AIMIM પાર્ટીના નેતા મહારાષ્ટ્ર AIMIMના પ્રમુખ ઈમ્તિયાઝ જલીલે મહંત રામગિરિ મહારાજ દ્વારા ઈસ્લામ વિરુદ્ધ આપવામાં આવેલા કથિત નિવેદનને લઈને મોરચો ખોલ્યો છે. અસદુદ્દીન ઓવૈસીની પાર્ટીના નેતા ઇમ્તિયાઝ જલીલ તેમના હજારો સમર્થકો સાથે રામગિરિ મહારાજની ધરપકડની માંગ સાથે સંભાજી નગરથી મુંબઈ માટે રવાના થયા હતા. ઈમ્તિયાઝ જલીલનો આરોપ છે કે મહારાષ્ટ્રમાં મુસ્લિમોને મસ્જિદોમાં ઘૂસીને મારી નાખવાની ધમકી આપવામાં આવી રહી છે. ઈસ્લામ વિશે ખોટા નિવેદનો થઈ રહ્યા છે અને 60 FIR હોવા છતાં એકનાથ શિંદેની સરકાર કોઈ પગલાં લઈ રહી નથી.
અસદુદ્દીન ઓવૈસીની પાર્ટી AIMIMના નેતાઓએ આજે ”મુંબઈ ચલો” ના નારા આપ્યા અને આ નારા લગાવ્યા બાદ મહારાષ્ટ્રના વિવિધ શહેરોમાંથી કાફલો મુંબઈ તરફ રવાના થયો. સૂત્રોચ્ચાર કરતા AIMIMના નેતાઓ મુંબઈ તરફ આગળ વધ્યા. કેટલાક બાઇક પર સવાર હતા તો કેટલાક કારની છત પર સવાર હતા જેના વીડિયો વાયરલ થઈ રહ્યા છે. AIMIMના નેતા ઈમ્તિયાઝ જલીલ આ માર્ચનું નેતૃત્વ કરી રહ્યા હતા. ઈમ્તિયાઝ જલીલના વીડિયો વાયરલ થતા મુંબઈમાં હાજર વારિસ પઠાણે પણ મોરચો ખોલ્યો હતો.
બીજી તરફ સંત રામગીરીએ કહ્યું કે ઇમ્તિયાઝ જલીલની આ રેલી તેમના રાજકારણને ચમકાવવાનો પ્રયાસ છે. સંત રામગિરિએ કહ્યું કે ઇમ્તિયાઝ જલીલ લોકસભાની ચૂંટણી હારી ગયા હોવાથી હવે તેઓ વિધાનસભા ચૂંટણીની તૈયારી માટે રેલી કાઢી રહ્યા છે. મહંત રામગિરિ મહારાજ મહારાષ્ટ્રના સરલા દ્વીપના મઠાધિપતિ છે. તેમના ભક્તોની સંખ્યા લાખોમાં હોવાનું કહેવાય છે. મહંત રામગિરિ મહારાજનો છત્રપતિ સંભાજીનગર, નાસિક, જાલના અને જલગાંવ વિસ્તારોમાં ઘણો પ્રભાવ માનવામાં આવે છે.
ઓવૈસીની પાર્ટીના નેતાઓ ‘લબ્બૈક યા રસૂલ અલ્લાહ’ના નારા લગાવતા મુંબઈ તરફ આગળ વધી રહ્યા છે. મુદ્દો એ છે કે પયગંબરનો અનાદર કરનારાઓ સામે કોઈ કાર્યવાહી કરવામાં આવતી નથી. વાસ્તવમાં AIMIM એક વિવાદાસ્પદ ટિપ્પણી પર નારાજ છે. બીજેપી નેતા નીતિશ રાણેના ભાષણથી પણ AIMIM નારાજ છે. જેમની સામે મુંબઈ ચલોના નારા લાગ્યા હતા. મહારાષ્ટ્રના અનેક શહેરોમાંથી AIMIMના સમર્થકો અને કાર્યકરોએ મુંબઈ તરફ કૂચ કરી છે. AIMIMના ઓફિશિયલ X એકાઉન્ટ પરથી આવી જ એક માર્ચનો વીડિયો ટ્વીટ કરવામાં આવ્યો છે.
રામગીરી મહારાજે આરોપો પર શું કહ્યું?
રામગિરિ મહારાજે કહ્યું કે મેં જે નિવેદન આપ્યું છે તે કોઈ શાસ્ત્રના આધારે આપવામાં આવ્યું છે. એ ઈતિહાસ છે અને ઈતિહાસ બદલી શકાતો નથી. સત્ય ઉજાગર કરવાનું આપણું કામ છે. તેમણે બાંગ્લાદેશમાં હિંદુઓ પર થઈ રહેલા અત્યાચાર વિશે પણ વાત કરી હતી. રામગિરિ મહારાજે કહ્યું છે કે હું મારા નિવેદન અંગે કોઈ અફસોસ વ્યક્ત કરવા માંગતો નથી. તેમણે એમ પણ કહ્યું હતું કે જ્યારે અકબરુદ્દીન ઓવૈસીએ કહ્યું હતું કે પોલીસને 15 મિનિટ માટે હટાવી દો ત્યારે શું તેમની ધરપકડ થઈ હતી? આ દેશમાં અભિપ્રાય વ્યક્ત કરવાની સ્વતંત્રતા છે.
