પ્રતિનિધિ વડોદરા તા.26
ગોરવા પંચવટી વિસ્તારમાં ઘરકામ કરતી મહિલા કબાટમાંથી રૂ.45 હજારના મતાની ચોરી કરી ફરા થઈ ગઈ હતી. જેથી મકાન માલિક મહિલાએ ગોરવા પોલીસ સ્ટેશનમાં કામવાળી ફરિયાદ નોંધાવી છે.
ગોરવા પંચવટી વિસ્તારમાં બરોડા સ્કાયમાં રહેતા શીખાબેન પ્રણવ પટેલ અમદાવાદ ખાતે ડેલોઈટ કંપનીમા નોકરી કરે છે. છેલ્લા ત્રણ વર્ષથી પતિ સાથે રહે છે. શીખાબેને ઘરમાં એક કામવાળી બાઇ તરીકે સુમિત્રાબેન ઠાકોર ચૌહાણને છેલ્લા ચાર મહિનાથી રાખી હતી. 23 સપ્ટેમ્બરના રોજ તેઓ ઘરે હાજર હતા. તે દરમ્યાન સવારના સમયે સુમિત્રાબેન ઘરે કામ કરવા માટે આવ્યા હતા અને તેઓ બેડરૂમમાં સાફ સફાઈ કરતા હતા. દરમ્યાન શીખાબેન બેડરૂમમાં કામ અર્થે ગયા હતા. ત્યારે બેડરૂમમાં કબાટના ડ્રોવરમાં તેમના પતિનું પર્સ કાઢીને કામવાળી જોઇ રહી હોય તેમને શીખાબેન પાકીટ શા માટે જોવો છો તેમ પુછતા તેઓએ પર્સ નીચે પડી ગયુ હોય તેને ડ્રોવરમાં પરત મુકુ છુ, એમ કહ્યું હતું. દરમ્યાન કામવાળી બાઇ ગભરાઈ ગઇ હતી. ત્યારબાદ પોતાનુ કામ પતાવી સુમીત્રા તેના ઘરેથી જતી રહી હતી. મહિલાએ કામવાળી બાઈના ગયા બાદ કબાટમાં પડેલી સોનાના દાગીના ચેક કર્યા હતા. ત્યારે તેમનું એક સોનાનુ મંગલસુત્ર અને એક ચાંદીનુ પેડલ કબાટના ડ્રોવરમાં મળી આવ્યા ન હતા. જેથી બાઇ 45 હજારના દાગીનાની ચોરી કરી ગઈ હોવાની આશંકાએ તેના વિરુદ્ધ ચોરીની ફરિયાદ નોંધાવી હતી. જેથી પોલીસે મહિલાના ફરિયાદના આધારે ગુનો નોંધી કામવાળી બાઇને ઝડપી પાડવા તજવીજ હાથ ધરી છે.
