વિજયની ઉજવણી વચ્ચે વરિષ્ઠ નેતાની મહિલા ધારાસભ્ય સાથે શરમજનક હરકત, વીડિયો વાયરલ
કેરળ વિધાનસભા ચૂંટણીના પરિણામો બાદ કોંગ્રેસની આગેવાની હેઠળના યુડીએફ (UDF) ના શાનદાર વિજયની ઉજવણી કરવામાં આવી રહી હતી. જોકે, આ ખુશીના પ્રસંગે એક એવી ઘટના બની જેણે પક્ષની ગરિમા પર સવાલ ઉઠાવ્યા છે. તિરુવનંતપુરમ સ્થિત પાર્ટી મુખ્યાલય ખાતે વરિષ્ઠ કોંગ્રેસ નેતા ચેરિયન ફિલિપ દ્વારા મહિલા ધારાસભ્ય બિંદુ કૃષ્ણા સાથે કરવામાં આવેલા અણછાજતા વર્તનનો વીડિયો સામે આવતા હોબાળો મચી ગયો છે.
શું છે સમગ્ર વિવાદ?
તાજેતરની વિધાનસભા ચૂંટણીમાં બિંદુ કૃષ્ણાએ કોલ્લમ (Kollam) બેઠક પરથી જીત મેળવી છે. વિજય બાદ જ્યારે તેઓ તિરુવનંતપુરમમાં કેરળ પ્રદેશ કોંગ્રેસ સમિતિના મુખ્યાલય પહોંચ્યા, ત્યારે ત્યાં મોટી સંખ્યામાં કાર્યકરો અને નેતાઓ હાજર હતા. બિંદુ કૃષ્ણા હાથ જોડીને સૌનું અભિવાદન ઝીલી રહ્યા હતા.
સોશિયલ મીડિયા પર વાયરલ થયેલા વીડિયોમાં જોઈ શકાય છે કે, 71 વર્ષીય કોંગ્રેસ નેતા ચેરિયન ફિલિપ બિંદુ કૃષ્ણા તરફ આગળ વધે છે. ધારાસભ્યએ તેમની સાથે હાથ મિલાવવાનો પ્રયાસ કર્યો હતો, પરંતુ ફિલિપે તે સંકેતને અવગણીને બિંદુ કૃષ્ણાને બળજબરીથી જાહેરમાં ભેટી પડ્યા હતા. આ અણધારી હરકતથી મહિલા ધારાસભ્ય અત્યંત અસ્વસ્થ એટલે કે તેઓ (Uncomfortable) દેખાતા હતા.
વીડિયોમાં કેદ થઈ અસ્વસ્થતા
ફૂટેજમાં સ્પષ્ટપણે જોઈ શકાય છે કે જેવી ચેરિયન ફિલિપે તેમને પકડવાનો પ્રયાસ કર્યો, બિંદુ કૃષ્ણાએ તરત જ તેમને દૂર ધકેલ્યા હતા અને પોતાની અસંમતિ દર્શાવી હતી. આ ઘટના બાદ તેઓ તરત જ આગળ વધી ગયા હતા અને અન્ય લોકોનું અભિવાદન કરવાનું શરૂ કર્યું હતું. આ ઘટના સમયે ત્યાં સ્થાનિક મીડિયાના કેમેરા પણ હાજર હતા, જેમાં આ આખી હરકત કેદ થઈ ગઈ હતી.
સોશિયલ મીડિયા પર રોષ અને મહિલા સુરક્ષાના સવાલો
આ વીડિયો વાયરલ થતા જ સોશિયલ મીડિયા પર લોકો ચેરિયન ફિલિપના વર્તન પર ફિટકાર વરસાવી રહ્યા છે. યુઝર્સ સવાલ ઉઠાવી રહ્યા છે કે જો રાજ્યના ચૂંટાયેલા ધારાસભ્યો પણ પોતાના જ પક્ષના કાર્યાલયમાં સુરક્ષિત નથી અને તેમને જાહેરમાં આવી અસ્વસ્થતાનો સામનો કરવો પડે છે, તો સામાન્ય મહિલાઓની સુરક્ષાનું શું? એક યુઝરે લખ્યું, “નેતાઓએ પોતાની મર્યાદા ભૂલવી જોઈએ નહીં, ખાસ કરીને જ્યારે તેઓ કોઈ મહિલા સહકર્મી સાથે વાત કરતા હોય.”
રાજકીય પ્રતિક્રિયા
આ મામલે હજુ સુધી પક્ષ દ્વારા સત્તાવાર કોઈ કડક કાર્યવાહીની જાહેરાત કરવામાં આવી નથી, પરંતુ આંતરિક રીતે વિરોધના સૂર ઉઠ્યા છે. વિરોધ પક્ષોએ પણ આ મુદ્દે કોંગ્રેસ પર નિશાન સાધવાનું શરૂ કર્યું છે. બિંદુ કૃષ્ણાએ પોતે હજુ સુધી આ બાબતે કોઈ લેખિત ફરિયાદ કરી છે કે નહીં તે સ્પષ્ટ થયું નથી, પરંતુ વીડિયોમાં તેમની પ્રતિક્રિયા ઘણું બધું કહી જાય છે.
રાજકારણમાં જ્યારે મહિલાઓની ભાગીદારી વધારવાની વાતો કરવામાં આવે છે, ત્યારે આવી ઘટનાઓ મહિલા નેતાઓ માટે કામ કરવાનું વાતાવરણ કેટલું પડકારજનક છે તે દર્શાવે છે. વરિષ્ઠ નેતા ચેરિયન ફિલિપનું આ કૃત્ય ‘બળજબરીથી ભેટવાનો પ્રયાસ’ ગણાવવામાં આવી રહ્યું છે, જે શિષ્ટાચાર અને વ્યવસાયિક મર્યાદાનું ઉલ્લંઘન છે. આ ઘટનાએ કેરળ કોંગ્રેસની વિજયની ઉજવણીમાં વિવાદનું ગ્રહણ લગાડી દીધું છે. હવે જોવાનું એ રહેશે કે કોંગ્રેસ હાઈકમાન્ડ આ ગંભીર ગણાતી ઘટના પર કેવા પગલાં લે છે.
