હરિયાણા અને જમ્મુ-કાશ્મીરમાં યોજાયેલી વિધાનસભા ચૂંટણીના પરિણામો અનુસાર ભારતીય જનતા પાર્ટી સતત ત્રીજી વખત સરકાર બનાવી રહી છે. બીજી તરફ જમ્મુ-કાશ્મીરમાં કોંગ્રેસ-નેશનલ કોન્ફરન્સ ગઠબંધનને બહુમતી મળી છે. અહીં ભાજપ અને પીડીપી પાછળ રહ્યા છે. બંને રાજ્યોમાં 90-90 બેઠકો માટે મતદાન થયું હતું. જમ્મુ-કાશ્મીરમાં ત્રણ તબક્કામાં જ્યારે હરિયાણામાં એક તબક્કામાં મતદાન થયું હતું. હરિયાણામાં સત્તારૂઢ ભાજપે અગાઉ પણ વિશ્વાસ વ્યક્ત કર્યો હતો કે તે સતત ત્રીજી મુદત માટે સત્તા જાળવી રાખવામાં સફળ રહેશે.
હરિયાણામાં ભાજપ ત્રીજી વખત સરકાર બનાવશે તેવું લાગી રહ્યું છે. રાજ્યમાં આવું કરનાર તે પ્રથમ પક્ષ હશે. ટ્રેન્ડમાં કુલ 90માંથી 12 સીટો પર પાર્ટીની લીડ છે. 37 બેઠકો જીતી છે. બીજી તરફ કોંગ્રેસ 5 સીટો પર લીડ ધરાવે છે અને 31 સીટો પર જીત મેળવી છે. મુખ્યમંત્રી નાયબ સૈની લાડવા અને કોંગ્રેસના નેતા ભૂપેન્દ્ર હુડ્ડા ગઢી-સામ્પલા બેઠક પરથી જીત્યા છે. બીજી તરફ નેશનલ કોન્ફરન્સે જમ્મુ અને કાશ્મીરમાં ખૂબ સારું પ્રદર્શન કર્યું છે. મત ગણતરી દરમિયાન નેશનલ કોન્ફરન્સ ભારે બહુમત સાથે આગળ ચાલી રહી હતી. અહીં એનસીના વડા ફારૂક અબ્દુલ્લાએ જાહેરાત પણ કરી દીધી છે કે ઓમર અબદુલ્લા જમ્મુ-કાશ્મીરના આગામી મુખ્યમંત્રી હશે.
જમ્મુ-કાશ્મીર વિધાનસભા ચૂંટણીમાં નેશનલ કોન્ફરન્સ અને કોંગ્રેસ ગઠબંધન જીત તરફ આગળ વધી રહ્યું છે. વલણો અનુસાર ગઠબંધન બહુમતનો આંકડો પાર કરી ગયો છે. આ દરમિયાન નેશનલ કોન્ફરન્સના વડા ફારૂક અબ્દુલ્લાએ મોટું નિવેદન આપ્યું છે. તેમણે કહ્યું કે ઓમર અબ્દુલ્લા જમ્મુ-કાશ્મીરના આગામી મુખ્યમંત્રી હશે. તેમણે વધુમાં કહ્યું કે લોકોએ તેમનો જનાદેશ આપ્યો છે. તેઓએ સાબિત કરી દીધું છે કે તેઓ 5 ઓગસ્ટે લીધેલા નિર્ણયને સ્વીકારતા નથી.
હરિયાણામાં બીજેપીની લીડ બાદ વડાપ્રધાન નરેન્દ્ર મોદીએ સીએમ નાયબ સિંહ સૈનીને ફોન કરીને જીત પર અભિનંદન પાઠવ્યા હતા. આ દરમિયાન સમાચાર આવી રહ્યા છે કે નવી સરકારનો શપથ ગ્રહણ દશેરા એટલે કે 12મી ઓક્ટોબરે થઈ શકે છે. હરિયાણા વિધાનસભા ચૂંટણીના પરિણામોએ આ વખતે આશ્ચર્યચકિત કરી દીધું. કોંગ્રેસને આ વખતે જીતનો વિશ્વાસ હતો. એક્ઝિટ પોલથી લઈને રાજકીય નિવેદનો સુધી એવા સંકેતો મળી રહ્યા છે કે ભાજપ આ વખતે હરીફાઈમાં નબળી છે.
બીજી તરફ 65થી વધુ બેઠકો જીતશે તો કમાન કોને સોંપાશે તે અંગે કોંગ્રેસમાં ચર્ચા ચાલી હતી. ભૂપેન્દ્ર સિંહ હુડ્ડા, કુમારી સેલજા અને રણદીપ સુરજેવાલા આ ત્રણેય નેતાઓ સીએમ પદ માટે દાવેદારી કરી રહ્યા હતા. કોંગ્રેસ યુવાનોમાં બેરોજગારી અને ખેડૂતો અને કુસ્તીબાજોમાં નારાજગી જેવા મુદ્દાઓ જોરશોરથી ઉઠાવી રહી હતી. આ બધું હોવા છતાં ભાજપે કોંગ્રેસ પાસેથી જીત છીનવી લીધી છે.
હરિયાણામાં પરિણામો વચ્ચે કોંગ્રેસે પ્રેસ કોન્ફરન્સ કરી હતી. નેતા જયરામ રમેશે કહ્યું કે હરિયાણાના પરિણામો ચોંકાવનારા છે. અમે આ પરિણામો સ્વીકારી શકતા નથી. અહીં લોકશાહીનો પરાજય થયો છે અને ભાજપનું તંત્ર જીત્યું છે. અમે ચૂંટણી પંચને ફરિયાદ કરીશું. તમામ ફરિયાદો એકત્ર કરીને પંચ સમક્ષ મૂકવામાં આવશે.
હરિયાણા ચૂંટણીમાં ભાજપની લીડ અંગે પાર્ટીના નેતા બ્રિજભૂષણ સિંહે કહ્યું કે ‘જાટ’ પ્રભુત્વવાળી બેઠકો પર ભાજપના ઘણા ઉમેદવારો જીત્યા છે. કુસ્તીબાજ ચળવળમાં કહેવાતા કુસ્તીબાજો હરિયાણાના હીરો નથી. તે તમામ જુનિયર કુસ્તીબાજો માટે વિલન પણ છે. વિનેશ ફોગાટનું નામ લીધા વિના તેમણે કહ્યું કે તેણે મારા નામનો ઉપયોગ જીતવા માટે કર્યો, તેથી તેનો અર્થ એ છે કે હું એક મહાન વ્યક્તિ છું જેણે તેને જીતવામાં મદદ કરી. તે જીતી ગઈ પરંતુ કોંગ્રેસ હારી ગઈ.
