તમે 52 વર્ષના છો, હજુ પણ શીખી રહ્યા છો?’ શ્રેયાના સવાલથી ભડક્યો વિવાદ; રામ કપૂરે આપ્યો જવાબ, રાખી સાવંતની પ્રતિક્રિયાએ સોશિયલ મીડિયા પર મચાવી ધૂમ
ઓટીટી પર શરૂ થયેલા ચર્ચિત રિયાલિટી શો ‘લૉક અપ સીઝન 2’ શરૂ થતાં પહેલાં જ ભારે ચર્ચામાં આવી ગયો છે. શોના નવા પ્રોમોમાં અભિનેતા રામ કપૂર અને સોશિયલ મીડિયા ઈન્ફ્લુએન્સર શ્રેયા કાલરા વચ્ચે થયેલી ઉગ્ર બોલાચાલીએ દર્શકોનું ધ્યાન ખેંચ્યું છે. પ્રોમો સામે આવ્યા બાદ સોશિયલ મીડિયા પર આ વીડિયો ઝડપથી વાયરલ થયો છે. દરમિયાન ડ્રામા ક્વીન રાખી સાવંત પણ આ વિવાદમાં કૂદી પડી છે અને પોતાની પ્રતિક્રિયા આપતાં મોટી ચેતવણી આપી છે, જેના કારણે ચર્ચા વધુ તેજ બની ગઈ છે.
શોનો વાયરલ પ્રોમો એક સામાન્ય ચર્ચાથી શરૂ થાય છે, પરંતુ થોડી જ વારમાં તે ઉગ્ર વાદ-વિવાદમાં ફેરવાઈ જાય છે. પ્રોમોમાં શ્રેયા કાલરા રામ કપૂરને તેમના ભૂતકાળના વિવાદાસ્પદ નિવેદનો અંગે સવાલ પૂછે છે. તે કહે છે કે, “તમારી પાસે એટલું મોટું પ્લેટફોર્મ છે. લાખો લોકો તમને જોતા હોય છે. આવી સ્થિતિમાં તમારે તમારી વાતોની જવાબદારી લેવી જોઈએ. તમે 52 વર્ષના છો અને હજુ પણ શીખી રહ્યા છો? આ વાત મને ખરેખર આશ્ચર્યજનક લાગે છે.” આ સવાલ બાદ સમગ્ર વાતાવરણ તંગ બની જાય છે.
શ્રેયાના આ સવાલનો જવાબ આપતાં રામ કપૂરે શાંતિપૂર્ણ અંદાજમાં કહ્યું કે તેમણે પોતાના વિવાદાસ્પદ નિવેદનો અંગે પહેલેથી જ જાહેરમાં જવાબદારી સ્વીકારી છે. તેમણે કહ્યું કે, “હું આશા રાખું છું કે આખી જિંદગી શીખતો રહીશ. હું મરું ત્યાં સુધી શીખતો રહીશ. માણસે જીવનભર શીખતા રહેવું જોઈએ.” રામ કપૂરના આ જવાબ બાદ પણ બંને વચ્ચે ચર્ચા લાંબા સમય સુધી ચાલતી હોવાનું પ્રોમોમાં જોવા મળે છે.આ પ્રોમો સોશિયલ મીડિયા પર વાયરલ થતાં જ રાખી સાવંતે પણ તેની પ્રતિક્રિયા આપી. રાખીએ પોતાના સોશિયલ મીડિયા પર લખ્યું, “ઇસ્કો મેં ઠીક કરુંગી.” રાખીનું આ નિવેદન કોના માટે હતું તે સ્પષ્ટ નથી.
કેટલાક સોશિયલ મીડિયા યુઝર્સનું માનવું છે કે રાખીનો ઈશારો રામ કપૂર તરફ હતો, જ્યારે અન્ય લોકોનું કહેવું છે કે તેમણે શ્રેયા કાલરાને નિશાન બનાવી હતી. રાખીના આ એક વાક્યે સોશિયલ મીડિયા પર ભારે ચર્ચા જગાવી દીધી છે. જો કે રાખીના નિવેદન બાદ સોશિયલ મીડિયા પર લોકો બે ભાગમાં વહેંચાઈ ગયા છે. કેટલાક લોકોનું કહેવું છે કે શ્રેયાએ યોગ્ય પ્રશ્ન પૂછ્યો છે અને જાહેર જીવનમાં રહેલા કલાકારોએ પોતાની વાતોની જવાબદારી લેવી જોઈએ. બીજી તરફ કેટલાક દર્શકોનું માનવું છે કે શ્રેયાએ રામ કપૂર સાથે વાત કરવાની રીત યોગ્ય નહોતી અને વરિષ્ઠ અભિનેતા સાથે વધુ સન્માનપૂર્વક વાત કરવી જોઈતી હતી.
