‘CID’ ભારતીય ટેલિવિઝનના સૌથી લોકપ્રિય ક્રાઈમ શોમાંથી એક રહ્યો છે. 1998થી 2018 સુધી ચાલેલા આ શોને અચાનક બંધ કરી દેવામાં આવ્યો ત્યારે તેના ચાહકોને મોટો ઝટકો લાગ્યો હતો. હવે વર્ષો બાદ શોમાં ઇન્સ્પેક્ટર દયાનું પાત્ર ભજવનાર દયાનંદ શેટ્ટીએ તેના બંધ થવા પાછળની અંદરની કહાની જણાવી છે. દયાનંદના જણાવ્યા પ્રમાણે ‘CID’ બંધ થવા પાછળ માત્ર સર્જનાત્મક કારણ નહોતું, પરંતુ ચેનલ, નિર્માતા અને કલાકારો વચ્ચેના મતભેદ તથા ‘આંતરિક રાજકારણ’ની પણ મોટી ભૂમિકા હતી.
‘CID’ બંધ થયું ત્યારે લતા મંગેશકરે પણ અવાજ ઉઠાવ્યો
દયાનંદ શેટ્ટીએ સિદ્ધાર્થ કન્નન સાથેની વાતચીતમાં એક એવો કિસ્સો પણ જણાવ્યો, જે હવે ફરી ચર્ચામાં આવ્યો છે. તેમના જણાવ્યા પ્રમાણે દિવંગત ગાયિકા લતા મંગેશકર ‘CID’ની મોટી ચાહક હતી. શો અચાનક બંધ થયો ત્યારે તેઓ એટલા નારાજ થયા કે તેમણે સોનીના ભારત અને અમેરિકાના ચેનલ અધિકારીઓને ફોન કર્યો હતો. દયાનંદના કહેવા પ્રમાણે લતા મંગેશકરે સીધો સવાલ કર્યો હતો કે તેઓ આ શો કેમ બંધ કરી રહ્યા છે. તેમણે કહ્યું હતું કે તેઓ પોતે આ કાર્યક્રમ જોતા હતા અને તેમને શો તથા તેના કલાકારો ખૂબ પસંદ હતા. લતા મંગેશકરનો આ પ્રયાસ હોવા છતાં ‘CID’ને ફરી ચાલુ કરવામાં આવી નહોતી.
દયાએ કહ્યું- પાછળ ‘આંતરિક રાજકારણ’ હતું
દયાનંદ શેટ્ટીના જણાવ્યા પ્રમાણે શો બંધ થવા પાછળ સૌથી મોટું કારણ આંતરિક મતભેદ હતા. તેમણે કહ્યું કે ચેનલ અને નિર્માતાઓ વચ્ચેની પરિસ્થિતિ બદલાઈ રહી હતી અને નિર્માતાઓની ટીમ બદલવાની વાત સામે આવી હતી. કલાકારો આ ફેરફાર માટે તૈયાર નહોતા. દયાનંદે એવો પણ દાવો કર્યો કે કલાકારો લગભગ 21 વર્ષ સુધી કોઈ કાયદેસર કરાર પર સહી કર્યા વગર કામ કરતા રહ્યા હતા. તેઓ ‘ફાયરવર્ક્સ પ્રોડક્શન’ સાથે જોડાયેલા હતા, જ્યારે કાર્યક્રમ સોની પર પ્રસારિત થતો હતો.
2018માં અચાનક બંધ થયો હતો શો
‘CID’નો પહેલો એપિસોડ 1998માં પ્રસારિત થયો હતો. લગભગ 20 વર્ષ સુધી દર્શકોને જોડ્યા બાદ 27 ઓક્ટોબર 2018ના રોજ તેનો છેલ્લો એપિસોડ આવ્યો હતો. તે સમયે ચેનલ તરફથી શોને થોડા સમય માટે વિરામ આપીને નવા સ્વરૂપમાં પાછો લાવવાની વાત કરવામાં આવી હતી. પરંતુ ત્યારબાદ લાંબા સમય સુધી શોની વાપસી થઈ નહોતી. દયાનંદ શેટ્ટીએ તે સમયે પણ શો પાછો આવવાની શક્યતા અંગે શંકા વ્યક્ત કરી હતી.
દયા, અભિજીત અને ACP પ્રદ્યુમનની જોડી બની હતી ઓળખ
‘CID’ની લોકપ્રિયતામાં દયાનંદ શેટ્ટીના દયા ઉપરાંત ACP પ્રદ્યુમનનું પાત્ર ભજવનાર શિવાજી સાટમ અને અભિજીતનું પાત્ર ભજવનાર આદિત્ય શ્રીવાસ્તવનો પણ મોટો ફાળો હતો. ત્રણેય પાત્રો દર્શકોમાં એટલા લોકપ્રિય બન્યા કે તેમની પોતાની અલગ ઓળખ બની ગઈ હતી. શોનો એક્શન, રહસ્ય અને તપાસ સાથેના સંવાદો ઉપરાંત દયા દ્વારા દરવાજો તોડવાના દૃશ્યો પણ ચાહકોમાં ખાસ લોકપ્રિય થયા હતા. સમય જતાં આ દૃશ્યો સોશિયલ મીડિયા પર મીમનો પણ ભાગ બન્યા.
2024માં ફરી પરત ફરી ‘CID’
વર્ષો સુધી બંધ રહ્યા બાદ ‘CID’ને 2024માં નવા સીઝન સાથે ફરી લાવવામાં આવી હતી. તેમાં શિવાજી સાટમ, દયાનંદ શેટ્ટી અને આદિત્ય શ્રીવાસ્તવ પોતાના જાણીતા પાત્રોમાં પાછા ફર્યા હતા. નવા સીઝનની શરૂઆત 21 ડિસેમ્બર 2024થી થઈ હતી. આમ, એક સમયે અચાનક બંધ થયેલા શો વિશે હવે તેના જ એક મુખ્ય કલાકારે વર્ષો બાદ અંદરની વાત જાહેર કરી છે. દયાનંદના દાવા મુજબ ‘CID’નો અંત માત્ર સર્જનાત્મક વિરામ નહોતો, પરંતુ તેની પાછળ ચેનલ, નિર્માતા અને કલાકારો વચ્ચેના મતભેદ પણ મહત્વના હતા.
