CJPના સ્થાપક અભિજીત દિપકએ X પર પોસ્ટ કરીને લખ્યું કે તેમને આ કાર્યવાહી અંગે પહેલેથી જ અંદાજ હતો. તેમણે કહ્યું કે “અપેક્ષા મુજબ ભારતમાં કોકરોચ જનતા પાર્ટીનું એકાઉન્ટ બંધ કરવામાં આવ્યું છે.” તેમની આ પોસ્ટ સોશિયલ મીડિયા પર ઝડપથી વાયરલ થઈ હતી. અભિજીત દિપક પુણેના 30 વર્ષીય રાજકીય સંદેશાવ્યવહાર વ્યૂહરચનાકાર છે. તેઓ અગાઉ આમ આદમી પાર્ટીની સોશિયલ મીડિયા ટીમ સાથે પણ જોડાયેલા રહી ચૂક્યા છે. જાહેર સંબંધો અને પત્રકારત્વમાં પૃષ્ઠભૂમિ ધરાવતા દિપકએ 16 મે, 2026ના રોજ ‘કોકરોચ જનતા પાર્ટી’ નામની આ ઓનલાઈન વ્યંગાત્મક ચળવળ શરૂ કરી હતી. CJP ઝડપથી સોશિયલ મીડિયા પર લોકપ્રિય બની ગઈ હતી. X પર તેનું એકાઉન્ટ બંધ થાય તે પહેલાં 2 લાખથી વધુ ફોલોઅર્સ હતા. બીજી તરફ ઇન્સ્ટાગ્રામ પર પાર્ટીને કરોડો લોકો ફોલો કરવા લાગ્યા હતા. કેટલાક અહેવાલો અનુસાર, CJPના ઇન્સ્ટાગ્રામ ફોલોઅર્સની સંખ્યા ભાજપ અને કોંગ્રેસના ઓફિશિયલ પેજથી પણ વધુ પહોંચી ગઈ હતી.
અભિજીત દિપકએ આરોપ લગાવ્યો કે પાર્ટીના સોશિયલ મીડિયા એકાઉન્ટ્સને ટાર્ગેટ કરવામાં આવી રહ્યા છે. એક વીડિયોમાં તેમણે કહ્યું કે “અમારું એકાઉન્ટ હેક કરવાનો પ્રયાસ થઈ રહ્યો છે. 20-21 વર્ષના યુવાનોને ટાર્ગેટ કરવાનું ખૂબ દુઃખદ છે.” તેમણે એવો પણ દાવો કર્યો કે ઇન્સ્ટાગ્રામ એકાઉન્ટ સાથે પણ ચેડાં કરવાનો પ્રયાસ થયો હતો. Xની ગાઇડલાઇન મુજબ, જ્યારે કોઈ માન્ય કાનૂની સત્તા તરફથી યોગ્ય માંગણી આવે ત્યારે ચોક્કસ દેશમાં એકાઉન્ટ બ્લોક કરી શકાય છે. જોકે, આ કેસમાં કઈ સરકારી એજન્સીએ કાર્યવાહી માટે માંગણી કરી તે અંગે જાહેરમાં કોઈ સત્તાવાર માહિતી આપવામાં આવી નથી.
CJP માત્ર સોશિયલ મીડિયા ચળવળ હોવા છતાં રાજકીય વર્તુળોમાં ચર્ચાનું કેન્દ્ર બની ગઈ છે. મહુઆ મોઇત્રા, કીર્તિ આઝાદ અને પ્રશાંત ભૂષણ જેવા જાણીતા રાજકીય નેતાઓએ પણ આ ચળવળને સમર્થન આપ્યું હોવાનું કહેવાય છે. પાર્ટીના મેનિફેસ્ટોમાં અનેક રાજકીય અને ન્યાયિક મુદ્દાઓ ઉઠાવવામાં આવ્યા હતા. તેમાં ચૂંટણી પંચ, મીડિયા સ્વતંત્રતા, દળબદલી વિરોધી કડક કાયદા અને નિવૃત્ત ન્યાયાધીશો અંગેના મુદ્દાઓનો સમાવેશ થતો હતો. અહેવાલો મુજબ, CJP સાથે જોડાયેલા કેટલાક સમર્થકો બિહારની બાંકીપુર વિધાનસભા પેટાચૂંટણી લડવાનો વિચાર પણ કરી રહ્યા છે. જોકે, CJP હાલ સુધી ભારતના ચૂંટણી પંચમાં સત્તાવાર રાજકીય પક્ષ તરીકે નોંધાયેલ નથી અને તે માત્ર એક ઓનલાઈન વ્યંગાત્મક અભિયાન તરીકે જ કાર્યરત છે.