આ સમગ્ર વિવાદનું કારણ રામ કપૂરના ભૂતકાળમાં આપવામાં આવેલા કેટલાક નિવેદનો છે, જેને લઈને અગાઉ સોશિયલ મીડિયા પર ભારે વિરોધ થયો હતો. તે સમયે રામ કપૂરે જાહેરમાં માફી પણ માંગી હતી અને કહ્યું હતું કે જો તેમની કોઈ વાતથી કોઈની લાગણી દુભાઈ હોય તો તેમને તેનો અફસોસ છે. હવે ‘લૉક અપ’ના પ્રોમોમાં શ્રેયાએ ફરી એ જ મુદ્દો ઉઠાવતા જૂનો વિવાદ ફરી ચર્ચામાં આવી ગયો છે.રિયાલિટી શો ‘લૉક અપ સીઝન 2’ આ વખતે નવા અંદાજમાં રજૂ કરવામાં આવ્યો છે. શોમાં અનેક જાણીતા સેલિબ્રિટીઓ ભાગ લઈ રહ્યા છે. દરેક સ્પર્ધકને વિવિધ ટાસ્ક આપવામાં આવશે અને તેમને પોતાના જીવનના રહસ્યો તથા સત્ય પણ જાહેર કરવા પડશે. શોની શરૂઆત પહેલાં જ રામ કપૂર અને શ્રેયા કાલરાની ટક્કરે દર્શકોમાં ઉત્સુકતા વધારી દીધી છે.
રામ કપૂરની એન્ટ્રી પણ ખાસ ચર્ચામાં રહી છે. તેઓ ટેલિવિઝન ઇન્ડસ્ટ્રીના સૌથી લોકપ્રિય અભિનેતાઓમાંના એક માનવામાં આવે છે. તેમના પરિવારને શરૂઆતમાં આશ્ચર્ય થયું હતું કે તેઓ આ પ્રકારના વિવાદાસ્પદ રિયાલિટી શોમાં ભાગ લઈ રહ્યા છે. એક ઇન્ટરવ્યૂમાં રામ કપૂરે કહ્યું હતું કે તેમના બાળકો પણ શરૂઆતમાં ચિંતિત હતા અને તેમણે પૂછ્યું હતું કે તેઓ આ શોમાં શા માટે જઈ રહ્યા છે. તેમ છતાં રામ કપૂરે નવા અનુભવ માટે શોમાં ભાગ લેવાનો નિર્ણય લીધો.બીજી તરફ શ્રેયા કાલરા સોશિયલ મીડિયા પર પોતાની નિડર અને સ્પષ્ટવક્તા છબી માટે જાણીતી છે. શોમાં પ્રવેશ કરતાં પહેલાં જ તેમણે સ્પષ્ટ કરી દીધું હતું કે જો તેમને કોઈ વાત ખોટી લાગશે તો તેઓ ખુલ્લેઆમ વિરોધ કરશે. પ્રોમોમાં પણ તેમની આ જ શૈલી જોવા મળી છે, જ્યાં તેમણે કોઈ સંકોચ વગર રામ કપૂરને સીધો સવાલ પૂછ્યો હતો.
મનોરંજન જગતના નિષ્ણાતોનું માનવું છે કે રિયાલિટી શોમાં આવી ટક્કર દર્શકોનું ધ્યાન ખેંચવા માટે મહત્વપૂર્ણ સાબિત થાય છે. અગાઉની સીઝનમાં પણ અનેક સેલિબ્રિટીઓ વચ્ચે થયેલા વિવાદો શોની લોકપ્રિયતા વધારવાનું કારણ બન્યા હતા. હવે બીજી સીઝનની શરૂઆતમાં જ થયેલી આ બોલાચાલીથી શો વધુ ચર્ચામાં આવી ગયો છે.સોશિયલ મીડિયા પર વાયરલ થયેલા પ્રોમોને લાખો લોકો જોઈ ચૂક્યા છે. ઘણા યુઝર્સ રામ કપૂરના શાંત સ્વભાવની પ્રશંસા કરી રહ્યા છે, જ્યારે કેટલાક લોકો શ્રેયાની નિડરતાને સમર્થન આપી રહ્યા છે. રાખી સાવંતની ટિપ્પણી બાદ આ ચર્ચા વધુ ગરમાઈ ગઈ છે અને લોકો અંદાજ લગાવી રહ્યા છે કે જો રાખી પણ શોમાં એન્ટ્રી કરશે તો મનોરંજનનો ડોઝ અનેકગણો વધી જશે.
હાલ તો માત્ર પ્રોમો જ સામે આવ્યો છે, પરંતુ દર્શકો હવે શોના પ્રથમ એપિસોડની આતુરતાથી રાહ જોઈ રહ્યા છે. સૌની નજર એ વાત પર રહેશે કે રામ કપૂર અને શ્રેયા કાલરા વચ્ચેનો આ વિવાદ આગળ વધે છે કે બંને વચ્ચે સમાધાન થાય છે. સાથે જ રાખી સાવંતની ચેતવણીનો અર્થ શું છે અને તે આગામી એપિસોડમાં કોઈ નવી ટ્વિસ્ટ લાવે છે કે નહીં,તે પણ દર્શકો માટે સૌથી મોટું આકર્ષણ બની ગયું છે.
