અમેરિકાના (America) પેન્સિલવેનિયામાં (Pennsylvania) શુક્રવારે સાંજે એક ચોકલેટ ફેક્ટરીમાં (Chocolate Factory) થયેલા વિસ્ફોટમાં (Blast) બે લોકોના મોત થયા છે. આ હૃદયદ્રાવક ઘટનામાં ઘણા લોકો ઘાયલ થયાના સમાચાર પણ છે. વેસ્ટ રીડિંગના આર.જે. ખાતે વેસ્ટ રીડિંગ બોરો પોલીસ વિભાગના ચીફ વેન હોલબેને આર. એમ. પામર કોર્પોરેશનના પ્લાન્ટમાં થયેલા વિસ્ફોટમાં 2 લોકોના મોત અને અન્ય ઘણા લોકો ઘાયલ થયાની પુષ્ટિ કરી છે. તેમણે જણાવ્યું કે પ્લાન્ટમાં વિસ્ફોટ બાદ 9 લોકો ગુમ છે. વિસ્ફોટની ભયાનકતા એટલી હતી કે વિસ્ફોટ બાદ સમગ્ર બિલ્ડિંગ 4 ફૂટ આગળ ખસી ગઈ હતી.
લોકોને બિલ્ડિંગથી દૂર રહેવા માટે કહેવામાં આવ્યું
હોલબેને જણાવ્યું કે બ્લાસ્ટ સાંજે 4.57 કલાકે થયો હતો. આ કારણે સંકુલની એક ઈમારત સંપૂર્ણપણે નાશ પામી હતી અને નજીકની બીજી ઈમારતને પણ ખરાબ રીતે નુકસાન થયું હતું, તેમણે જણાવ્યું હતું કે વિસ્ફોટથી હવે કોઈ ખતરો ન હતો, પરંતુ હોલબેને રહેવાસીઓને ફેક્ટરીની આસપાસના વિસ્તારથી દૂર રહેવાની સૂચના આપી હતી. આરોગ્ય સંભાળ પ્રદાતા ટાવર હેલ્થના પ્રવક્તા જેસિકા બેઝલરે જણાવ્યું હતું કે શુક્રવારે સાંજે આઠ લોકોને રીડિંગ હોસ્પિટલમાં દાખલ કરવામાં આવ્યા હતા.
વિસ્ફોટને કારણે ઈમારતનો કાટમાળ દૂર સુધી ફેલાયો
વિસ્ફોટ એટલો જોરદાર હતો કે હવામાં ધુમાડાના ગોટેગોટા જોવા મળ્યા હતા અને કાટમાળ પણ દૂર દૂર સુધી ફેલાઈ ગયો હતો. મેયર સામંથા કાગે જણાવ્યું હતું કે વિસ્ફોટની તાકાતનો અંદાજ એ વાત પરથી લગાવી શકાય છે કે વિસ્ફોટ બાદ બિલ્ડિંગ 4 ફૂટ આગળ ખસી ગઈ હતી. તેમણે કહ્યું કે ત્યાંની હાલત જોવી ખૂબ જ મુશ્કેલ હતી. તે ખરેખર ડરામણી હતી. પ્રશાસને લોકોને કહ્યું છે કે ડરવાની કોઈ વાત નથી પરંતુ સ્થળ પર જવાની પણ મનાઈ કરવામાં આવી હતી.
