અમેરિકામાં શુક્રવારે (27 સપ્ટેમ્બર) ત્રાટકેલા ચક્રવાત હેલેનના કારણે અત્યાર સુધીમાં 5 રાજ્યોમાં 49 લોકોના મોત થયા છે. ચક્રવાતની સૌથી વધુ અસર દક્ષિણ કેરોલિના અને જ્યોર્જિયામાં જોવા મળી હતી જ્યાં કેટેગરી 4ના વાવાઝોડાને કારણે 34 લોકોના મોત થયા હતા. પાંચેય રાજ્યોમાં તોફાનના કારણે અનેક લોકો ફસાયેલા છે, તેમને બચાવવાના પ્રયાસો કરવામાં આવી રહ્યા છે.
નોર્થ કેરોલિનામાં કેટલીક જગ્યાએ ભૂસ્ખલન પણ થયું હતું. લોકોને બચાવવા માટે અહીં હેલિકોપ્ટર મોકલવામાં આવ્યા હતા. આ દરમિયાન હોસ્પિટલની છત પરથી 59 લોકોને બચાવી લેવાયા હતા. અમેરિકામાં તોફાનના કારણે 45 લાખ લોકોના ઘરોમાં વીજળી નથી. ફ્લોરિડામાં બચાવ કામગીરી માટે 4 હજાર નેશનલ ગાર્ડ્સમેન તૈનાત કરવામાં આવ્યા છે. ફાઈનાન્સિયલ કંપની મૂડીઝે કહ્યું કે ચક્રવાત હેલેનના કારણે અમેરિકાને 2 લાખ 51 હજાર કરોડ રૂપિયાનું નુકસાન થયું છે. બીબીસીના જણાવ્યા અનુસાર મેક્સિકોના અખાતમાંથી ફ્લોરિડાના દરિયાકાંઠે ત્રાટકેલું આ અત્યાર સુધીનું સૌથી શક્તિશાળી તોફાન છે.
આ તોફાન અમેરિકાના ઈતિહાસના 14 સૌથી ખતરનાક તોફાનોમાંથી એક છે. આ પહેલા શુક્રવારે જાહેર કરાયેલા આંકડા અનુસાર તોફાનથી 1 કરોડ 20 લાખ લોકો પ્રભાવિત થયા છે. જેના કારણે 1 હજાર ફ્લાઈટ્સ રદ કરવામાં આવી હતી. સ્ટેટ ઈમરજન્સી સર્વિસે કહ્યું છે કે આગામી બે-ત્રણ દિવસમાં 5 કરોડ લોકો પ્રભાવિત થઈ શકે છે.
અમેરિકન હવામાનશાસ્ત્રી ફિલ ક્લોટ્ઝબેચે કહ્યું કે છેલ્લા 35 વર્ષમાં હેલેન કરતાં માત્ર ત્રણ વાવાઝોડાં જ મોટાં હતાં. 2017ની ઇરમા, 2005ની વિલ્મા અને 1995નું ઓપલ હતું. મેક્સિકોની ખાડીમાં 100 વર્ષમાં આ સૌથી મોટું તોફાન છે. ઈરમા વાવાઝોડાને કારણે અમેરિકા અને આસપાસના દેશોમાં 134 લોકોના મોત થયા હતા. વિલ્મા દ્વારા 23 લોકો અને હરિકેન ઓપલ દ્વારા 27 લોકો માર્યા ગયા હતા. હવામાનશાસ્ત્રીઓના મતે તાપમાનમાં વધારો થવાને કારણે શક્તિશાળી તોફાનોની સંખ્યા વધી રહી છે.
