તૃણમૂલ કોંગ્રેસના 20 બળવાખોર સાંસદોને લઈને સુપ્રીમ કોર્ટમાં મંગળવારે મહત્વની સુનાવણી થઈ. સુપ્રીમ કોર્ટે 20 સાંસદોને નોટિસ જારી કરીને તેમની સામેની અયોગ્યતા અરજી અંગે જવાબ માંગ્યો છે. આ અરજી તૃણમૂલ કોંગ્રેસના મહાસચિવ અને લોકસભા સાંસદ અભિષેક બેનર્જીએ કરી છે. તેમણે લોકસભા સ્પીકર ઓમ બિરલા પાસે બળવાખોર સાંસદોની અયોગ્યતા અંગેની અરજીઓ પર ઝડપથી નિર્ણય લેવાની માંગ કરી હતી.
અભિષેક બેનર્જીએ સુપ્રીમ કોર્ટમાં અરજી કરી હતી
તૃણમૂલ કોંગ્રેસે આરોપ લગાવ્યો હતો કે 20 સાંસદો પાર્ટી છોડીને નેશનલિસ્ટ સિટિઝન્સ પાર્ટી ઓફ ઈન્ડિયા સાથે જોડાયા છે. આ મામલે પાર્ટીએ તેમના વિરુદ્ધ પક્ષપલટા વિરોધી કાયદા હેઠળ અયોગ્યતા માટે લોકસભા સ્પીકર સમક્ષ અરજી કરી હતી. અભિષેક બેનર્જીએ સુપ્રીમ કોર્ટમાં અરજી કરીને કહ્યું હતું કે આ અરજીઓ પર નિર્ણય લેવામાં વિલંબ થઈ રહ્યો છે. તેથી સ્પીકરને ચોક્કસ સમયમર્યાદામાં નિર્ણય લેવા માટે નિર્દેશ આપવામાં આવે તેવી માંગ કરવામાં આવી હતી.
સ્પીકરે 20 સાંસદોને પહેલેથી નોટિસ આપી
સુનાવણી દરમિયાન કેન્દ્ર સરકાર તરફથી સોલિસિટર જનરલ તુષાર મહેતાએ સુપ્રીમ કોર્ટને મહત્વની માહિતી આપી હતી. તેમણે જણાવ્યું કે લોકસભા સ્પીકર ઓમ બિરલાએ તૃણમૂલ કોંગ્રેસની અયોગ્યતા અરજીઓ પર પહેલેથી જ કાર્યવાહી શરૂ કરી છે અને 20 સાંસદોને નોટિસ આપી દેવામાં આવી છે.
આ માહિતી બાદ સુપ્રીમ કોર્ટે સ્પીકર ઓમ બિરલાને હાલ નોટિસ આપવાનો નિર્ણય કર્યો નથી. તુષાર મહેતાએ કહ્યું કે તેઓ સ્પીકર તરફથી કોર્ટમાં હાજર રહેશે.
કોર્ટનો સવાલ, હવે નિર્ણય ક્યારે આવશે?
સુનાવણી દરમિયાન જસ્ટિસ જોયમાલ્યા બાગચીએ સ્પષ્ટ કર્યું કે માત્ર નોટિસ આપવાનો મુદ્દો નથી, પરંતુ આ કાર્યવાહી ચોક્કસ સમયમર્યાદામાં પૂર્ણ થવી પણ જરૂરી છે. સુપ્રીમ કોર્ટની બેન્ચમાં મુખ્ય ન્યાયાધીશ સૂર્યકાંત, જસ્ટિસ જોયમાલ્યા બાગચી અને જસ્ટિસ વી. મોહના સામેલ હતા. કોર્ટે હવે 20 બળવાખોર સાંસદો પાસેથી જવાબ માંગ્યો છે.
20 સાંસદો કયા મામલે ફસાયા?
આ સાંસદોએ તૃણમૂલ કોંગ્રેસમાંથી અલગ થઈને નેશનલિસ્ટ સિટિઝન્સ પાર્ટી ઓફ ઈન્ડિયા સાથે જોડાણ કર્યું હોવાનો મામલો છે. તેઓ 2026ની વિધાનસભા ચૂંટણીમાં તૃણમૂલ કોંગ્રેસની ટિકિટ પર ચૂંટાયા હતા અને મે મહિનામાં પરિણામ જાહેર થયા બાદ પાર્ટીથી અલગ થયા હતા. બળવાખોર સાંસદોએ લોકસભામાં અલગ જૂથ તરીકે માન્યતા આપવાની માંગ પણ કરી છે. આ સમગ્ર મામલાને લઈને તૃણમૂલ કોંગ્રેસ અને બળવાખોર સાંસદો વચ્ચે વિવાદ ચાલી રહ્યો છે.
હવે 20 સાંસદોએ સુપ્રીમ કોર્ટની નોટિસનો જવાબ આપવાનો રહેશે. બીજી તરફ લોકસભા સ્પીકરે પણ અયોગ્યતા અંગેની કાર્યવાહી શરૂ કરી દીધી હોવાનું કોર્ટને જણાવાયું છે. સુપ્રીમ કોર્ટમાં હવે આ મામલે આગળની સુનાવણી દરમિયાન સાંસદોના જવાબ અને અયોગ્યતા અંગેની કાર્યવાહી કેટલી ઝડપથી આગળ વધે છે તેના પર નજર રહેશે.
