આજે ‘કોકરોચ જનતા પાર્ટી’ (CJP) ફરી એકવાર દિલ્હીના રસ્તાઓ પર ઉતરવા જઈ રહી છે. સૌરવ દાસ અને આશુતોષ રાંકાની ધરપકડના વિરોધમાં CJPના સ્થાપક અભિજીત દિપકેએ આજે સાંજે ૫:૦૦ વાગ્યે ‘તિરંગા માર્ચ’ યોજવાની જાહેરાત કરી છે. આ પ્રદર્શનને આમ આદમી પાર્ટી (AAP) તેમજ ડાબેરી વિદ્યાર્થી સંગઠનો – AISA અને SFIનું પણ સમર્થન મળી રહ્યું છે. CJPની આ ‘તિરંગા માર્ચ’ની જાહેરાત બાદ કનોટ પ્લેસ (CP) વિસ્તારમાં સુરક્ષાના વ્યાપક પ્રબંધો કરવામાં આવ્યા છે. દિલ્હી ટ્રાફિક પોલીસે આ અંગે એક ટ્રાફિક એડવાઈઝરી પણ જારી કરી છે.
કનોટ પ્લેસમાં સેન્ટ્રલ પાર્ક બે દિવસ માટે બંધ
દિલ્હી પોલીસે ‘તિરંગા માર્ચ’ માટે પરવાનગી આપી નથી અને અભિજીત દિપકેને નોટિસ પાઠવીને વિરોધ પ્રદર્શન ન યોજવા સૂચના આપી છે. અગાઉ પોલીસે સૂચન કર્યું હતું કે CJP ૧૧ સહભાગીઓ સાથે માર્ચ યોજી શકે છે પરંતુ CJPના સ્થાપક અભિજીત દિપકેએ આ પ્રસ્તાવને ફગાવી દીધો હતો. ત્યારબાદ નવી દિલ્હી મ્યુનિસિપલ કાઉન્સિલ (NDMC) દ્વારા સેન્ટ્રલ પાર્કને બે દિવસ માટે બંધ કરી દેવામાં આવ્યું છે. કનોટ પ્લેસ તરફ જતા તમામ માર્ગો પર ટ્રાફિક ડાયવર્ટ કરવામાં આવ્યો છે અને પોલીસે આ વિસ્તારને એક કિલ્લામાં ફેરવી દીધો છે.
‘જો દિપકે કનોટ પ્લેસ જશે તો કાયદેસરની કાર્યવાહી કરવામાં આવશે’
દિલ્હી પોલીસના સૂત્રોના જણાવ્યા અનુસાર પોલીસની એક ટીમ અભિજીત દિપકેના નિવાસસ્થાને તેમને નોટિસ આપવા પહોંચી હતી. નોટિસમાં ઉલ્લેખ કરવામાં આવ્યો છે કે કનોટ પ્લેસમાં હાલમાં કલમ ૧૬૩ (Section 163) લાગુ છે અને ‘તિરંગા યાત્રા’ માટે NDMC પાસેથી કોઈ પરવાનગી લેવામાં આવી નથી. તેમાં વધુમાં ચેતવણી આપવામાં આવી છે કે જો તેઓ કનોટ પ્લેસ જશે તો તે કલમ ૧૬૩નું ઉલ્લંઘન ગણાશે અને તેમની સામે કાયદેસરની કાર્યવાહી કરવામાં આવશે. પોલીસે નોટિસ આપતા જણાવ્યું હતું કે કનોટ પ્લેસ વિસ્તારમાં BNSS (ભારતીય નાગરિક સુરક્ષા સંહિતા)ની કલમ ૧૬૩ લાગુ છે, તેથી ત્યાં ‘તિરંગા યાત્રા’ કાઢી શકાશે નહીં. આના જવાબમાં દિપકેએ કહ્યું, “અમે ક્યારેય એવું કહ્યું જ નથી કે અમે કોઈ રેલી કે વિરોધ પ્રદર્શન કરીશું. અમે તો માત્ર એટલું જ કહ્યું હતું કે અમે તિરંગો લહેરાવીશું. શું તિરંગો સાથે રાખવો એ કાયદા વિરુદ્ધ છે?”
