બોલિવુડ અભિનેતા અક્ષય કુમારની ઉત્તરાખંડના મસૂરીમાં શૂટિંગ દરમિયાન તબિયત લથડી હોવાની માહિતી સામે આવી છે. શૂટિંગ દરમિયાન તેની પીઠમાં અચાનક ખેંચાણ આવતાં દુખાવો શરૂ થયો હતો. ઠંડીને કારણે પણ દુખાવો વધ્યો હોવાની વાત સામે આવી છે. તબિયત બગડતાં શૂટિંગ અટકાવવું પડ્યું હતું. હાલમાં અક્ષય કુમાર દહેરાદૂનના રાજપુર વિસ્તારમાં આવેલા એક ગેસ્ટ હાઉસમાં રોકાયો છે, જ્યાં તેની સારવાર ચાલી રહી છે. અક્ષય કુમારની ટીમના જણાવ્યા અનુસાર, મસૂરીના લાઇબ્રેરી ચોક વિસ્તારમાં શૂટિંગ દરમિયાન તેને અચાનક પીઠમાં દુખાવો ઉપડ્યો હતો. આ કારણે શૂટિંગનું કામ અટકાવી દેવામાં આવ્યું હતું. અક્ષય મંગળવારે દિલ્હીથી કાર દ્વારા ઉત્તરાખંડ પહોંચ્યો હતો. અહીં તેના બે દિવસના શૂટિંગનું આયોજન કરવામાં આવ્યું હતું, પરંતુ તબિયત બગડતાં શૂટિંગના સમયપત્રક પર અસર પડી છે.
અક્ષય કુમાર હાલમાં સાયન્સ-ફિક્શન સર્વાઇવલ થ્રિલર ફિલ્મ ‘સમુક’ના શૂટિંગમાં વ્યસ્ત છે. આ ફિલ્મનું નિર્માણ વિપુલ અમૃતલાલ શાહ કરી રહ્યા છે, જ્યારે કનિષ્ક વર્મા તેનું દિગ્દર્શન કરી રહ્યા છે. ફિલ્મનું બ્રિટનનું શૂટિંગ શેડ્યૂલ તાજેતરમાં પૂર્ણ થયું હતું. હવે ફિલ્મના આગામી શૂટિંગ માટે અક્ષય ઉત્તરાખંડ પહોંચ્યો હતો. ફિલ્મને વર્ષ 2027માં રિલીઝ કરવાની યોજના છે. અક્ષય કુમાર અગાઉ પણ ફિલ્મોના શૂટિંગ માટે ઉત્તરાખંડની મુલાકાત લઈ ચૂક્યો છે. મે 2023માં તે ફિલ્મ ‘શંકરા’ના શૂટિંગ માટે ઉત્તરાખંડ આવ્યો હતો. આ દરમિયાન તેણે રૂડકી અને આસપાસના વિસ્તારોમાં શૂટિંગ કર્યું હતું. ઉત્તરાખંડ પ્રવાસ દરમિયાન તેણે કેદારનાથ અને બદ્રીનાથ ધામનાં દર્શન કરીને પૂજા-અર્ચના પણ કરી હતી. આ ઉપરાંત તેણે દહેરાદૂનમાં મુખ્યમંત્રી પુષ્કર સિંહ ધામી સાથે તેમના સરકારી નિવાસસ્થાને મુલાકાત કરી હતી.
આ પહેલાં 18 ફેબ્રુઆરી 2022ના રોજ પણ અક્ષય કુમાર ફિલ્મ ‘કઠપૂતલી’ના શૂટિંગ માટે મસૂરી અને દહેરાદૂન આવ્યો હતો. આ પ્રવાસ દરમિયાન તેણે સીમાદ્વાર વિસ્તારમાં આવેલા આઈટીબીપી પરિસરમાં વિશ્વસ્તરીય વૉલીબૉલ ગ્રાઉન્ડનું ઉદ્ઘાટન કર્યું હતું. ત્યારબાદ તેણે જવાનો સાથે સદભાવના વોલીબોલ મેચમાં ભાગ લીધો હતો અને દેશની સુરક્ષામાં જવાનોના યોગદાનની પ્રશંસા કરી હતી. હાલમાં અક્ષય કુમારની તબિયતને કારણે ફિલ્મના શૂટિંગ પર અસર પડી છે. તેની સારવાર ચાલી રહી છે અને તે સ્વસ્થ થયા બાદ આગળના કામ અંગે નિર્ણય લેવામાં આવે તેવી શક્યતા છે.
Akshay Kumar, Bollywood News, Samuk Movie, Mussoorie, Entertainment News
