કામરેજ વિધાનસભાના ધારાસભ્ય અને રાજ્યના આરોગ્ય મંત્રી પ્રફુલ પાનસેરીયાની સતર્કતા અને સમયસૂચકતાને કારણે કિમ નજીક એક્સપ્રેસ-વે પર એક બહુ મોટી સંભવિત દુર્ઘટના ટળી છે. હાઈવે પર કોઈ પણ પ્રકારની આડશ (બેરિકેડ) કે ચેતવણી વગર જોખમી રીતે ઊભેલી ટ્રકના ચાલકને મંત્રીએ જાતે ઊભા રહીને માત્ર ટોક્યો જ નહીં, પરંતુ તાત્કાલિક પોલીસ કાફલો બોલાવી કાયદેસરનો દંડ પણ ફટકાર્યો હતો.
શું હતી સમગ્ર ઘટના ?
મળતી વિગતો મુજબ, રાજ્યના આરોગ્ય મંત્રી પ્રફુલ પાનસેરીયા કિમ નજીક એક્સપ્રેસ-વે પરથી પસાર થઈ રહ્યા હતા. આ દરમિયાન તેમનું ધ્યાન રોડ પર અત્યંત જોખમી સ્થિતિમાં ઊભેલી એક ટ્રક પર ગયું હતું. મામલાની ગંભીરતા સમજી તેમણે તાત્કાલિક પોતાની કાર અટકાવીને તપાસ કરી, તો જાણવા મળ્યું કે ટ્રકનું ટાયર ફાટી ગયું હોવાને કારણે તેને ત્યાં ઊભી રાખવામાં આવી હતી.
ગંભીર બેદરકારી: એક્સપ્રેસ-વે જેવા વ્યસ્ત અને હાઈ-સ્પીડ માર્ગ પર ટ્રક ચાલકે વાહનની પાછળ કોઈ પણ પ્રકારનું રિફ્લેક્ટર, આડશ કે ચેતવણીનું બોર્ડ મૂક્યું ન હતું. એક્સપ્રેસ-વે પર વાહનોની ગતિ ખૂબ વધારે હોવાથી પાછળથી આવતા અન્ય વાહનો આ ટ્રક સાથે ભટકાય અને જીવલેણ અકસ્માત સર્જાય તેવી પૂરેપૂરી સંભાવના હતી.
મંત્રીએ લીધું તાત્કાલિક એક્શન, પોલીસ બોલાવી
ટ્રક ચાલકની આ ગંભીર બેદરકારી જોઈને મંત્રી પ્રફુલ પાનસેરીયાએ સહેજ પણ સમય ગુમાવ્યા વિના સુરત જિલ્લા ટ્રાફિક પોલીસ અને સુરત જિલ્લા LCB (લોકલ ક્રાઈમ બ્રાન્ચ)ની ટીમને ફોન કરીને ઘટનાસ્થળે બોલાવી લીધી હતી.
પોલીસે ઘટનાસ્થળે પહોંચીને સૌથી પહેલાં ટ્રકની પાછળ સુરક્ષિત આડશ (બેરિકેડિંગ) મુકાવ્યું, જેથી પાછળથી પુરપાટ ઝડપે આવતા વાહનો એલર્ટ થઈ શકે. આ સાથે જ હાઈવે પર અન્ય નિર્દોષ લોકોનો જીવ જોખમમાં મૂકવા બદલ ટ્રાફિક પોલીસે ટ્રક ચાલકને સ્થળ પર જ કાયદેસરનો દંડ ફટકાર્યો હતો અને ભવિષ્યમાં આવી ભૂલ ન કરવા કડક શબ્દોમાં તાકીદ કરી હતી.
આરોગ્ય મંત્રી અને સુરત ગ્રામ્ય પોલીસની જાહેર અપીલ
આ ઘટના બાદ આરોગ્ય મંત્રી પ્રફુલ પાનસેરીયાએ તમામ વાહનચાલકોને સુરક્ષાના નિયમો પાળવા માટે ખાસ અપીલ કરી છે:
- વોર્નિંગ સાઇન જરૂરી: જ્યારે પણ હાઈવે કે એક્સપ્રેસ-વે પર તમારા વાહનમાં કોઈ ટેકનિકલ ખામી સર્જાય, ટાયર ફાટે કે અકસ્માત થાય, ત્યારે વાહનની પાછળ અચૂક આડશ, ચેતવણીનું બોર્ડ કે રિફ્લેક્ટર મૂકો, જેથી પાછળથી આવતા ચાલકો અકસ્માતથી બચી શકે.
