સમાજવાદી પાર્ટીના રાષ્ટ્રીય અધ્યક્ષ અખિલેશ યાદવે ગુરુવારે ભારતીય જનતા પાર્ટી (ભાજપ) પર પ્રહાર કરવા માટે Gen-z માં લોકપ્રિય સૂત્રોચ્ચારની શૈલી અપનાવી હતી. ‘જન-ઝેડ’ના વિરોધ પ્રદર્શનોમાં અવારનવાર સંભળાતા સૂત્રોનો ઉપયોગ કરીને અખિલેશ યાદવે ભાજપને નિશાન બનાવ્યું હતું. એક પ્રેસ કોન્ફરન્સ દરમિયાન, એસપી (SP) વડાએ ટિપ્પણી કરી, “એક કચોરી, દો સમોસા—ભાજપ કા નહીં ભરોસા.” આ નિવેદન ચર્ચાનો વિષય બન્યું છે.
‘જન-ઝેડ’નું સમર્થન મેળવવાના પ્રયાસરૂપે અખિલેશ યાદવે કહ્યું, “નજીકના ભવિષ્યમાં, ‘જન-ઝેડ’ અને ‘પીડીએ’ (PDA) સાથે મળીને ભાજપનો સફાયો કરશે. તમે દિલ્હીમાં આ સૂત્ર સાંભળ્યું હશે: ‘એક કચોરી, દો સમોસા— ભાજપ કા નહીં ભરોસા’.”
પીએમ મોદીની ‘જન-ઝેડ’ કોન્ફરન્સ પર અખિલેશ યાદવની પ્રતિક્રિયા
વધુમાં પીએમ મોદીની ‘જન-ઝેડ’ કોન્ફરન્સ પર ટિપ્પણી કરતા અખિલેશ યાદવે કહ્યું, “અમે ‘ભજન જૈમિંગ’ વિશે વાત કરી હતી અને અમારી વાત સાંભળીને કોઈકે ખરેખર તે કર્યું પણ ખરું. હવે, અમે ટૂંક સમયમાં યુવાનો માટે કાર્યક્રમોનું આયોજન કરીશું. અમારા ચૂંટણી ઢંઢેરામાં તેમના માટે ઘણું બધું હશે.”
દરમિયાન રાજ્યસભાની ચૂંટણી અંગે અખિલેશ યાદવે યુપીના ધારાસભ્યોને તેમની પાર્ટીના ત્રીજા ઉમેદવારની જીત સુનિશ્ચિત કરવામાં મદદ કરવા અપીલ કરી હતી. તેમણે જણાવ્યું હતું કે જે કોઈ ભાજપને હરાવવા માંગે છે તે આગળ આવી શકે છે; એસપી (SP) દરેકનું સ્વાગત કરે છે. અખિલેશ યાદવે એવો પણ દાવો કર્યો હતો કે કેટલાક ધારાસભ્યો પહેલેથી જ તેમના સંપર્કમાં છે અને એસપીની તરફેણમાં ક્રોસ-વોટિંગ કરવા માટે તૈયાર છે.
બ્રજેશ પાઠકના ઈ-રિક્ષા અંગેના નિવેદન પર કટાક્ષ
તાજેતરમાં ઉત્તર પ્રદેશના નાયબ મુખ્યમંત્રી બ્રજેશ પાઠકે યુવાનોને નોકરી શોધવાને બદલે પોતાની ઈ-રિક્ષા ચલાવીને પૈસા કમાવવાની સલાહ આપી હતી. તેમણે સૂચન કર્યું હતું કે આનાથી તેઓ જ્યારે ઈચ્છે ત્યારે તેમના પરિવાર અને બાળકો સાથે સમય વિતાવી શકશે, જ્યારે અન્ય કોઈની નીચે કામ કરવાથી તેમને તેમના બાળકો માટે બહુ ઓછો સમય મળશે. આના જવાબમાં અખિલેશ યાદવે કહ્યું, “આપણા નાયબ મુખ્યમંત્રીએ ઈ-રિક્ષા બુક કરાવવી જોઈએ. આ એ જ નાયબ મુખ્યમંત્રી છે જેમણે હોસ્પિટલોને જ ‘બીમાર’ બનાવી દીધી છે; હોસ્પિટલોને સારવારની જરૂર છે. આવનારા દિવસોમાં PDA અને જનતા ભાજપનો સફાયો કરી નાખશે.”
