સ્થાનિક પ્રશ્નોથી ત્રસ્ત જનતા વચ્ચે નેતાઓની દોડધામ; ભાજપ-કોંગ્રેસ બંને પક્ષોમાં જમીની સ્તરે પ્રચાર નબળો પડ્યો
વડોદરાની માંજલપુર વિધાનસભા બેઠક પર યોજાનારી પેટાચૂંટણીનો માહોલ દિન-પ્રતિદિન વધુને વધુ નીરસ બની રહ્યો છે. પરંપરાગત રીતે હાઈ-વોલ્ટેજ ગણાતી આ બેઠક પર આ વખતે પ્રચાર દરમિયાન ભાજપ અને કોંગ્રેસ બંને પક્ષોના કાર્યકરોની હાજરી નહિવત અથવા પાંખી જોવા મળી રહી છે, જેના કારણે ચૂંટણીનો અસલી રોમાંચ ગાયબ થઈ ગયો છે.
સ્થાનિક રાજકીય વિશ્લેષકોના મતે, આ નીરસતા પાછળનું મુખ્ય કારણ ભાજપ દ્વારા કરવામાં આવેલી ઉમેદવારની અણધારી પસંદગી છે. માંજલપુર બેઠક માટે સેન્સ પ્રક્રિયા દરમિયાન ૧૦૪ જેટલા સ્થાનિક અગ્રણીઓએ મજબૂત દાવેદારી નોંધાવી હતી. જોકે, સ્થાનિક દાવેદારોને બાજુ પર મૂકીને પક્ષ દ્વારા સતીષ પટેલના નામની અચાનક જાહેરાત કરવામાં આવતા સંગઠન અને દાવેદારોમાં ભારે અસંતોષ અને છૂપો રોષ ફાટી નીકળ્યો છે. આ આયાતી અથવા અણધાર્યા ઉમેદવાર લાદવામાં આવતા ભાજપના સ્થાનિક વરિષ્ઠ આગેવાનો અને અસંતુષ્ટ કાર્યકરોએ મન મનાવી લીધું છે અને આ ઉમેદવારને માત્ર એક ‘નાઈટ વોચમેન’ સમાન ગણી રહ્યા છે. તેમનું માનવું છે કે આ ગોઠવણ માત્ર સમય પસાર કરવા પૂરતી જ છે, જેના કારણે કાર્યકરોમાં પ્રચાર માટેનો કોઈ ઉત્સાહ બચ્યો નથી.
બીજી તરફ, કોંગ્રેસે પૂર્વ મંત્રી ભીખાભાઈ રબારીને મેદાનમાં ઉતારીને મોટો દાવ ખેલવાનો પ્રયાસ કર્યો છે, પરંતુ ત્યાં પણ સ્થિતિ બહુ અલગ નથી. કોંગ્રેસના કાર્યકરો પણ લાંબા સમયની નિષ્ક્રિયતા અને આંતરિક જૂથબંધીના કારણે જમીની સ્તરે સક્રિય દેખાઈ રહ્યા નથી. પરિણામે, બંને પક્ષોના મોટા નેતાઓની હાજરી હોવા છતાં, સામાન્ય કાર્યકર્તાઓ અને મતદારોમાં ચૂંટણીને લઈને ભારે ઉદાસીનતા પ્રવર્તી રહી છે. ચોમાસાની મોસમમાં સ્થાનિક સ્તરે રોડ-રસ્તા અને પાણી ભરાવાની ગંભીર સમસ્યાઓથી ત્રસ્ત જનતા પણ નેતાઓના વચનોથી કંટાળી ચૂકી છે. કાર્યકરોની પાંખી હાજરી અને જનતાની નીરસતા વચ્ચે યોજાઈ રહેલી આ પેટાચૂંટણી આગામી દિવસોમાં કેવું પરિણામ લાવશે તેના પર સૌની નજર મંડાયેલી છે.
