ગાંધીનગર
ભારતીય સંસ્કૃતિના તેજ અને અસ્મિતાના પ્રતીક સમાન ભગવાન સોમનાથ મહાદેવના સાંનિધ્યમાં આજે ‘સોમનાથ અમૃતપર્વ-૨૦૨૬’ની ઐતિહાસિક ઉજવણી કરવામાં આવી હતી. સોમનાથ મંદિરના પુનઃનિર્માણના ૭૫ ગૌરવશાળી વર્ષ પૂર્ણ થવાના અવસરે વડાપ્રધાન અને સોમનાથ ટ્રસ્ટના અધ્યક્ષ નરેન્દ્ર મોદીએ પ્રભાસ પાટણની પવિત્ર ધરા પર પધારી મહાદેવના આશીર્વાદ મેળવ્યા હતા.
ભવ્ય સ્વાગત અને સાંસ્કૃતિક વિરાસતનું દર્શન
વડાપ્રધાન મોદીનું આગમન થતાં જ વીર હમીરજી સર્કલ પાસે મંદિરના મુખ્ય પ્રવેશ દ્વારે તેમનું અભૂતપૂર્વ સ્વાગત કરવામાં આવ્યું હતું. ભારતની વિવિધતાસભર સંસ્કૃતિની ઝાંખી વચ્ચે ૭૫ ઢોલીઓના નાદ અને ૧૦૦ જેટલી કન્યાઓએ માથે અમૃત કળશ ધારણ કરી વડાપ્રધાન મોદીને આવકાર્યા હતા. આ માર્ગ પર સોમનાથની થીમ પર આધારિત આકર્ષક રેત શિલ્પ (Sand Art) વડાપ્રધાનના આકર્ષણનું કેન્દ્ર બન્યું હતું.
સરદાર પટેલને પુષ્પાંજલિ અને મહાપૂજા
મંદિરમાં પ્રવેશતા પૂર્વે વડાપ્રધાન મોદીએ અખંડ ભારતના શિલ્પી અને સોમનાથ મંદિરના પુનઃનિર્માણના સ્વપ્નદ્રષ્ટા સરદાર વલ્લભભાઈ પટેલની પ્રતિમાને ભાવપૂર્વક પુષ્પાંજલિ અર્પણ કરી હતી. ત્યારબાદ, ઋષિકુમારોના શંખનાદ અને ડમરુના ગુંજારવ વચ્ચે તેઓએ નિજ મંદિરમાં પ્રવેશ કર્યો હતો. ત્યાં શાસ્ત્રોક્ત વિધિ મુજબ મહાપૂજા, કુંભાભિષેક અને ધ્વજારોહણ કરી વડાપ્રધાન દેશની પ્રગતિ અને જન-જનની સુખાકારી માટે પ્રાર્થના કરી હતી.
વાયુસેનાની આકાશી સલામી અને પુષ્પવર્ષા
આ પવિત્ર અવસરને વધુ યાદગાર બનાવવા માટે ભારતીય વાયુસેના દ્વારા વિશેષ સલામી આપવામાં આવી હતી.
- સૂર્યકિરણ એરોબેટિક્સ ટીમ: સોમનાથના આકાશમાં વાયુસેનાની સૂર્યકિરણ ટીમે દિલધડક એર શો રજૂ કરી મેદનીને મંત્રમુગ્ધ કરી દીધી હતી.
- પુષ્પવર્ષા: એરફોર્સના બે ચેતક હેલિકોપ્ટર્સ દ્વારા મંદિરના શિખર પર પુષ્પવર્ષા કરવામાં આવી હતી, જેનાથી સમગ્ર વાતાવરણ ભક્તિમય અને દિવ્ય બની ગયું હતું.
મહાનુભાવોની ઉપસ્થિતિ
આ કાર્યક્રમમાં વડાપ્રધાનની સાથે ગુજરાતના મુખ્યમંત્રી ભૂપેન્દ્ર પટેલ અને નાયબ મુખ્યમંત્રી હર્ષ સંઘવી પણ ખાસ ઉપસ્થિત રહ્યા હતા. વડાપ્રધાન મોદીએ મંદિર પરિસરમાં આયોજિત સોમનાથની વિરાસત અને ઇતિહાસને દર્શાવતા વિશેષ પ્રદર્શનની પણ મુલાકાત લીધી હતી. આમ, ‘વિરાસત અને વિકાસ’ના સંગમ સમાન આ અમૃતપર્વે સોમનાથ મંદિરના ૭૫ વર્ષના ગૌરવશાળી ઇતિહાસને વિશ્વભરમાં પુનઃ પ્રસ્થાપિત કર્યો છે.
