દિલ્હીના જંતર-મંતર ખાતે ચાલી રહેલા વિરોધ પ્રદર્શન દરમિયાન શનિવારે એક નાટકીય ઘટના બની હતી. કોકરોચ જનતા પાર્ટી (CJP)ના સ્થાપક અભિજીત દિપકે પર એક મહિલાએ અચાનક શાહી ફેંકી હતી અને તેમને થપ્પડ મારવાનો પણ પ્રયાસ કર્યો હતો. આ ઘટનાથી વિરોધ સ્થળે થોડા સમય માટે ભારે અફરાતફરી અને હોબાળો મચી ગયો હતો. સમગ્ર ઘટનાનો વીડિયો સોશિયલ મીડિયા પર ઝડપથી વાયરલ થઈ રહ્યો છે, જેમાં મહિલા અચાનક અભિજીત દિપકેની નજીક પહોંચે છે અને તેમના પર શાહી ફેંકતી જોવા મળે છે. ઘટના બનતા જ ત્યાં હાજર સ્વયંસેવકો અને સમર્થકોએ મહિલાને તરત જ પકડી લીધી હતી, જેના કારણે સ્થિતિ વધુ બગડતા બચી ગઈ હતી. આ ઘટના એવા સમયે બની જ્યારે અભિજીત દિપકે પોતાના સમર્થકો અને વિરોધ પ્રદર્શનમાં જોડાયેલા લોકો સાથે વાતચીત કરી રહ્યા હતા. તેમની આસપાસ મોટી સંખ્યામાં લોકો હાજર હતા. અચાનક એક મહિલા આગળ આવી અને તેમના પર શાહી ફેંકી દીધી. આરોપ છે કે ત્યારબાદ તેણે દિપકેને થપ્પડ મારવાનો પ્રયાસ પણ કર્યો હતો, પરંતુ સુરક્ષામાં રહેલા લોકો અને સ્વયંસેવકોએ તરત જ મહિલાને રોકી લીધી હતી. ઘટનાને પગલે થોડા સમય માટે સ્થળ પર દોડધામ અને ગભરાટનો માહોલ સર્જાયો હતો.
આ ઘટનાની ખાસ વાત એ છે કે તે સોનમ વાંગચુકને હોસ્પિટલમાં ખસેડવાની કાર્યવાહી બાદ બની હતી. શનિવારની સવારે દિલ્હી પોલીસે સામાજિક કાર્યકર સોનમ વાંગચુકને જંતર-મંતર પરથી સફદરજંગ હોસ્પિટલમાં દાખલ કર્યા હતા. વાંગચુક છેલ્લા 21 દિવસથી અનિશ્ચિત ભૂખ હડતાળ પર હતા અને તેમની તબિયત સતત બગડી રહી હોવાનું કહેવામાં આવી રહ્યું હતું. દિલ્હી પોલીસના જણાવ્યા અનુસાર ડૉક્ટરોની સલાહ અને દિલ્હી હાઈકોર્ટના નિર્દેશોને ધ્યાનમાં રાખીને જ તેમને હોસ્પિટલમાં ખસેડવામાં આવ્યા હતા. સોનમ વાંગચુકને હોસ્પિટલ લઈ જવાની પોલીસ કાર્યવાહીના થોડા જ સમય બાદ અભિજીત દિપકેએ પોતે પણ અનિશ્ચિત ભૂખ હડતાળ શરૂ કરવાની જાહેરાત કરી હતી. તેમણે સોશિયલ મીડિયા પ્લેટફોર્મ ‘X’ પર પોસ્ટ કરીને લખ્યું હતું કે હવે તેઓ પણ અનિશ્ચિત સમય સુધી ઉપવાસ પર રહેશે. તેમની આ જાહેરાત બાદ વિરોધ પ્રદર્શન વધુ ઉગ્ર બન્યું હતું અને મોટી સંખ્યામાં સમર્થકો જંતર-મંતર પર એકત્ર થયા હતા.
