દરજીપુરા નજીક ભયાનક અકસ્માત, 100 મીટર સુધી ટેમ્પો ઢસડાતાં 28 વર્ષીય વિકી પટેલનું ઘટનાસ્થળે જ કરુણ મોત
હાઇવે પર બગડેલા વાહન પાસે ઊભા રહેવાની જોખમી સ્થિતિ ફરી ઉજાગર, કપુરાઈ પોલીસે ગુનો નોંધી તપાસ શરૂ કરી
(પ્રતિનિધિ), વડોદરા, તા. 13
વડોદરા શહેરના દરજીપુરા વિસ્તાર નજીક આવેલા નેશનલ હાઇવે નં. 48 પર શનિવારે એક હૃદયદ્રાવક અને ગમખ્વાર અકસ્માત સર્જાયો હતો. પોતાના આઇસર ટેમ્પોનો એક્સલ તૂટી જતાં વાહન ચેક કરવા માટે નીચે ઉતરેલા 28 વર્ષીય આશાસ્પદ યુવક વિકીભાઈ પટેલને પાછળથી પૂરપાટ ઝડપે આવેલા અન્ય આઇસર ટેમ્પોએ જોરદાર ટક્કર મારી હતી. અકસ્માત એટલો ભયાનક હતો કે ઊભેલો ટેમ્પો અંદાજે 100 મીટર સુધી રોડ પર ઘસડાયો હતો, જ્યારે ગંભીર ઇજાઓના કારણે વિકીભાઈનું ઘટનાસ્થળે જ મોત નીપજ્યું હતું.
પ્રાપ્ત વિગતો મુજબ, વડોદરા શહેરના રહેવાસી વિકીભાઈ પટેલ પોતાના આઇસર ટેમ્પો સાથે નેશનલ હાઇવે નં. 48 પરથી પસાર થઈ રહ્યા હતા. દરમિયાન દરજીપુરા નજીક તેમના ટેમ્પોનો એક્સલ અચાનક તૂટી ગયો હતો. વાહનમાં ખામી સર્જાતા તેમણે ટેમ્પો હાઇવેની સાઇડમાં ઊભો રાખી તપાસ શરૂ કરી હતી. તે દરમિયાન પાછળથી આવી રહેલા અન્ય આઇસર ટેમ્પોના ચાલકે સ્ટીયરિંગ પરથી કાબૂ ગુમાવતા ઊભેલા વાહનને પાછળથી ધડાકાભેર ટક્કર મારી હતી.
ટક્કરની અસર એટલી ગંભીર હતી કે ટેમ્પો લગભગ 100 મીટર સુધી રોડ પર ઘસડાયો હતો. આ દરમિયાન ટેમ્પોની નજીક ઊભેલા વિકીભાઈ તેની ઝપેટમાં આવી ગયા હતા. માથા અને શરીરના વિવિધ ભાગોમાં ગંભીર ઇજાઓ પહોંચતા તેઓ લોહીલુહાણ હાલતમાં ઢળી પડ્યા હતા. સ્થાનિક લોકો અને અન્ય વાહનચાલકોની મદદથી તેમને તાત્કાલિક સારવાર માટે સયાજી હોસ્પિટલ ખસેડવામાં આવ્યા હતા, જ્યાં ફરજ પરના તબીબોએ તેમને મૃત જાહેર કર્યા હતા.
યુવાન પુત્રના અકાળે થયેલા નિધનના સમાચાર મળતા પરિવારજનોમાં શોકની લાગણી છવાઈ ગઈ હતી અને હોસ્પિટલ પરિસરમાં કરુણ દૃશ્યો સર્જાયા હતા.
ઘટનાની જાણ થતાં જ ‘ડાયલ-112’ની ટીમ તેમજ કપુરાઈ પોલીસ સ્ટેશનનો કાફલો સ્થળ પર દોડી ગયો હતો. પોલીસે ટ્રાફિક વ્યવસ્થા સંભાળી અકસ્માતગ્રસ્ત વાહનોને હટાવવાની કાર્યવાહી કરી હતી. કપુરાઈ પોલીસે અકસ્માત સર્જનાર વાહનચાલક સામે ગુનો નોંધી વધુ તપાસ હાથ ધરી છે.
આ દુર્ઘટનાએ હાઇવે પર વાહન બગડ્યા બાદ સુરક્ષિત રીતે ઊભા રહેવાની જરૂરિયાત અને માર્ગ સલામતી અંગે ફરી એકવાર ગંભીર ચિંતા ઊભી કરી છે.
