ભારતના વડાપ્રધાન નરેન્દ્ર મોદી આવતા અઠવાડિયે ન્યુઝીલેન્ડની તેમની પ્રથમ સત્તાવાર મુલાકાતે જવાના છે. આ મુલાકાત બંને દેશો માટે ખૂબ જ મહત્વપૂર્ણ માનવામાં આવી રહી છે. ન્યુઝીલેન્ડના વડાપ્રધાન ક્રિસ્ટોફર લક્સને સોશિયલ મીડિયા પ્લેટફોર્મ ‘X’ પર આ માહિતી શેર કરીને પીએમ મોદીના સ્વાગતની ખુશી વ્યક્ત કરી છે. બંને દેશો વચ્ચે વેપાર, રોકાણ અને વ્યૂહાત્મક સહયોગ વધારવાના પ્રયાસો વચ્ચે આ મુલાકાતને નવા અધ્યાયની શરૂઆત તરીકે જોવામાં આવી રહી છે. વડાપ્રધાન ક્રિસ્ટોફર લક્સને પોતાના સંદેશમાં જણાવ્યું કે ભારત આજે વિશ્વની સૌથી ઝડપથી વિકસતી અર્થવ્યવસ્થાઓમાંનું એક છે. આવી સ્થિતિમાં ભારત સાથે મજબૂત ભાગીદારી ન્યુઝીલેન્ડ માટે ખૂબ જ મહત્વપૂર્ણ છે. તેમણે વિશ્વાસ વ્યક્ત કર્યો કે પીએમ મોદીની આ મુલાકાત બંને દેશો વચ્ચેના સંબંધોને વધુ મજબૂત બનાવશે અને અનેક નવા ક્ષેત્રોમાં સહયોગ વધારશે.
આ મુલાકાત એવા સમયે થઈ રહી છે જ્યારે બંને દેશો વચ્ચે મુક્ત વેપાર કરાર (Free Trade Agreement – FTA)ને લઈને ચર્ચાઓ અને સહયોગમાં ઝડપ આવી છે. આ કરારનો મુખ્ય હેતુ બંને દેશો વચ્ચે વેપાર વધારવાનો, રોકાણને પ્રોત્સાહન આપવાનો અને આર્થિક વિકાસને નવી ગતિ આપવાનો છે. ન્યુઝીલેન્ડ સરકારનું માનવું છે કે ભારતના 1.4 અબજ લોકોના વિશાળ બજારમાં તેમના ઉત્પાદનો અને સેવાઓ માટે મોટી તકો ઉપલબ્ધ છે. કૃષિ, ડેરી, શિક્ષણ, ટેક્નોલોજી અને સેવા ક્ષેત્રે બંને દેશો વચ્ચે સહયોગ વધવાની શક્યતા છે. ન્યુઝીલેન્ડના વેપારીઓ અને ઉદ્યોગોને ભારતીય બજારમાં પ્રવેશ મેળવવાથી નિકાસમાં વધારો થશે અને સ્થાનિક રોજગારીને પણ પ્રોત્સાહન મળશે.
ન્યુઝીલેન્ડના વેપાર અને રોકાણ મંત્રી ટોડ મેકલેએ અગાઉ જણાવ્યું હતું કે આગામી થોડા વર્ષોમાં ભારત અને ન્યુઝીલેન્ડ વચ્ચેનો દ્વિપક્ષીય વેપાર બમણો થઈ શકે છે. આ લક્ષ્યને ધ્યાનમાં રાખીને બંને દેશો સતત વેપાર અને રોકાણ સંબંધિત નવા અવસરો શોધી રહ્યા છે. ન્યુઝીલેન્ડ સરકારે આગામી 15 વર્ષમાં ભારતમાં અંદાજે 20 અબજ અમેરિકન ડોલર સુધીનું રોકાણ કરવાની પ્રતિબદ્ધતા વ્યક્ત કરી છે. આ રોકાણ વિવિધ ક્ષેત્રોમાં થઈ શકે છે, જેનાથી બંને દેશોની અર્થવ્યવસ્થાને ફાયદો થવાની આશા છે. મુક્ત વેપાર કરાર માત્ર વેપાર પૂરતો જ મર્યાદિત નથી. તેમાં કૃષિ ક્ષેત્રમાં આધુનિક ટેક્નોલોજીનો ઉપયોગ, રોકાણમાં વધારો, કુશળ માનવશક્તિની અવરજવર (ટેલેન્ટ મોબિલિટી), રમતગમત, પર્યટન અને લોકો વચ્ચેના સાંસ્કૃતિક સંબંધોને પણ વધુ મજબૂત બનાવવાનો સમાવેશ થાય છે.
આ કરારથી ભારતના ખેડૂતો, નાના અને મધ્યમ ઉદ્યોગો (MSME), મહિલા ઉદ્યોગસાહસિકો અને સ્ટાર્ટઅપ્સને પણ નવા બજારો મળશે. ભારતીય ઉત્પાદનોને ન્યુઝીલેન્ડમાં વધુ સરળતાથી પહોંચાડવાની તક મળશે, જ્યારે ભારતીય ગ્રાહકોને પણ ન્યુઝીલેન્ડના ઉચ્ચ ગુણવત્તાવાળા ઉત્પાદનોનો લાભ મળી શકશે. પર્યટન ક્ષેત્રમાં પણ આ મુલાકાત મહત્વપૂર્ણ બની શકે છે. બંને દેશો વચ્ચે પ્રવાસનને પ્રોત્સાહન આપવા અને વિદ્યાર્થીઓ તથા વ્યાવસાયિકો માટે નવી તકો ઉભી કરવા અંગે પણ ચર્ચા થવાની શક્યતા છે. શિક્ષણ ક્ષેત્રે પણ બંને દેશો વચ્ચે સહયોગ વધે તેવી અપેક્ષા છે.
પીએમ મોદીની આ મુલાકાત બંને દેશો વચ્ચે લાંબા ગાળાના આર્થિક અને વ્યૂહાત્મક સહયોગને વધુ મજબૂત બનાવવાની દિશામાં મહત્વપૂર્ણ પગલું માનવામાં આવી રહી છે. નિષ્ણાતોનું માનવું છે કે આ મુલાકાત બાદ વેપાર, રોકાણ અને ટેક્નોલોજી સહિતના અનેક ક્ષેત્રોમાં નવા કરારો થઈ શકે છે. ભારત અને ન્યુઝીલેન્ડ છેલ્લા કેટલાક વર્ષોથી પોતાના સંબંધોને સતત વિસ્તારી રહ્યા છે. હવે પીએમ મોદીની પ્રથમ સત્તાવાર ન્યુઝીલેન્ડ મુલાકાતથી બંને દેશો વચ્ચે વિશ્વાસ, વેપાર અને સહયોગને વધુ વેગ મળશે તેવી અપેક્ષા વ્યક્ત કરવામાં આવી રહી છે.
