વેતન વધારો, વીકલી ઓફ સહિત અનેક માંગણીઓ પર ચર્ચા તેજ
ઉત્તર પ્રદેશના નોઈડા ઔદ્યોગિક વિસ્તારમાં મજૂરોના મોટા પાયે વિરોધ પ્રદર્શન બાદ સ્થિતિ નિયંત્રણમાં લેવા માટે પ્રશાસન અને મજૂર પ્રતિનિધિઓ વચ્ચે મોડી રાત સુધી ચર્ચા ચાલી હતી. મજૂરો દ્વારા મુખ્યત્વે ન્યૂનતમ વેતન વધારો, સાપ્તાહિક રજા (Weekly Off), ઓવરટાઇમનું યોગ્ય વેતન અને કામની સારી શરતો જેવી મહત્વપૂર્ણ માંગણીઓ રજૂ કરવામાં આવી છે.
માહિતી મુજબ નોઈડાના ફેઝ-2 અને આસપાસના ઔદ્યોગિક વિસ્તારોમાં હજારો મજૂરો રસ્તા પર ઉતરી આવ્યા હતા. તેઓ લાંબા સમયથી બાકી રહેલા વેતન સુધારાના પ્રશ્નને લઈને વિરોધ કરી રહ્યા હતા. કેટલાક વિસ્તારોમાં વિરોધ દરમિયાન પથ્થરમારો, વાહનોને નુકસાન અને આગ જની જેવી ઘટનાઓ પણ નોંધાઈ હતી, જેના કારણે પોલીસને ભારે બંદોબસ્ત ગોઠવવો પડ્યો હતો.
મજૂરોનું કહેવું છે કે હાલ તેમને દર મહિને અંદાજે ₹13,000થી ₹14,000 જેટલું વેતન મળે છે, જે વધતી મોંઘવારી સામે પૂરતું નથી. તેથી તેઓ ₹20,000 ન્યૂનતમ માસિક વેતન, 8 કલાકની ડ્યૂટી, સમયસર પગાર, ઓવરટાઇમ માટે ડબલ વેતન અને વીકલી ઓફ જેવી માંગણીઓ પર અડગ છે.જો કે મુખ્યમંત્રી યોગી આદિત્યનાથના નિર્દેશ બાદ ઉચ્ચસ્તરીય સમિતિએ મજૂર પ્રતિનિધિઓ સાથે મેરાથોન બેઠક યોજી હતી. આ બેઠકમાં મજૂરોની માંગણીઓ પર ચર્ચા કરી ઉકેલ લાવવાનો પ્રયાસ કરવામાં આવ્યો હતો. પ્રશાસન તરફથી મજૂરોને શાંતિ જાળવવાની અપીલ પણ કરવામાં આવી છે.
આ ઉપરાંત પ્રશાસન દ્વારા મજૂરોની કેટલીક માંગણીઓ પર સકારાત્મક વિચારણા શરૂ કરવામાં આવી છે. જેમાં વીકલી ઓફ, ઓવરટાઇમ માટે ડબલ પેમેન્ટ, મેડિકલ સુવિધા અને ફરિયાદ માટે હેલ્પલાઇન શરૂ કરવાની યોજના પણ સામેલ છે.
હાલ પરિસ્થિતિ પર પોલીસ અને પ્રશાસન સતત નજર રાખી રહ્યા છે. મજૂરો અને સરકાર વચ્ચે ચાલી રહેલી ચર્ચાઓ બાદ ટૂંક સમયમાં કોઈ સકારાત્મક નિર્ણય આવી શકે તેવી સંભાવના વ્યક્ત કરવામાં આવી રહી છે.
