બોલિવૂડ અભિનેતા અજય દેવગન હાલમાં તેમની ફિલ્મ ‘દ્રશ્યમ ૩’ની સફળતાનો આનંદ માણી રહ્યા છે જે બોક્સ ઓફિસ પર રેકોર્ડ તોડી રહી છે અને તેમના કરિયરની સૌથી મોટી ફિલ્મ બની ગઈ છે. બીજી તરફ તેમના પત્ની કાજોલ અને પરિવારના અન્ય સભ્યો નવરાત્રિની ઉજવણીમાં વ્યસ્ત છે. આ દરમિયાન બૃહન્મુંબઈ મ્યુનિસિપલ કોર્પોરેશન (BMC) દ્વારા અજય દેવગનના જુહુ સ્થિત બંગલા પર કાર્યવાહી કરવામાં આવી છે. અહેવાલો અનુસાર BMCએ આ મિલકતમાં કથિત રીતે થયેલા અનધિકૃત બાંધકામ સામે પગલાં લીધાં છે, જેના પરિણામે અમુક ભાગો તોડી પાડવામાં આવ્યા છે. ૭,૮૦૨ ચોરસ ફૂટમાં ફેલાયેલો અને ‘કપોલ કો-ઓપરેટિવ હાઉસિંગ સોસાયટી’માં આવેલો આ બંગલો BMCની આ કાર્યવાહીના દાયરામાં આવ્યો છે.
નોટિસ આપવા છતાં બાંધકામ ચાલુ રહ્યું
જાણવા મળ્યા મુજબ BMCએ અગાઉ પણ અભિનેતાને બંગલામાં થઈ રહેલા ગેરકાયદે બાંધકામ અંગે નોટિસ આપી હતી. જોકે ચેતવણીઓ આપવા છતાં કામ ચાલુ રહેતા BMCએ હવે આ કડક અમલીકરણ કાર્યવાહી હાથ ધરી છે. આરોપ છે કે BMC પાસેથી જરૂરી પરવાનગી લીધા વિના જ આંતરિક ફેરફારો કરવામાં આવી રહ્યા હતા જેમાં પાર્ટીશન દીવાલોનું નિર્માણ, બારીઓ બેસાડવી અને અન્ય માળખાકીય ફેરફારોનો સમાવેશ થાય છે. આ અનધિકૃત ફેરફારોને કારણે શરૂઆતમાં ‘સ્ટોપ-વર્ક’ નોટિસ આપવામાં આવી હતી પરંતુ કામ બંધ ન થતાં BMCએ હવે તોડફોડની કાર્યવાહી કરી છે.
‘સ્ટોપ-વર્ક’ નોટિસ આપવામાં આવી હતી
૧૦ સપ્ટેમ્બર, ૨૦૨૬ના રોજ, BMCએ ‘મુંબઈ મ્યુનિસિપલ કોર્પોરેશન એક્ટ’ની કલમ ૩૫૪A હેઠળ નોટિસ જારી કરી હતી. આ નોટિસમાં નવીનીકરણનું કામ તાત્કાલિક અટકાવવા અને તમામ જરૂરી દસ્તાવેજો તથા પરવાનગીઓ રજૂ કરવા માટે નિર્દેશ આપવામાં આવ્યો હતો. આ નોટિસ છતાં બાંધકામ ચાલુ રહેતા, મ્યુનિસિપલ કોર્પોરેશને માળખાના અનધિકૃત ભાગોને તોડી પાડ્યા છે. શનિવારે BMC દ્વારા કરવામાં આવેલી કાર્યવાહીની તસવીરો સામે આવી છે, જેમાં હથોડાની મદદથી બાંધકામ તોડવામાં આવી રહ્યું હોવાનું જોઈ શકાય છે.
અજય દેવગનનો બંગલો ૭,૮૦૨ ચોરસ ફૂટમાં ફેલાયેલો છે
અજય દેવગનનો બંગલો મુંબઈના જુહુ વિસ્તારમાં આવેલી ‘કપોલ કો-ઓપરેટિવ હાઉસિંગ સોસાયટી’માં સ્થિત છે. આ બંગલો આશરે ૭,૮૦૨ ચોરસ ફૂટના વિસ્તારમાં ફેલાયેલો છે. મ્યુનિસિપલ કોર્પોરેશનના જણાવ્યા અનુસાર, અભિનેતાના બંગલાની અંદર BMC (મુંબઈ મહાનગરપાલિકા)ની પરવાનગી લીધા વિના અનેક ફેરફારો કરવામાં આવી રહ્યા હતા. આમાં આંતરિક ફેરફારો, પાર્ટીશન દીવાલોનું નિર્માણ, બારીઓમાં ફેરફાર અને અન્ય બાંધકામ કામગીરીનો સમાવેશ થાય છે. BMCનું કહેવું છે કે આ કામગીરી માટે જરૂરી મ્યુનિસિપલ મંજૂરીઓ લેવામાં આવી ન હતી.
