National

દિલ્હીમાં ટિકિટના બદલે રોકડા 90 લાખ માંગતા AAPના ધારાસભ્યના સાળા સહિત ત્રણની ધરપકડ

નવી દિલ્હી: દિલ્હી (Delhi) મ્યુનિસિપલ કોર્પોરેશનની ચૂંટણી (Election) પહેલા એન્ટી કરપશન બ્યુરોએ (ACB) મોટી કાર્યવાહી હાથ ધરી છે. દિલ્હી ACBએ પૈસા લઈને કોર્પોરેટરની ટિકિટ (Corporator Ticket) વેચવા બદલ આમ આદમી પાર્ટીના (AAP) ધારાસભ્યના (MLA) સાળા અને PA અને અન્ય એક વ્યક્તિની ધરપકડ (Arrest) કરી છે. ધરપકડ બાદ હવે પોલીસ એ જાણવાનો પ્રયાસ કરી રહી છે કે ટિકિટ આપવાના બદલામાં ઓરોપીએ કેટલા લોકો સાથે ઠગાઈ કરી છે.

આ મામલો આમ આદમી પાર્ટીની એક મહિલા કાર્યકર સાથે સંબંધિત છે. ACBના જણાવ્યા અનુસાર આ મહિલા પાસેથી કાઉન્સિલરની ટિકિટ અપાવવાના નામે 90 લાખ રૂપિયાની માંગણી કરવામાં આવી હતી. ધરપકડ કરાયેલા આરોપીઓમાં મોડલ ટાઉનથી AAP ધારાસભ્ય અખિલેશપતિ ત્રિપાઠીના સાળા ઓમ સિંહ, પીએ વિશાલ પાંડે અને અન્ય આરોપી પ્રિન્સ રઘુવંશીનો સમાવેશ થાય છે.

મહિલાનો દાવો ધારાસભ્યોને આપ્યા પૈસા
આ મામલો કમલા નગરના વોર્ડ નંબર 69નો છે. અહીં AAP કાર્યકર શોભા ખારીએ આમ આદમી પાર્ટી પાસેથી કાઉન્સિલરની ટિકિટની માંગણી કરી હતી. શોભાનો આરોપ છે કે ધારાસભ્ય અખિલેશ પાટી ત્રિપાઠીએ ટિકિટ અપાવવાના બદલામાં 90 લાખ રૂપિયાની માંગણી કરી હતી. ફરિયાદીએ કહ્યું કે તેણે અખિલેશપતિ ત્રિપાઠીને 35 લાખ રૂપિયા અને વજીરપુરના ધારાસભ્ય રાજેશ ગુપ્તાને 20 લાખ રૂપિયા લાંચ તરીકે આપ્યા હતા.

લિસ્ટમાં નામ આવ્યા બાદ 35 લાખ આપવાના હતા
શોભાના જણાવ્યા અનુસાર ડીલ મુજબ બાકીના 35 લાખ રૂપિયા લિસ્ટમાં નામ આવ્યા બાદ આપવાના હતા. યાદી જાહેર થયા બાદ જ્યારે શોભાનું નામ યાદીમાં નહોતું ત્યારે તેણે ધારાસભ્ય અખિલેશપતિ ત્રિપાઠીના સાળા ઓમ સિંહને આ અંગે ફરિયાદ કરી હતી. ઓમ સિંહે પૈસા પાછા આપવાનં કહ્યું હતું. ત્યાર બાદ ફરિયાદીએ આ અંગે એસીબીને ફરિયાદ કરી હતી અને લાંચ આપતી વખતે રેકોર્ડ કરાયેલ વિડિયો પણ એજન્સીને પુરાવા તરીકે આપ્યો હતો.

એસીબીએ ત્રણેયને રંગે હાથે ઝડપી પાડ્યા
ફરિયાદ મળ્યા બાદ એસીબીએ રેડ કરી ત્રણેય લોકોને પકડી પાડ્યા હતા. 15મી નવેમ્બરની રાત્રે ઓમ સિંહ તેના સાથી શિવશંકર પાંડે અને પ્રિન્સ રઘુવંશી સાથે 33 લાખ રૂપિયાની લાંચ લઈને ફરિયાદીના ઘરે પહોંચ્યા હતા. અહીં એસીબીએ સ્વતંત્ર સાક્ષીની હાજરીમાં ત્રણેયની રોકડ સાથે રંગે હાથે ધરપકડ કરી હતી.

BJPએ AAP પર હુમલો કર્યો
ACBના જણાવ્યા અનુસાર આ 33 લાખ રૂપિયા શરૂઆતમાં MCD ટિકિટ માટે આપવામાં આવેલી રકમનો માત્ર એક ભાગ હતા. એસીબીએ રિકવર કરેલી રકમ જપ્ત કરી છે. ACB ટૂંક સમયમાં આ કેસ સંબંધિત વજીરપુરના ધારાસભ્ય અખિલેશપતિ ત્રિપાઠી અને ધારાસભ્ય રાજેશ ગુપ્તા બંનેની પૂછપરછ કરશે. આ ધરપકડ બાદ હવે દિલ્હીનું રાજકારણ ગરમાયું છે. ભારતીય જનતા પાર્ટીના નેતા કપિલ મિશ્રાએ AAP ધારાસભ્યના સાળાની ધરપકડને લઈને આમ આદમી પાર્ટી પર નિશાન સાધ્યું છે.

Most Popular

To Top