BCCIએ શ્રીલંકા સામે રમાનારી 2 મેચની ટેસ્ટ સિરીઝ માટે ટીમ ઈન્ડિયાની જાહેરાત કરી છે. શુભમન ગિલને ટીમની કમાન સોંપવામાં આવી છે, જ્યારે કેએલ રાહુલને ઉપકપ્તાન બનાવવામાં આવ્યા છે. અનુભવી ઓલરાઉન્ડર રવિન્દ્ર જાડેજા અને સ્ટાર ફાસ્ટ બોલર જસપ્રિત બુમરાહની ટીમમાં વાપસી થઈ છે. સાથે જ 2 યુવા ખેલાડીઓને પ્રથમ વખત ભારતીય ટેસ્ટ ટીમમાં સ્થાન મળતાં તેમની કારકિર્દીને મોટી તક મળી છે.
ગુરનૂર બરાર અને સારાંશ જૈનને પ્રથમ વખત તક
શ્રીલંકા પ્રવાસ માટે જાહેર કરાયેલી ટીમમાં ગુરનૂર બરાર અને સારાંશ જૈનને પ્રથમ વખત ટેસ્ટ ટીમમાં સામેલ કરવામાં આવ્યા છે. ગુરનૂર બરારે તાજેતરમાં અફઘાનિસ્તાન સામે વનડેમાં ડેબ્યૂ કરીને પ્રભાવશાળી દેખાવ કર્યો હતો અને હવે તેમને ટેસ્ટ ટીમમાં સ્થાન મળ્યું છે.
બીજી તરફ મધ્ય પ્રદેશના ઓલરાઉન્ડર સારાંશ જૈનને પણ પ્રથમ વખત ભારતીય ટેસ્ટ ટીમમાં સામેલ કરવામાં આવ્યા છે. ઓફ સ્પિન બોલિંગ અને ડાબોડી બેટિંગ માટે જાણીતા સારાંશે ઘરેલુ ક્રિકેટમાં સતત સારું પ્રદર્શન કર્યું હતું. ઇજાગ્રસ્ત વોશિંગ્ટન સુંદરની ગેરહાજરીમાં તેમને તક આપવામાં આવી છે.
વોશિંગ્ટન સુંદર ઇજાને કારણે બહાર
વોશિંગ્ટન સુંદર ઇંગ્લેન્ડ પ્રવાસ દરમિયાન ઇજાગ્રસ્ત થયા હતા અને હાલમાં તેઓ રિકવરી પર કામ કરી રહ્યા છે. BCCIએ સ્પષ્ટ કર્યું છે કે તેઓ ઓછામાં ઓછા પ્રથમ ટેસ્ટ માટે ઉપલબ્ધ રહેશે નહીં. તેમના સ્થાને સારાંશ જૈનને ટીમમાં સામેલ કરવામાં આવ્યા છે.
બુમરાહ અને સાઈ સુદર્શનની ફિટનેસ પર નજર
જસપ્રિત બુમરાહ અને સાઈ સુદર્શનને ટીમમાં સ્થાન આપવામાં આવ્યું છે, પરંતુ બંનેનું અંતિમ રમવું તેમની ફિટનેસ પર નિર્ભર રહેશે. જો બંને ખેલાડીઓ ફિટનેસ ટેસ્ટ સફળતાપૂર્વક પાસ કરશે તો જ તેઓ પ્લેઇંગ ઇલેવન માટે ઉપલબ્ધ રહેશે.
શ્રીલંકા સામેની ટેસ્ટ સિરીઝ માટે ભારતીય ટીમ
શુભમન ગિલ (કેપ્ટન), કેએલ રાહુલ (ઉપકપ્તાન), યશસ્વી જયસ્વાલ, ઋષભ પંત (વિકેટકીપર), સાઈ સુદર્શન, ધ્રુવ જુરેલ (વિકેટકીપર), રવિન્દ્ર જાડેજા, કુલદીપ યાદવ, માનવ સુથાર, જસપ્રિત બુમરાહ, મોહમ્મદ સિરાજ, પ્રસિદ્ધ કૃષ્ણા, ગુરનૂર બરાર, દેવદત્ત પડિક્કલ અને સારાંશ જૈન.
હવે શ્રીલંકા સામેની આ ટેસ્ટ સિરીઝમાં યુવા ખેલાડીઓની સાથે અનુભવી ક્રિકેટરોના સંયોજન પર સૌની નજર રહેશે. ખાસ કરીને શુભમન ગિલની કેપ્ટનશિપ, જાડેજા-બુમરાહની વાપસી અને નવા ખેલાડીઓના પ્રદર્શન પર ક્રિકેટપ્રેમીઓની ખાસ નજર રહેશે.
