ઈરાનના ઈસ્લામિક રિવોલ્યુશનરી ગાર્ડ કોર્પ્સ (IRGC) એ અમેરિકાને ચેતવણી આપી છે કે હોર્મુઝ સ્ટ્રેટમાં કોઈપણ હસ્તક્ષેપનો સખત જવાબ આપવામાં આવશે. ઈરાની સમાચાર એજન્સી IRNA અનુસાર IRGC એ જણાવ્યું હતું કે જો અમેરિકા તેના હુમલા ચાલુ રાખશે તો હોર્મુઝની પરિસ્થિતિ અસ્થિર બનશે, જેના પરિણામે ઘણા દેશોને આર્થિક નુકસાન થશે.
આ દરમિયાન ઈરાનની ફાર્સ ન્યૂઝ એજન્સીએ અહેવાલ આપ્યો છે કે અમેરિકાએ ચીન અને રશિયા સાથે જોડાયેલા ઉત્તરી ઈરાનમાં એક વ્યૂહાત્મક રેલ્વે પુલ પર ક્રુઝ મિસાઈલ હુમલો કર્યો છે.
છેલ્લા બે દિવસમાં અમેરિકાએ 170 થી વધુ ઈરાની લશ્કરી સ્થળો પર મિસાઈલ અને ડ્રોનથી હુમલો કર્યો છે. યુએસ સેન્ટ્રલ કમાન્ડ (CENTCOM) અનુસાર આ હુમલાઓમાં હવાઈ સંરક્ષણ પ્રણાલીઓ, ડ્રોન અને મિસાઈલ ભંડારો, લશ્કરી સ્પીડબોટ અને હોર્મુઝ સ્ટ્રેટ નજીકના દરિયાકાંઠાના વિસ્તારોમાં સ્થિત લશ્કરી સ્થાપનોને નિશાન બનાવવામાં આવ્યા હતા.
અમેરિકાએ ઈરાનમાં ચીન અને રશિયા સાથે જોડાયેલા રેલવે પુલ પર હુમલો કર્યો
ઈરાનની ફાર્સ ન્યૂઝ એજન્સીએ દાવો કર્યો છે કે અમેરિકાએ ઉત્તર ઈરાનમાં એક વ્યૂહાત્મક રેલવે પુલ પર બોમ્બમારો કર્યો હતો, જે ચીન અને રશિયાને જોડતા મહત્વપૂર્ણ રેલવે માર્ગનો ભાગ છે. અહેવાલો અનુસાર ગોલેસ્તાન પ્રાંતમાં ઓગ્તે ખાન રેલવે પુલ પર ગુરુવારે સવારે અમેરિકન ક્રુઝ મિસાઈલથી હુમલો કરવામાં આવ્યો હતો. આ પુલ ચીન અને તુર્કમેનિસ્તાન સુધી વિસ્તરેલા મહત્વપૂર્ણ ઈરાની રેલ કોરિડોરને જોડે છે.
ઈરાનની ચેતવણી: હોર્મુઝ સ્ટ્રેટમાં દખલગીરીનો જવાબ આપશે
ઈરાનના ઇસ્લામિક રિવોલ્યુશનરી ગાર્ડ કોર્પ્સ (IRGC) એ અમેરિકાને હોર્મુઝ સ્ટ્રેટ અને આસપાસના વિસ્તારોમાં જહાજોની ગતિવિધિમાં દખલગીરી કરવા સામે ચેતવણી આપી છે. IRGC એ ભારપૂર્વક જણાવ્યું હતું કે વિદેશી રાષ્ટ્રોનો આ મહત્વપૂર્ણ દરિયાઈ માર્ગ પર કોઈ અધિકાર નથી.
IRNA અનુસાર IRGC એ જણાવ્યું હતું કે જો અમેરિકા આ ક્ષેત્રમાં લશ્કરી કાર્યવાહી ચાલુ રાખશે તો ઈરાન કઠોર જવાબ આપશે. હોર્મુઝ સ્ટ્રેટમાં પરિસ્થિતિને ધીમે ધીમે સામાન્ય બનાવવાની પ્રક્રિયાને અસર થશે અને આ માર્ગ પર નિર્ભર દેશોના આર્થિક હિતોને નુકસાન થશે.
