ભરૂચ,અંકલેશ્વરઃ અંકલેશ્વરથી સુરતને જોડતા સ્ટેટ હાઇવે પર ગોઝારો અકસ્માત થતા 3 લોકોના કરુણ મોત નીપજ્યા હતા. હાંસોટ તાલુકાના શેરા ગામ નજીકથી પૂરઝડપે પસાર થઈ રહેલ કાર ધડાકાભેર વૃક્ષ સાથે ભટકાતા અકસ્માત સર્જાયો હતો. જેમાં કારમાં સવાર બે લોકોના ઘટનાસ્થળે જ મોત નીપજ્યાં હતાં. જ્યારે અન્ય એક વ્યક્તિને ઈજા પહોંચતા તેને સારવાર અર્થે ખસેડતા મોત નીપજ્યું હતું.
- ચાલકને ઝોંકુ આવતા કાર ધડાકાભેર ઝાડ સાથે અથડાતા ૩ને કાળ ભરખી ગયો
- મોતને ભેટેલા યુવાનોની ઉંમર 22-26 વર્ષની હતી
- મૃતક 3 પૈકી 1 યુવકની સગાઈ થતા શુભની જગ્યાએ અશુભ ઘટનાથી માતમ છવાયો
ભાવનગરના 3 યુવાનો કારમાં બેસીને વહેલી સવારે સુરત જઈ રહ્યા હતા તે વેળા ગોઝારો અકસ્માતની ઘટનાએ ત્રણેયને કાળ ભરખી ગયો હતો.ઘટનાની જાણ થતાની સાથે જ હાંસોટ પોલીસનો કાફલો ઘટનાસ્થળે પહોંચ્યો હતો અને મૃતદેહને પોસ્ટમોર્ટમ માટે ભરૂચ સિવિલ હોસ્પિટલ ખસેડ્યા હતા.વહેલી સવારના સમયે કારચાલકને ઝોકું આવી જતા અકસ્માત સર્જાયો હોવાનું પ્રાથમિક અનુમાન લગાવી રહ્યા છે.જો કે આ ઘટના અંગે પોલીસ તપાસ ચલાવી રહી છે.
ઉલ્લેખનીય એ છે કે મોતને ભેટેલા 3 યુવાનો 22-26 વર્ષની ઉંમરના હોવાથી હોવાનું સામે આવ્યું છે.ગોઝારા અકસ્માતની જાણ પરિવારને થતા ભાવનગરથી ભરૂચ આવવા નીકળ્યા હોવાનું જાણવા મળે છે.મોતને ભેટેલા 3 યુવાનો પૈકી 1 યુવાનની સગાઈ થઇ હોવાનું જાણવા મળી રહ્યું છે.
મૃતકોની યાદી
- મહાવીર પ્રદીપભાઈ અગ્રવાલ (ઉ.વ.20,) રહે-અર્બન સોસાયટી, ભરતનગર ભાવનગર
- મિતેષ ચાવડા (ઉ.વ.20,) રહે-ભરતનગર, ભાવનગર
- ચેતન ભરત ભટ્ટી (ઉ.વ.26,) રહે- સ્ટેશન ચોક ભાવનગર
