અંક્લેશ્વર: (Ankleshwar) રાજય સરકારના મંત્રી ઈશ્વર પટેલને કોરોના પોઝિટિવ આવતા ભાજપમાં ફફડાટ વ્યાપી ગયો હતો. મંત્રી ઈશ્વરસિંહ પટેલે બે દિવસ અગાઉ જ કોરોનાની વેકસીન (Vaccine) લીધી હતી. રાજ્યસરકારના રમતગમત અને સહકાર મંત્રી ઈશ્વરસિંહ પટેલ કોરોના સંક્રમિત થતા ભારતીય જનતા પાર્ટીના કાર્યકર્તાઓમાં ચિંતાનું મોજુ પ્રસરી ગયુ હતુ. ઈશ્વરસિંહ પટેલને (Ishwar singh Patel) કોરોના લક્ષણો જણાતા તેમનું તબીબી પરીક્ષણ કરવામાં આવ્યુ હતુ, અને તેમનો કોરોના રિપોર્ટ પોઝિટિવ આવતા તેમને અમદાવાદની યુ એન મહેતા હોસ્પિટલમાં સારવાર અર્થે દાખલ કરવામાં આવ્યા હોવાનું જાણવા મળ્યુ છે.
વધુમાં અંકલેશ્વર તાલુકાના સિસોદરા ગામ ખાતે સ્થાનિક સ્વરાજ્યની ચૂંટણીમાં વિજેતા બનેલા ભાજપના ઉમેદવારોનો સન્માન સમારંભ યોજાયો હતો, જેમાં પણ મંત્રી ઈશ્વરસિંહ પટેલ દ્વારા આ ઉમેદવારોને સન્માનિત કરવામાં આવ્યા હતા, અને આજ દિવસે તેઓએ સિસોદરા પી.એસ.સી ખાતે તેમણે કોરોનાની વેકસીનનો ડોઝ લીધો હતો.
ઉલ્લેખનીય છે કે મંત્રી ઈશ્વરસિંહ પટેલ કોરોના સંક્રમિત થતા તેઓના સંપર્કમાં આવેલા ભાજપના નેતાઓ સહિત સ્થાનિક સ્વરાજની ચૂંટણીમાં વિજેતા બનેલા અંકલેશ્વરના વિજેતા ઉમેદવારોના કપાળે ચિંતાની લકીર ઉપસી આવી હતી.
