળકો, વૃદ્ધો અને લાંબા સમય સુધી બહાર કામ કરતા લોકો માટે સાવચેતી રાખવાની અપીલ કરી છે. બપોરે 12થી 4 દરમિયાન બહાર ન જવું, હળવા રંગના કપડાં પહેરવા, વધુમાં વધુ પાણી પીવું અને શરીરને હાઇડ્રેટ રાખવું જરૂરી હોવાનું જણાવાયું છે.
હાલ સમગ્ર દેશની નજર હવે આગામી મોન્સૂન સિઝન પર છે. દક્ષિણ ભારતમાં વહેલો મોન્સૂન થોડી રાહત લાવી શકે છે, પરંતુ ઉત્તર ભારત માટે આગામી કેટલાક દિવસો હજુ પણ ભારે ગરમી અને હીટવેવ સાથે પસાર થવાના સંકેતો મળી રહ્યા છે.
