પશ્ચિમ બંગાળમાં ચાલી રહેલી વિધાનસભા ચૂંટણી વચ્ચે પ્રધાનમંત્રી નરેન્દ્ર મોદીની એક અલગ અને અનોખી ઝલક જોવા મળી છે. શુક્રવારે પીએમ મોદીએ હુગલી નદીમાં હોડીની સવારી કરી અને નાવિકો સાથે મુલાકાત કરી. આ મુલાકાતના ફોટા તેમણે પોતાના સોશિયલ મીડિયા એકાઉન્ટ પર શેર કર્યા છે, જે હાલમાં ખૂબ ચર્ચામાં છે. શેર કરાયેલા ફોટોમાં પીએમ મોદી હાથમાં કેમેરા લઈને હોડીમાં બેઠેલા જોવા મળે છે. કેટલીક તસવીરોમાં તેઓ પોતે ફોટોગ્રાફી કરતા પણ દેખાઈ રહ્યા છે. તેમની આસપાસ સ્થાનિક લોકોની ભીડ પણ જોવા મળે છે, જે આ ક્ષણને યાદગાર બનાવવા માટે ઉત્સાહિત દેખાય છે.
પીએમ મોદીએ ઇન્સ્ટાગ્રામ પર આ તસવીરો શેર કરતાં લખ્યું કે ગંગા દરેક બંગાળી માટે ખૂબ જ મહત્વપૂર્ણ છે. તેમના મુજબ ગંગા માત્ર એક નદી નથી, પરંતુ બંગાળની સંસ્કૃતિ અને આત્માનો અભિન્ન ભાગ છે. ગંગાના પવિત્ર જળમાં ભારતની પ્રાચીન સંસ્કૃતિ અને પરંપરાનો વારસો વહે છે. આ દરમિયાન પીએમ મોદીને હોડી ચલાવનાર નાવિકો સાથે વાતચીત કરવાની તક પણ મળી. તેમણે નાવિકોની મહેનતની પ્રશંસા કરી અને તેમની જીવનશૈલી વિશે જાણકારી મેળવી. સાથે જ, હુગલી નદીના કિનારે ફરતા સામાન્ય નાગરિકો સાથે પણ તેમણે મુલાકાત કરી. પીએમ મોદીએ જણાવ્યું કે તેઓ પશ્ચિમ બંગાળના વિકાસ અને અહીંના લોકોની સમૃદ્ધિ માટે સતત કાર્ય કરવા પ્રતિબદ્ધ છે. તેમની આ મુલાકાત ચૂંટણી પ્રચાર વચ્ચે ખાસ મહત્વ ધરાવે છે.
ઉલ્લેખનીય છે કે પશ્ચિમ બંગાળમાં પ્રથમ તબક્કાના મતદાનમાં નોંધપાત્ર ઉત્સાહ જોવા મળ્યો હતો અને ઊંચું મતદાન નોંધાયું હતું. હવે બીજા તબક્કાનું મતદાન 29 એપ્રિલે યોજાવાનું છે, જેના માટે તમામ રાજકીય પક્ષો જોરશોરથી પ્રચાર કરી રહ્યા છે. આ પહેલા પણ પીએમ મોદીએ બંગાળ મુલાકાત દરમિયાન ઝારગ્રામમાં ચૂંટણી રેલીને સંબોધિત કર્યા બાદ અચાનક ઝાલમુરીની દુકાન પર જઈ સ્થાનિક નાસ્તાનો સ્વાદ લીધો હતો. હવે હુગલી નદીમાં તેમની હોડી સવારી અને લોકો સાથેનો સંવાદ ફરી એકવાર ચર્ચાનો વિષય બન્યો છે.