- તુરંત સંપર્ક કરો: આવી કટોકટીની સ્થિતિમાં તાત્કાલિક NHAI (નેશનલ હાઈવે ઓથોરિટી) અથવા સ્થાનિક પોલીસનો સંપર્ક કરવો જોઈએ, જેથી સમયસર મદદ મળી રહે અને મોટી દુર્ઘટના નિવારી શકાય.
સુરત ગ્રામ્ય પોલીસની ચેતવણી
સુરત ગ્રામ્ય પોલીસ દ્વારા પણ કડક શબ્દોમાં અપીલ કરાઇ છે કે એક્સપ્રેસ-વે કે NH 48 પર કોઈએ પણ નિયત કરેલ પોઈન્ટ સિવાય વાહન ઊભા રાખવા નહીં. જો કોઈ આ બાબતે બેદરકારી દાખવશે તો તેની સામે કડક કાયદેસરની કાર્યવાહી કરવામાં આવશે. વાહન ખોટકાય તો તુરંત પોલીસ અને NHAI ને જાણ કરવી અનિવાર્ય છે.
હાઈવે પર ઊભેલા વાહનો પાછળ થતા અકસ્માતો કેમ બને છે જીવલેણ ?
હાઈવે પર સ્થિર ઊભેલા ટ્રક પાછળ કાર અથવા ટૂ-વ્હીલર અથડાવાના અકસ્માતો ખરેખર અત્યંત ગંભીર અને મોટાભાગે જીવલેણ સાબિત થાય છે. ખાસ કરીને રાત્રિના સમયે, ધુમ્મસમાં, ભારે વરસાદમાં અથવા જ્યારે ટ્રક યોગ્ય રીતે પાર્ક ન કરાયો હોય ત્યારે પાછળના વાહનમાં બેઠેલા લોકોના મોતની શક્યતા વધી જાય છે.
અકસ્માત પાછળના મુખ્ય કારણો
- ટ્રકને રોડની વચ્ચે અથવા સાઈડમાં યોગ્ય ઈન્ડિકેટર વગર ઊભો રાખવો.
- પાર્કિંગ લાઇટ, રિફ્લેક્ટર અથવા હેઝર્ડ લાઇટ ચાલુ ન રાખવી.
- ચેતવણી માટે ટ્રાયએંગલ કે બેરિકેડ ન મૂકવા.
- ઓવરલોડેડ અથવા ટેકનિકલ ખામીવાળા વાહનોને રસ્તા પર જ છોડી દેવા.
- ડ્રાઈવરની થાકેલી સ્થિતિ અથવા સુરક્ષા પ્રત્યે ઘોર બેદરકારી.
’સેફ્ટી ફર્સ્ટ’ માટેના મહત્વના સૂચનો
૧. દરેક ટ્રકમાં હાઈ-વિઝિબિલિટી રિફ્લેક્ટર અને રેડિયમ ટેપ ફરજિયાત હોવી જોઈએ.
૨. વાહન ઊભું રાખવું પડે તો પૂરતું સેફ અંતર રાખીને પાછળ ‘વોર્નિંગ ટ્રાયએંગલ’ મૂકવો અને રાત્રે હેઝર્ડ લાઇટ ચાલુ રાખવી.
૩. કાર અને ટૂ-વ્હીલર ચાલકોએ પણ હાઈવે પર સ્પીડ કંટ્રોલ અને સેફ ડિસ્ટન્સ (યોગ્ય અંતર) જાળવવું.
૪. તંત્ર દ્વારા હાઈવે પેટ્રોલિંગ અને CCTV મોનિટરિંગ વધુ સઘન બનાવવું જોઈએ.
લોકોના કિંમતી જાન બચાવવા માટે ટ્રાન્સપોર્ટ વિભાગ, પોલીસ, ટ્રક ઓપરેટર્સ અને સામાન્ય ડ્રાઈવરો — સૌએ જવાબદારીપૂર્વક સેફ્ટી નિયમોનું પાલન કરવું એ સમયની માંગ છે.
