ગુજરાતમાં છેલ્લા કેટલાક દિવસોથી વાદળછાયા વાતાવરણ વચ્ચે અનેક વિસ્તારોમાં ધીમી ધારે તો ક્યાંક ધોધમાર વરસાદ વરસી રહ્યો છે. છેલ્લા 24 કલાક દરમિયાન રાજ્યના 95 તાલુકાઓમાં મેઘરાજાએ હાજરી પુરાવી છે, જેમાં દક્ષિણ ગુજરાતમાં સૌથી વધુ વરસાદી માહોલ જોવા મળ્યો છે.
રાજ્યના 12 તાલુકાઓમાં 1 થી 2.5 ઈંચ સુધીનો નોંધપાત્ર વરસાદ નોંધાયો છે. સૌથી વધુ વરસાદ વાલોડ અને ઉમરગામમાં પડ્યો છે. તાપી જિલ્લાના વાલોડમાં સૌથી વધુ 2.44 ઈંચ વરસાદ નોંધાયો છે.
સુરત શહેરમાં ધોધમાર વરસાદથી જળબંબાકારની સ્થિતિ
સુરત શહેરમાં ફરી એકવાર મેઘરાજાએ તોફાની બેટિંગ શરૂ કરતા જનજીવન પ્રભાવિત થયું છે. નીચાણવાળા વિસ્તારોમાં પાણી ભરાઈ જવાથી વાહનચાલકો મુશ્કેલીમાં મુકાયા છે:
- શહેરના વ્યસ્ત ગણાતા ઉધના રોડ અને ખાડી રોડ પર ઘૂંટણસમા પાણી ભરાઈ ગયા છે.
- ઉધના બસ ડેપોથી લક્ષ્મીનારાયણ મંદિર સુધીનો આખો માર્ગ પાણીમાં ગરકાવ થઈ જતાં અનેક વાહનો બંધ પડી ગયા છે.
- આ વિસ્તારમાં વર્ષોથી પાણી ભરાવાની ગંભીર સમસ્યા હોવા છતાં તંત્ર દ્વારા કોઈ કાયમી નિકાલ ન કરવામાં આવતા સ્થાનિક લોકોમાં ભારે નારાજગી જોવા મળી રહી છે.
હવામાન વિભાગ અને અંબાલાલ પટેલની મોટી આગાહી
હાલમાં વરસાદે થોડો વિરામ લીધો છે, પરંતુ આગામી દિવસોમાં મેઘરાજા ફરી ધમાકેદાર વાપસી કરવાના મૂડમાં છે.
- અમદાવાદમાં સવારથી જ વાદળછાયું વાતાવરણ છે. હવામાન વિભાગના જણાવ્યા અનુસાર આજે મધ્ય ગુજરાત, દક્ષિણ ગુજરાત, સૌરાષ્ટ્ર અને પૂર્વ ઝોનના અનેક જિલ્લાઓ જેવા કે ગાંધીનગર, વડોદરા, રાજકોટ, આણંદ, ખેડા, પંચમહાલ, દાહોદ, ભરૂચ, નર્મદા, જામનગર, મોરબી, જૂનાગઢ, ગીર સોમનાથ, અમરેલી, ભાવનગર, બોટાદ, સુરેન્દ્રનગર અને કચ્છના કેટલાક વિસ્તારોમાં છૂટાછવાયા વરસાદી ઝાપટાં પડી શકે છે.
- હવામાન નિષ્ણાત અંબાલાલ પટેલના જણાવ્યા મુજબ, 20 જુલાઈ સુધી રાજ્યમાં માત્ર છૂટોછવાયો વરસાદ રહેશે. પરંતુ 22 જુલાઈથી વરસાદનો બીજો રાઉન્ડ શરૂ થશે.
- આગામી 27 થી 30 જુલાઈ દરમિયાન રાજ્યના અનેક વિસ્તારોમાં ભારેથી અતિભારે વરસાદ પડવાની પૂરી સંભાવના વ્યક્ત કરવામાં આવી છે.