અભિજીત દિપકેએ પોલીસ પર ગંભીર આરોપો પણ લગાવ્યા હતા. તેમણે કહ્યું હતું કે સોનમ વાંગચુકને હોસ્પિટલ લઈ જવાના બહાને પોલીસે વિરોધીઓને બળજબરીથી હટાવવાનો પ્રયાસ કર્યો હતો. તેમણે એવો પણ દાવો કર્યો કે પોલીસ દ્વારા કેટલાક કાર્યકરો સાથે મારપીટ કરવામાં આવી હતી અને કેટલાક લોકોને અટકાયતમાં લેવામાં આવ્યા હતા. જોકે, દિલ્હી પોલીસે આ તમામ આરોપોને નકારી કાઢ્યા હતા. પોલીસનું કહેવું છે કે સોનમ વાંગચુકની તબિયત બગડતાં તેમને સારવાર માટે હોસ્પિટલમાં લઈ જવા સિવાય બીજો કોઈ વિકલ્પ નહોતો. પોલીસે વધુમાં જણાવ્યું હતું કે સમગ્ર કાર્યવાહી દરમિયાન કાયદો અને વ્યવસ્થા જાળવવાનો પ્રયાસ કરવામાં આવ્યો હતો. સાથે જ વિરોધીઓને શાંતિપૂર્ણ રીતે વિરોધ સ્થળ ખાલી કરવાની અપીલ પણ કરવામાં આવી હતી. હાલમાં જંતર-મંતર પર કેટલાક કાર્યકરો હજુ પણ વિરોધ ચાલુ રાખી રહ્યા છે. ઓલ ઈન્ડિયા સ્ટુડન્ટ્સ એસોસિએશન (AISA)ના કાર્યકરો નેહા, અમીન અને મનીષ સહિત કેટલાક લોકો હજુ પણ ભૂખ હડતાળ પર હોવાનું જાણવા મળ્યું છે. તેઓ સોનમ વાંગચુકના સમર્થનમાં પોતાનો વિરોધ ચાલુ રાખી રહ્યા છે.
આ સમગ્ર વિરોધનું કેન્દ્ર NEET પરીક્ષામાં કથિત ગેરરીતિઓ અને તેના કારણે વિદ્યાર્થીઓને થયેલા નુકસાનનો મુદ્દો છે. વિરોધીઓનો આરોપ છે કે પરીક્ષા પ્રક્રિયામાં ગંભીર અનિયમિતતાઓ થઈ હતી અને અનેક વિદ્યાર્થીઓને અન્યાય થયો હતો. કેટલાક વિદ્યાર્થીઓના મોતના મુદ્દે પણ સરકાર સામે સવાલો ઉઠાવવામાં આવી રહ્યા છે. આ જ મુદ્દાને લઈને કોકરોચ જનતા પાર્ટી અને અન્ય સંગઠનો લાંબા સમયથી વિરોધ કરી રહ્યા છે. સોનમ વાંગચુકે પણ આ આંદોલનને સમર્થન આપતાં 28 જૂનથી અનિશ્ચિત ભૂખ હડતાળ શરૂ કરી હતી. છેલ્લા ત્રણ અઠવાડિયાથી તેઓ સતત ઉપવાસ પર હતા. તેમની તબિયત વધુ બગડતાં ડૉક્ટરો દ્વારા હોસ્પિટલમાં દાખલ કરવાની સલાહ આપવામાં આવી હતી. ત્યારબાદ પોલીસે તેમને સફદરજંગ હોસ્પિટલમાં ખસેડ્યા હતા. અભિજીત દિપકે પર શાહી ફેંકવાની ઘટના બાદ વિરોધ સ્થળે સુરક્ષા વધુ કડક કરવામાં આવી છે. દિલ્હી પોલીસે સમગ્ર ઘટનાની તપાસ શરૂ કરી છે. શાહી ફેંકનાર મહિલાની ઓળખ અને તેના હેતુ અંગે પૂછપરછ ચાલી રહી છે. પોલીસે હજુ સુધી આ મામલે કોઈ સત્તાવાર નિવેદન આપ્યું નથી કે મહિલા કોઈ સંગઠન સાથે જોડાયેલી હતી કે નહીં.
ઘટનાનો વીડિયો સોશિયલ મીડિયા પર ઝડપથી વાયરલ થયો છે. વીડિયોમાં સ્પષ્ટ જોવા મળે છે કે મહિલા અચાનક ભીડમાંથી આગળ આવે છે અને દિપકેની નજીક જઈને શાહી ફેંકે છે. ત્યારબાદ આસપાસના લોકો તરત જ તેને રોકી લે છે. આ ઘટનાએ સોશિયલ મીડિયા પર પણ ભારે ચર્ચા જગાવી છે. કેટલાક લોકો આ ઘટનાની નિંદા કરી રહ્યા છે, જ્યારે કેટલાક લોકો વિરોધ પ્રદર્શન દરમિયાન સુરક્ષા વ્યવસ્થાને લઈને પણ સવાલો ઉઠાવી રહ્યા છે. રાજધાની દિલ્હીમાં ચાલી રહેલા આ વિરોધ પ્રદર્શન વચ્ચે બનેલી આ ઘટના ફરી એકવાર ચર્ચાનું કેન્દ્ર બની છે. એક તરફ સોનમ વાંગચુકની તબિયત, બીજી તરફ અભિજીત દિપકેની ભૂખ હડતાળ અને હવે તેમના પર થયેલો શાહી હુમલો, આ તમામ ઘટનાઓને કારણે જંતર-મંતરનું વાતાવરણ વધુ તંગ બન્યું છે. હવે પોલીસ તપાસ બાદ જ સ્પષ્ટ થશે કે આ હુમલો પૂર્વનિયોજિત હતો કે પછી કોઈ વ્યક્તિગત વિરોધના કારણે કરવામાં આવ્યો હતો.
