કરુણાનિધિ પાછળ ઉભેલું એ બાળક કોણ છે? જેણે DMK ના પાયા હલાવી નાખ્યા! રામ ગોપાલ વર્માનો ફોટો વાયરલ
તમિલનાડુના રાજકારણમાં એક નવો ઈતિહાસ રચાયો છે. અભિનેતામાંથી નેતા બનેલા થલાપતિ વિજયની પાર્ટી ‘તમિલગા વેટ્ટિ કઝગમ’ (TVK) એ વિધાનસભા ચૂંટણીમાં શાનદાર પ્રદર્શન કરીને રાજ્યના દાયકાઓ જૂના રાજકીય સમીકરણો બદલી નાખ્યા છે. આ જીત બાદ સોશિયલ મીડિયા પર વિજયનો એક દાયકાઓ જૂનો ફોટો વાયરલ થઈ રહ્યો છે, જેણે ભારે ચર્ચા જગાવી છે.
રામ ગોપાલ વર્માની પોસ્ટ અને કટાક્ષ
પ્રખ્યાત ફિલ્મ દિગ્દર્શક રામ ગોપાલ વર્મા (RGV) એ એક્સ (Twitter) પર એક જૂનો ફોટો શેર કર્યો છે. આ ફોટામાં તમિલનાડુના ભૂતપૂર્વ મુખ્યમંત્રી અને DMK ના દિગ્ગજ નેતા સ્વર્ગસ્થ એમ. કરુણાનિધિ (કલાઈનાર) એક મિલકતના ઉદ્ઘાટન સમયે રિબન કાપતા જોવા મળે છે. તેમની બરાબર પાછળ એક નાનો છોકરો ઉભો છે, જે બીજું કોઈ નહીં પણ આજનો સુપરસ્ટાર અને નેતા થલાપતિ વિજય છે. ફોટામાં વિજયના પિતા અને ફિલ્મ નિર્માતા એસ.એ. ચંદ્રશેખર પણ જોવા મળે છે.વર્માએ કેપ્શનમાં લખ્યું: “કલાઈનારે ક્યારેય સપનામાં પણ વિચાર્યું નહીં હોય કે તેમની પાછળ ઉભેલો આ છોકરો એક દિવસ તેમની પાર્ટીનો સફાયો કરી નાખશે.”
ચૂંટણીમાં TVK નો ‘વિજય’ રથ
માત્ર બે વર્ષ જૂની પાર્ટી TVK એ ૨૩૪ સભ્યોની વિધાનસભામાં ૧૦૮ બેઠકો જીતીને બધાને ચોંકાવી દીધા છે. બહુમતી માટે જરૂરી ૧૧૮ બેઠકોથી વિજયની પાર્ટી માત્ર ૧૦ બેઠક છેટી રહી ગઈ છે, પરંતુ તે સૌથી મોટા પક્ષ તરીકે ઉભરી આવી છે. આ સાથે જ રાજ્યમાં વિજય માટે મુખ્યમંત્રી બનવાનો માર્ગ મોકળો થયો છે.
DMK ને કારમો ફટકો
આ ચૂંટણી પરિણામો સત્તાધારી પક્ષ દ્રવિડ મુનેત્ર કઝગમ (DMK) માટે મોટો આંચકો સાબિત થયા છે.
ગત ચૂંટણીમાં ૧૩૩ બેઠકો જીતનાર DMK આ વખતે માત્ર ૫૯ બેઠકો પર સમેટાઈ ગઈ છે.
પાર્ટીને લગભગ ૭૪ બેઠકોનું સીધું નુકસાન થયું છે.
એમ.કે. સ્ટાલિનના નેતૃત્વમાં કરુણાનિધિ પરિવારના વારસામાં મળેલી પાર્ટી માટે આ અત્યાર સુધીનો સૌથી મોટો પરાજય માનવામાં આવે છે.
૬૦ વર્ષ જૂની પરંપરા તૂટી
છેલ્લા ૬૦ વર્ષથી તમિલનાડુનું રાજકારણ મુખ્યત્વે બે પક્ષો DMK અને AIADMK વચ્ચે જ સીમિત રહ્યું હતું. MGR એ DMK થી અલગ થઈને AIADMK ની રચના કર્યા પછી આ બંને પક્ષો વારાફરતી સત્તામાં આવતા હતા. જોકે, થલાપતિ વિજયે માત્ર બે વર્ષમાં આ વર્ષો જૂની પરંપરાને તોડીને તમિલનાડુમાં ત્રીજા મજબૂત વિકલ્પ તરીકે સત્તા કબજે કરી છે. સોશિયલ મીડિયા પર લોકો આને ‘નસીબનો ખેલ’ ગણાવી રહ્યા છે. કેટલાક લોકો વિજયને નવા ‘કરુણાનિધિ’ કહી રહ્યા છે, તો કેટલાક તેને પરિવર્તનની લહેર ગણાવી રહ્યા છે.
